ވާހަކަ ދައްކަން އުނދަގޫ ކުދިންނަށް އެހީވާން ގިޔާސުއްދީން ކުދިންތަކެއް އެޕެއް ހަދައިފި

ވާހަކަ ދެއްކުމުގެ އުނދަގޫތައް ހުންނަ ކުދިންނަށް އެހީވުމަށް، ގިޔާސުއްދީން އިންޓަނޭޝަނަލް ސްކޫލުގެ ދަރިވަރުންތަކެއް އެޕްލިކޭޝަނެއް ފައްކާކޮށްފި އެވެ. 

ވީ ކިހިނެއް؟- ސްކޫލުގެ ގްރޭޑް ފަހެއްގެ ދަރިވަރުންތަކެއް ހެދި އެ އެޕް ދައްކާލާފައިވަނީ، އާޓިފިޝަލް އިންޓަލިޖެންސް ނުވަތަ އޭއައި ބޭނުންކޮށްގެން އެކިކަންކަން ކުރުމަށް ހާއްސަ ކުރި ސްކޫލު ސައިންސް ފެއާގަ އެވެ. އަށް ދަރިވަރުންގެ ބައިވެރިވުން ހިމެނޭ މި އުފެއްދުމަށް ވަނީ ދެ ވަނަ ލިބިފަ އެވެ.

'ބުނެލާ' ނަމުގައި ހެދި މި އެޕްގެ މައިގަނޑު ހިޔާލު އައިސްފައިވަނީ، ދަރިވަރަކު، އޭނާގެ އޯޓިސްޓިކް ކޮއްކޮއަށް ވާހަކަ ދެއްކުމުގައި އެހީވުމުގެ ތެރެއިންނެވެ. ވާހަކަ ދެއްކުމުގައި އުނދަގޫތައް ހުންނަ ކުދިން، ގިނަ ފަަހަރު ބޭނުންކުރަނީ އެ ކުދިން ބޭނުންވާ ކަންކަން ދައްކައިދޭ ފޮތެވެ. ހަމައެކަނި ފޮޓޯ ހުންނަ އެ ފޮތުން، ކުއްޖާ ބޭނުންވާ ކަންކަން ދެނެގަންނަނީ އެވެ.

ގިޔާސުއްދީން ސްކޫލު ކުދިންގެ އެޕްލިކޭޝަން މައިގަނޑު ގޮތެއްގައި ބިނާކޮށްފައިވަނީ އެ ފޮތުން ފެންނަ ގޮތަށެވެ. ކުއްޖާ ބޭނުންވާ ކަންކަން ފޮޓޯއިން ފެންނަ ގޮތަށް ބަހައްޓައި، އެއަށް ކުއްޖާ އޮބާލުމުން ދިވެހިން އެ ވާހަކައެއް ބުނެލަ އެވެ.

"މިސާލަކަށް ކުއްޖާ ބުނަން ބޭނުންވީ، އަހަރެން މިހިރީ ބަނޑުހައިވެފައޭ،" އެޕް ހެދި ދަރިވަރެއްގެ ބެލެނިވެރިޔަކު ކިޔައިދިނެވެ.

"ދެން އެޕްގައި 'އަހަރެންނަށް' އިންނާނެ ވަކި ފޮޓޯއެއް ފެންނަން. ' މިހިރީ'އަށް ވަކި ފޮޓޯއެއް. 'ބަނޑުހައިވެފައި' ހުންނަތަން ފެންނަ ވަކި ފޮޓޯއެއް. ދެން އެ ކުއްޖާ އެ ފޮޓޯތަކަށް އޮބާލުމުން، އޭއައި މެދުވެރިވެގެން ދިވެހި ބަހުން ބުނާނެ އެ ވާހަކައެއް."

އެ އެޕްލިކޭޝަނަށް އަޑުއަޅާފައިވަނީ ވެސް އެކަމުގައި ބައިވެރިވި ދަރިވަރެކެވެ.

ސްކޫލުގެ މި ޕްރޮޖެކްޓު ދަރިވަރުން ފުރިހަމަކޮށްފައިވަނީ ދިރާސާތަކެއް ކުރުމަށް ފަހު އެވެ. އެގޮތުން ސްޕީޗް ތެރަޕިސްޓުންނާއި އެ ފަދަ ކްލިނިކްތަކާ ވާހަކަ ދައްކައި، ކުދިންގެ އުނދަގޫތައް ދެނެގަތެވެ. އަދި ރާއްޖޭގައި އެ ފަދަ ކުދިން ތިބި ނިސްބަތާއި މި ފަދަ އެޕެއް ހަދައިފި ނަމަ، އޭގެ ފަސޭހަ ކުދިންނަށް ލިބިދާނެ މިންވަރު ހޯދި އެވެ.

ދަރިވަރުން ހޯދި މި މައުލޫމާތުތަކުގެ މައްޗަށް ބިނާކޮށް، އެޕްލިކޭޝަން ހެދީ އެޕް ޑިވެލޮޕަރު އިބްރާހިމް އަމީރެވެ. އެކަމަކު ދަރިވަރުން ވެސް އެކަމުގައި އަމަލީ ގޮތުން ބައިވެރިވެ، އޭއައި މެދުވެރިކޮށް އެ މަސައްކަތް ކުރާގޮތް ކުދިން ވަނީ ދަސްކޮށްފަ އެވެ.

މިއީ ސައިންސްފެއާ އަކަށް ހެދި އެއްޗަކަށްވުމުން، އެޕްލިކޭޝަން މިހާރު އޮތީ ވަރަށް އާދައިގެ ގޮތަކަށެވެ. އޭގައި ހިމަނާފައިވަނީ ކުދިން ބޭނުންވާ އެންމެ އާއްމު ކަންކަމެވެ. އެކަމަކު ދަރިވަރުންގެ ވިސްނުމަކީ އަމީރުގެ އެހީގައި އެ އެޕްލިކޭޝަން އިތުރަށް ތަރައްގީކޮށް، މޮޅުކޮށްލުމެވެ.