ކޯލިޝަން ހެދުމާ މެދު އެމްޑީޕީގެ ގައުމީ މަޖިލީހުން މިރޭ ގޮތެއް ނިންމަނީ

މި އަހަރު ބާއްވާ ރިޔާސީ އިންތިހާބުގައި އެހެން ސިޔާސީ ޕާޓީތަކާ ކޯލިޝަން ހެދުމާ މެދު ގޮތެއް އެމްޑީޕީގެ ގައުމީ މަޖިލީހުން މިރޭ ގޮތެއް ނިންމުމަށް ހަމަޖައްސައިފި އެވެ.

ވީ ކިހިނެއް؟ - އިއްޒުއްދީން ސްކޫލްގައި މިރޭ 8:30ގައި އެމްޑީޕީގެ ގައުމީ މަޖިލީހުގެ ޖަލްސާއެއް ބޭއްވުމަށް ވަނީ ތާވަލްކޮށްފަ އެވެ. މިދިޔަ މަހު ބޭއްވި އެ ޕާޓީގެ ފޯރިގަދަ ޕްރައިމަރީއަށް ފަހު ބާއްވާ ގައުމީ މަޖިލީހުގެ ފުރަތަމަ ބައްދަލުވުމުގެ އެޖެންޑާ މިހާރު ވަނީ މެންބަރުންނާ ހިއްސާކޮށްފަ އެވެ.

ތަފްސީލު - މި ބައްދަލުވުމުގެ އެޖެންޑާގެ ކޮޕީީއެއް 'ދައުރު'އަށް ލިބިފައި ވާއިރު، އޭގައި އެންމެ މުހިންމު ކަމަކަށް އަޮތީ، ރިޔާސީ އިންތިހާބުގައި އެމްޑީޕީން ވާދަކުރާއިރު، އެހެން ސިޔާސީ ޕާޓީތަކާ އެކު ކޯލިޝަން ހެދުމަށް އެ ޕާޓީތަކާ މަޝްވަރާކުރުމަށް ގައުމީ މަޖިލީހުގައި މަޝްވަރާ ކުރުމެވެ.

އެމްޑިޕީގެ އިސް އޮފިޝަލަކު 'ދައުރު'އަށް ވިދާޅުވީ، މި ބައްދަލުވުމުގައި ކޯލިޝަން ހެދުމާ ގުޅޭ ގޮތުން ގޮތެއް ނިންމާނެ ކަމަށެވެ. އަދި ގައުމީ މަޖިލީހުން މި ނިންމުން ނިންމުމާ އެކު، އެ ޕާޓީގެ ރިޔާސީ ޓިކެޓް ކަށަވަރުކުރައްވައިގެން ހުންނެވި ރައީސް އިބްރާހިމް މުހައްމަދު ސޯލިހަށް ރަސްމީކޮށް ޕާޓީތަކާ އެކު މަޝްވަރާކުރެއްވޭނެ ކަމަށް އޭނާ ވިދާޅުވި އެވެ. 

"ރައީސް ޕާޓީތަކާ އެކު މަޝްވަރާކުރެއްވުމަށް ފަހު، އެ ޕާޓީއަކާ އެކު ކޯލިޝަން ހަދާނީ ވެސް ގައުމީ މަޖިލީހަށް އެކަން ގެނެސް، ގައުމީ މަޖިލީހުން ފާސް ކުރާ ގޮތެއްގެ މަތިން،" އެ އޮފިޝަލް ވިދާޅުވި އެވެ.

އެނގުން މުހިންމު - ވެރިކަމުގެ ދެވަނަ ދައުރަކަށް ކުރިމަތިލެއްވުމުގެ ޝައުގުވެރިކަން ރައީސް އެންމެ ފުރަތަމަ ފާޅުކުރެއްވީ މިދިޔަ ޑިސެމްބަރުގަ އެވެ. އެ ދުވަހު ރައީސް ސޯލިހް ވިދާޅުވީ، އެއްވެސް ޕާޓީއަކަށް އެކަނި އިންތިހާބު ކާމިޔާބުނުކުރެވޭނެ ކަމަށާއި ކޯލިޝަނެއްގެ ތެރެއިން މި ވެރިކަން ދިފާއުކުރެވޭނެ ކަމުގެ ޔަގީންކަން އެ މަނިކުފާނަށް އެބަ އޮތް ކަމަށެވެ. އޭގެ ފަހުން ރައީސް ވަނީ ބައެއް ކޯލިޝަން ލީޑަރުންނާ އެކު ނުރަސްމީ މަޝްވަރާތައް ވެސް ކުރައްވާފަ އެވެ.

ރައީސް ސޯލިހަށް 2018 ވަނަ އަހަރު ވެރިކަން ލިބިވަޑައިގަތީ ވެސް ކޯލިޝަނެއްގެ ތެރެއިންނެވެ. އެ ކޯލިޝަން އަދިވެސް ދެމިއޮތަސް، މިފަހަރުގެ ރިޔާސީ އިންތިހާބުގައި ރައީސްއާ އެކު ކޯލިޝަން ހެދުމަށް އެ ޕާޓީތަކުން އަދި މިހާތަނަށް ނިންމާފައެއް ނުވެ އެވެ.