ހއ. އުލިހަމު: އެރަށުގައި ކުއްޖެެއްގެ ގައިމައްޗަށް ގޯލް ޕޯސްޓް ވެއްޓި ނުވަ އަހަރުގެ ކުއްޖަކު ވަނީ މަރުވެފައި (ފައިލް ފޮޓޯ/ މިހާރު)
އުލިގަމުގައި ފުޓްބޯޅަ ކުޅެނިކޮށް ގޯލް ޕޯސްޓް ވެއްޓި ކުއްޖަކު މަރުވެއްޖެ
ހއ. އުލިގަމުގައި ފުޓްބޯޅަ ކުޅެން އުޅުނު ކުއްޖެއްގެ ގައި މައްޗަށް ގޯލު ޕޯސްޓް ވެއްޓި އެ ކުއްޖާ މަރުވެއްޖެ އެވެ.
ވީ ކިހިނެއް؟ - ފުލުހުން ބުނީ އެ ހާދިސާ ހިނގީ މިއަދު ހަވީރު 5:50 އެހާއިރު ކަމަށެވެ. އެގޮތުން ބުނީ:
-
ގޯލް ޕޯސްޓް ވެއްޓުނީ ނުވަ އަހަރުގެ ކުއްޖެއްގެ ގައި މައްޗަށް
-
އެ ކުއްޖާ މަރުވީ އުލިގަމު ހެލްތް ސެންޓަރުގައި ފަރުވާ ދެމުން ދެނިކޮށް
-
އެ ހާދިސާ ހިނގީ އެ ރަށުގެ ފުޓްސެލް ދަނޑުގައި
ތަފްސީލް - އުލިގަމުގެ ކައުންސިލް މެންބަރު އަހުމަދު އަބޫބަކުރު 'ދައުރު'އަށް މިއަދު ވިދާޅުވީ އެ ކުއްޖާ މަރުވީ ގޯލް ޕޯސްޓް އެ ކުއްޖާގެ ކަނދުރާ އަދި ބޯ މައްޗަށް ވެއްޓިގެން ކަމަށެވެ.
"ބޭރު ފުށުން މާ ބޮޑު އަނިޔާއެއް ނެތް. އެކަމަކު ނޭފަތުން ލޭ އައިސްފައި ހުރީ،" އޭނާ ވިދާޅުވި އެވެ.
މަންޒަރު ދުށް މީހަކާ ހަވާލާދީ އެރަށުން ވާހަކަ ދެއްކި އިތުރު މީހަކު ބުނީ، ގޯލު ދަނޑި ވެއްޓުނީ މަރުވި ކުއްޖާ ގޯލުގައި އެލިގަތް ވަގުތު ކަމަށެވެ.
"ގޯލު ވެއްޓެން އުޅެގަތީމައި އޭނާ ދުއްވައި ވެސް ގަތް. ދުއްވައިގަތް ތަނުން ގޯލުގެ ދަގަނޑު އައިސް ޖެހުނީ ކަނދުރާގައި. ނޭފަތާއި ކަންފަތުންވެސް ލޭ އައި،" ރަށު މިސްކިތުގައި މަސައްކަތް ކުރާ މުހައްމަދު ވަހީދު ބުންޏެވެ.