އައްޑޫ އެއާޕޯޓާއި ބަނދަރު ޕްރައިވެޓައިޒްކުރަން ގޮވާލައި ގަރާރެއް

އައްޑޫގެ އެއާޕޯޓާއި ބަނދަރު އަމިއްލަ ފަރާތަކަށް ކުއްޔަށް ދިނުމަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.

ވީ ކިހިނެއް؟ - ހިތަދޫ ދެކުނު ދާއިރާގެ މެމްބަަރު އަހުމަދު ރަޝީދު ހުށަހެޅުއްވި އެ ގަރާރުގެ ފުރަތަމަ ކިއުން އިއްވީ މިއަދު ބޭއްވި ރައްޔިތުންގެ މަޖިލީހުގެ ޖަލްސާގަ އެވެ.

ތަފްސީލް - އެ ގަރާރުގައި އަހުމަދު ރަޝީދު ވިދާޅުވީ އައްޑޫ ސަރަހައްދުގައި ފަތުރުވެރިކަން ކުރިއަރުވައި އެ ޒޯންގައިވާ އެހެން އަތޮޅުތައް ހިމެނޭ ގޮތަށް ހަބެއްގެ ގޮތުގައި ތަރައްގީކުރެވޭނީ އައްޑޫ އެއާޕޯޓާއި އައްޑޫ ރީޖަނަލް ސީޕޯޓް ތަރައްގީކޮށް، އެއާޕޯޓާއި ސީޕޯޓާއި އަދި ޓޫރިޒަމާ ކަނެކްޓިވިޓީ އިތުރުކޮށްގެން ކަމަށެވެ. އެ ތަންތަން ތަރައްގީކުރުމަށް ގިނަ މަސައްކަތްތަކެއް ކުރަން ޖެހޭކަން ފާހަގަކުރައްވައި އޭނާ ވިދާޅުވީ އެ ކަމަށް ބޮޑު ހަރަދެއް ހިނގާނެ ކަމަށް ބެލެވޭ ކަމަށް ވެސް އެ މައްސަލައިގައި ވިދާޅުވެފައިވެ އެވެ. 

"ދުނިޔެއަށް ދިމާވެފައިވާ ކޮވިޑް-19ގެ ހާލަތުން އަރައިގަނެ މި ދަނޑިވަޅުގައި ސަރުކާރުން މި ޕްރޮޖެކްޓުތަކަށް ފައިސާ ހޯދުމަށް ދަތިވާނެ ކަމަށް ބެލެވޭ،" ގަރާރުގައި އޭނާ ފާހަގަކުރެއްވި އެވެ.

އަހުމަދު ރަޝީދު ވިދާޅުވީ، އައްޑޫ އެއާޕޯޓާއި އައްޑޫ ރީޖަނަލް ސީޕޯޓް ސްޓްރެޓެޖިކް ޕާޓްނަޝިޕް އަދި ޕަބްލިކް ޕްރައިވެޓް ޕާޓްނަޝިޕްގެ އުސޫލުން ޕްރައިވަޓައިޒްކޮށްފި ނަމަ:

"ވީމާ އައްޑޫ އެއާޕޯޓާއި އައްޑޫ ރީޖަނަލް ސީޕޯޓް ސްޓްރެޓީޖިކް ޕާޓްނަޝިޕް އަދި ޕަބްލިކް ޕްރައިވެޓް ޕާޓްނަޝިޕްގެ ދަށުން ޕްރައިވެޓައިޒްކުރުމުގެ އޮޕްޝަންތަކަށް ރިއާޔަތްކޮށް މީގެ ތެރެއިން އެންމެ ފައިދާވާނެ ގޮތަކަށް ޕްރައިވަޓައިޒްކުރުމަށް އެދި ގޮވާލައި ރައްޔިތުންގެ މަޖިލީހުގެ 167 ވަނަ މާއްދާގެ ދަށުން މި ގަރާރު ހުށަހަޅަމެވެ،" މެމްބަރު ވިދާޅުވި އެވެ.

އެނގުން މުހިންމު - ސަރުކާރުގެ ކުންފުނިތައް ޕްރައިވެޓައިޒް ކުރަން މި ސަރުކާރުން މަސައްކަތް ކުރި ނަމަވެސް، ރަޝިޔާ-ޔޫކްރެއިން ހަނގުރާމައިގެ ސަބަބުން އިގްތިސާދު ދަށަށް ދާތީ ޕްރައިވެޓައިޒޭޝަން ސިޔާސަތު މަޑުޖައްސާލަން ސަރުކާރުން ވަނީ ނިންމައިފަ އެވެ. ސަރުކާރުން ބުނަނީ މި ދަނޑިވަޅުގައި ކުންފުނިތައް ޕްރައިވެޓައިޒް ކުރަން އުޅެފި ނަމަ އެކަން ކުރަން ޖެހޭނީ ނުއަގުގައި ކަމަށެވެ.

ގުޅުންހުރި ކަމެއް - އަހަރަކު 1.5 މިލިއަން ފަސިންޖަރުން ހިދުމަތް ދެވޭ ފެންވަރަށް އައްޑޫ ގަން އިންޓަނޭޝަނަލް އެއާޕޯޓު ތަރައްގީކުރާ މަޝްރޫއުގެ ބީލަކަށް ހުޅުވާލީ މިދިޔަ އޮކްޓޯބަރުގަ އެވެ. ގަން އެއާޕޯޓު ތަރައްގީކުރުމުގެ މަޝްރޫއު މިދިޔަ އަހަރުގެ ފަހުކޮޅު ފަށާނެ ކަމަށް ސަރުކާރުން މީގެ ކުރިން ބުނި ނަމަވެސް، އެ މަސައްކަތް އަދި އޮތީ އެވޯޑް ކުރުމުގެ މަރުހަލާގަ އެވެ.