ޔޯގާ ހަމަނުޖެހުމުގައި އިދިކޮޅުގެ ބައިވެރިވުމެއް ނެތް: އީސީ

ބައިނަލްއަގުވާމީ ޔޯގާ ދުވަސް ފާހަގަކުރަން މިދިޔަ ޖޫން މަހު ގަލޮޅު ދަނޑުގައި އޮތް ހަރަކާތާ ދެކޮޅަށް ބޭއްވި އެއްވުމުގެ ބައިވެރިން އެ ތަނަށް ވަދެގަނެ ހިންގި ހަމަނުޖެހުމުގައި އިދިކޮޅު ޕީޕިއެމް- ޕީއެންސީގެ ބައިވެރިވުމެއް ނެތް ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.

މައްސަލައިގެ ފެށުން - ސަރުކާރުގެ އިސް ބައެއް ވެރިންނާއި ބޭރު ގައުމުތަކުގެ ޑިޕްލޮމެންޓުން ގަލޮޅު ދަނޑުގައި ތިއްބަވަނިކޮށް ބަޔަކު ވަދެގަތީ މި ހަރަކާތާ ދެކޮޅަށް އަޑުއުފުލުމަށް އެ ތަނުގެ ބޭރުގައި ގިނަ އިރުތަކެއް ވަންދެން ތިބުމަށް ފަހު އެވެ. ދަނޑުތެރެއަށް ވަދެގަތް މީހުންގެ ތެރެއިން ބަޔަކު ވަނީ އެތާ ތިބި ބައެއް މީހުންނަށް ހަމަލާދީ، ބައެއް ސާމާނަށް ވެސް ގެއްލުން ދީފަ އެވެ.

ބުނީ ކީކޭ؟ -'ދައުރު'ން ސުވާލުކުރުމުން އީސީގެ ރައީސް ފުއާދު ތައުފީގް މިއަދު ވިދާޅުވީ، ޕީޕީއެމްގެ ބައެއް މެމްބަރުން އެ ހަމަނުޖެހުމުގައި ބައިވެރިވިކަން އެނގުނު ނަމަވެސް، އެއީ އެ ޕާޓީގެ ލީޑާޝިޕުން ތަރުހީބުދީގެން ކުރި ކަމެއްކަން ސާބިތުނުވާ ކަމަށެވެ.

"ޕާޓީއަށް [ޕީޕީއެމް] ނިސްބަތްވާ ބައެއް މީހުން އެކަމުގައި އުޅުނުކަން އެނގޭ. އެކަމަކު އެއީ ޕާޓީގެ ލީޑާޝިޕުން ބާރުއަޅައިގެން ކުރިކަމެއް ކަމެއް ސާބިތެއް ނުވޭ،" ފުއާދު ވިދާޅުވި އެވެ.

"އެއްވެސް ޕާޓީއެއްގެ ބައިވެރިވުމެއް ނެތް."

އެނގުން މުހިއްމު - މި މައްސަލައިގައި 23 މީހަކު ހައްޔަރު ކުރި ނަމަވެސް، ޕީޖީ އޮފީހުން މި މަހުގެ ކުރީކޮޅު ދައުވާކުރަން ފޮނުވީ 18 މީހަކަށެވެ. މި މައްސަލައިގައި ތުހުމަތު ކުރެވުނު އެންމެ ހައިޕްރޮފައިލް މީހުންގެ ތެރޭގައި ހިމެނޭ ޕީޕީއެމްގެ އިސްމާއީލަށް ޕީޖީން ވަނީ ޓެރަރިޒަމްގެ އަމަލެއް ހިންގުމުގައި ބައިވެރިވުމާއި އަދުލު އިންސާފަށް ހުރަސް އެޅުމުގެ ދައުވާ އުފުލާފަ އެވެ.