ފުލުހުން ރަށަށް އެރިއިރު ތިބީ ވެލާ ފަޅައިގެން ކައްކަން

ބ. އަތޮޅު ފަޅުރަށެއްގައި ވެލާތަކެއް ފަޅައި ކައްކަން ތިބި ބަޔަކު އިއްޔެ ފުލުހުންނަށް ފެނިއްޖެ އެވެ.

ވީ ކިހިނެއް؟ - ބ. ކެޔޮދުއަށް އިއްޔެ ހަވީރު ފުލުހުން އެރީ، އެ ރަށުގައި ވެލާ ފަޅާ ކަމުގެ މައުލޫމާތު ލިބިގެންނެވެ. 'ދައުރު'އަށް އެނގިފައިވާ ގޮތުގައި، ފުލުހުން އެ ރަށަށް އެރި އިރު، އެ މީހުން ތިބީ ވެލާ ފަޅައި އޭގެ ތެޔޮކުނޑި ކައްކާށެވެ.

ތަފްސީލު - ފުލުސް އޮފީހުން މިއަދު ބުނި ގޮތުގައި، އެ މައްސަލައިގައި އެއްވެސް މީހަކު ހައްޔަރެއް ނުކުރެ އެވެ. އެކަމަކު  ބަލަން ޖެހޭ ކަންކަން ބެލުމަށް ފަހު އެކަން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އާ ހިއްސާކޮށްފައިވާ ކަމަށް ފުލުހުން ބުންޏެވެ.

"އަޅުގަނޑުމެން މި ދަނީ މައްސަލަ ތަހުގީގުކުރަމުން،" ފުލުހުންގެ އޮފިޝަލަކު ވިދާޅުވި އެވެ. 

މިކަމާ ގުޅޭ ގޮތުން އީޕީއޭގެ ރަސްމީ ބަހެއް އަދި ނުލިބެ އެވެ.