ޝިމްހާގެ މައުރަޒު 'އުތީމު އެކޯސް' ގައުމީ އާޓް ގެލެރީއަށް

ޝިމްހާ ޝަކީބުގެ މައުރަޒު 'އުތީމު އެކޯސް' މިދިޔަ ހުކުރު ދުވަހު ގައުމީ އާޓް ގެލެރީގައި އާއްމުންނަށް ވަނީ ހުޅުވާލައިފަ އެވެ. 

ފެންކުލައިން ތައްޔާރުކޮށްފައިވާ 21 ކުރެހުމެއް ހިމެނޭ 'އުތީމު އެކޯސް' ފުރަތަމަ ދައްކާލީ މިދިޔަ ސެޕްޓެމްބަރު މަހު ހއ. އުތީމުގެ ބޮޑުތަކުރުފާނު މެމޯރިއަލް ސެންޓަރުގައި ގައުމީ ދުވަހަށް ހާއްސަކޮށްގެން ބޭއްވި މައުރަޒެއްގަ އެވެ. އެ ކުރެހުންތަކުން ފެންނަނީ އުތީމުގެ ހިތްގައިމުކަމެވެ. ޝިމްހާ ބުނިގޮތުގައި އޭނާ ބޭނުންވީ އެ ރަށުގެ ތާރީހާއި ގުދުރަތީ ރީތިކަން ދައްކައިދޭށެވެ.

މާލޭގައި ކުރިއަށްދާ މައުރަޒުގައި 30 ކުރެހުމެއް ޝިމްހާ ދައްކާލަ އެވެ. އެ މައުރަޒުން ފެންނަނީ ހަމައެކަނި އުތީމަށް ހާއްސަ ހިތްގައިމުކަމެއް ނޫނެވެ. އެއީ ކޮންމެ ދިވެއްސަކަށް ވެސް ފޮނި ހަނދާންތަކެއް ގެނެސްދޭނެ ފަދަ މަންޒަރުތަކެކެވެ.

ދޯންޏަކުން މުދާ ބާލާ މަންޒަރާއި ވާރޭ ވެހިފައިވާ މަންޒަރު އަދި ރަށެއްގެ ހަނި، ތާރުނާޅާ މަގެއްގެ ބިންގަނޑުގައި ޗަކަ ހެދިފައިވާ މަންޒަރު ޝިމްހާ ކުރަހާފައިވެ އެވެ. ދޯންޏެއް ބަނދެފައި އޮންނަ މަންޒަރާއި އިހު ޒަމާނުގައި ދިވެހިން މަސް ކައްކާ އުޅުނު ގޮތް ދައްކައިދޭ ކުރެހުންތަކަކީ މިހާރު ރާއްޖެއަށް އައިސްފައިވާ ތަރައްގީގެ ބަދަލުތަކާ އެކު ދިވެހިންގެ ތެރެއިން ނެތެމުންދާ މަންޒަރުތަކެކެވެ. 

ޝިމްހާ ބުނިގޮތުގައި މި މައުރަޒަށް ކުރެހުންތައް ތައްޔާރު ކުރަން ފެށީ މި އަހަރުގެ ޖެނުއަރީގަ އެވެ. އެކަމަކު އެންމެ ފަހު ތިން މަސް ދުވަހަކީ މަސައްކަތް އެންމެ ބުރަ ދުވަސްތައް ކަމަށް އޭނާ ބުންޏެވެ.

ޝިމްހާ ވަނީ ހއ. އުތީމަށް ހަތަރު ފަހަރަކު ޒިޔާރަތް ކޮށްފަ އެވެ. އެއީ ތާރީހީ ރަށަކަށް ވެފައި ގުދުރަތީ ގޮތުން ވެސް އެހާމެ ރީތި ރަށެއްކަން އޭނާ ފާހަގަކުރި އެވެ. މައުރަޒުގައި ހިމެނޭ ކުރެހުންތަކަކީ ޝިމްހާއަށް ރަށުތެރެއިން ފާހަގަވި ބައެއް މަންޒަރުތަކެވެ.

ގައުމީ އާޓް ގެލެރީގައި މައުރަޒު ހުޅުވުމުގެ ރަސްމިއްޔާތުގައި ގިނަ އަދަދެއްގެ އާޓިސްޓުންގެ އިތުރުން ނެޝަނަލް ސެންޓާ ފޯ ދި އާޓްސް (އެންސީއޭ) އާއި ގެލެރީގެ އިސްވެރިންނާއި މައުރަޒުގެ ޝަރަފުވެރި މެހުމާނު، ކުރީގެ އާޓްސް މިނިސްޓަރު ޔުމްނާ މައުމޫން ވެސް ބައިވެރިވެވަޑައިގަތެވެ. 

'އުތީމު އެކޯސް' ގައުމީ އާޓް ގެެލެރީގައި ކުރިއަށްދާނީ މި މަހުގެ 28ގެ ނިޔަލަށެވެ.