ހިމަބިހި ޖެހުނު ދެ ކުދިން ތިބީ ވެކްސިން ފުރިހަމަކޮށްފައި: ހޮސްޕިޓަލް

ރާއްޖެއިން ނައްތާލެވިފައިވާކަން އިއުލާނުކޮށްފައިވާ ހިމަބިހި ނުވަތަ މީސްލްސް އަށް ޕޮޒިޓިވްވެފައިވާ ދެ ކުދިން ތިބީ އެ ބަލީގެ ވެކްސިންތައް ފުރިހަމަކޮށްފައި ކަމަށް އައްޑޫ އިކުއިޓޯރިއަލް ހޮސްޕިޓަލުން ބުނެފި އެވެ.

ރާއްޖޭގައި ހިމަބިހީގެ ވެކްސިނާއި ހިމަބިހި، މަމްޕްސް އަދި ރުބެއްލާއިން ދިފާއުކޮށްދޭ އެމްއެމްއާރު ވެކްސިންގެ ދެ ޑޯޒް ޖަހަ އެވެ. 

ތަފްސީލް - އައްޑޫ އިކުއިޓޯރިއަލް ހޮސްޕިޓަލުގެ ސީއީއޯ ޑރ. މުހައްމަދު ސޯލިހު މިއަދު 'ދައުރު'އަށް ވިދާޅުވީ އެ ކުދިން ތިބީ ހިމަބިހީގެ ވެކްސިނާއި އެމްއެމްއާރު ވެކްސިންގެ ހުރިހާ ޑޯޒްއެއް ވެސް ފުރިހަމަކޮށްފައި ކަމަށެވެ.

އެނގުން މުހިއްމު - ވެކްސިން ޖެހިޔަސް ބަލި ޖެހުމުގެ ފުރުސަތު ކޮންމެވެސް ވަރަކަށް އޮވެ އެވެ. އެމެރިކާގެ ސެންޓާސް ފޯ ޑިޒީސް ކޮންޓްރޯލް (ސީޑީސީ) އިން ބުނެފައިވާ ގޮތުގައި ހިމަބިހި ވެކްސިންގެ ދެ ޑޯޒު ޖަހާފައިވާ މީހުންގެ ތެރެއިން 100 އަކުން ތިން މީހަކަށް އެ ބަލި ޖެހިދާނެ އެވެ. އެއީ ކީއްވެގެންކަމެއް ކަށަވަރުކުރެވިފައިނުވާ ކަމަށާއި ނަމަވެސް އޭގެ ސަބަބަކީ އެ މީހެއްގެ ހަށިގަނޑުގެ ދިފާއީ ނިޒާމުން ވެކްސިނަށް އެކަށީގެންވާ މިންވަރަށް އިޖާބަނުދިނުން ކަމަށް ވެދާނެ ކަމަށް ސީޑީސީގެ މައުލޫމާތުގައިވެ އެވެ.

ފާހަގަކޮށްލެވޭ ކަމެއް - ނައްތާލެވިފައިވާ ކަމަށް ގަބޫލުކުރެވޭ ބައްޔެއް އަލުން ރާއްޖެއިން ފެނުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއްޔެ ވަނީ ހިމަބިހީގެ އައުޓްބްރޭކެއް އިއުލާނުކޮށްފަ އެވެ.

ނަމަވެސް ފާހަގަވި ދެ ކުދިންގެ ގައިން ބަލި ފެތުރޭ މުއްދަތު (އިންފެކްޝަސް ޕީރިއަޑް) ފާއިތުވެފައިވާތީ، އެ ދެ ކުދިންގެ ފަރާތުން މިވަގުތު އިތުރަށް ބަލި ޖެހުމުގެ ފުރުސަތު ނެތް ކަމަށް އެޗްޕީއޭ އިން ބުނެފައިވެ އެވެ.

އެޗްޕީއޭއިން ނެރުނު ބަޔާނެއްގައި ބުނީ:

އެޗްޕީއޭގެ އިލްތިމާސަކީ މި އަލާމާތްތައް ފެނިއްޖެ ނަމަ، ލަސްނުކޮށް ސިއްހީ ހިދުމަތްތެރިއެއްގެ ލަފާ ހޯދުމެވެ.