ކުޅުދުއްފުށީގައި ހިތްގައިމު ޕަބްލިކް ލައިބްރަރީއެއް

ހދ. ކުޅުދުއްފުށީގެ ކައުންސިލުން އެ ރަށުގައި ނޮލެޖް ސެންޓަރެއް ގާއިމްކޮށް އެތަނުގައި 2،000 އަށް ވުރެ ގިނަ ފޮތާ އެކު ކުތުބުހާނާއެއް ހުޅުވައިފި އެވެ.

ކުޅުދުއްފުށީ ސިޓީ ކައުންސިލްގެ ސެކްރެޓަރީ ޖެނެރަލް އަބްދުﷲ އާދަމް ވިދާޅުވިގޮތުގައި ކައުންސިލުގެ ބަޖެޓުން 2 މިލިއަނަށް ވުރެ ގިނަ ރުފިޔާ ހަރަދުކޮށްގެން ހެދި ނޮލެޖު ސެންޓަރުގައި ކުތުބުހާނާގެ އިތުރުން ދެ ސްޓަޑީ ރޫމާއި ނަފްސާނީ އެހީތެރިކަން ބޭނުންވާ މީހުންނަށް ހާއްސަ ވެލްނެސް ރޫމެއް ވެސް ވަނީ ގާއިމުކޮށްފަ އެވެ.

ރަށުގެ ރައްޔިތުންގެ ފަރާތުން ވަރަށް ބޮޑު ތަރުހީބެއް ލައިބްރަރީއަށް ލިބެމުން އަންނަ ކަމަށް އާދަމް ވިދާޅުވި އެވެ.

ކުޅުދުއްފުއްޓަކީ ކިޔެވުމަށް ކައިރި ރަށްރަށުން ދަރިވަރުން ހިޖުރަ ކުރާ ރަށެކެވެ. ގައުމީ ޔުނިވާސިޓީ އާއި ވިލާ ކޮލެޖާއި މައި ކޮލެޖްގެ ކެމްޕަސްތައް އެ ރަށުގައި ހުރެ އެވެ.

ކައުންސިލްގެ އޮނިގަނޑަށް ބަދަލު ގެނެސްގެން، ކުތުބުހާނާގައި މަސައްކަތް ކުރުމަށް ހަތަރު މުވައްޒަފަކު ވަނީ ހަމަޖައްސާފަ އެވެ. 

ހުކުރު ދުވަސް ފިޔަވައި ހުރިހާ ދުވަހަކު ހިދުމަތް ދޭ ގޮތަށް ހުޅުވި މި ކުތުބުހާނާގައި ހިމެނެނީ ހައި ކޮމިޝަންތަކުގެ އެހީގައި އަދި މާލެ އާއި އެ ރަށުގައި ތިބި ހެޔޮ އެދޭ ފަރާތްތަކުން ހޯދާފައިވާ ފޮތްތަކެވެ.

މިއީ ސަރުކާރުގެ ޕީއެސްއައިޕީ ޕްރޮޖެކްޓެއްގެ ދަށުން ކުޅުދުއްފުށީގައި އަޅައި ބޭނުންނުކޮށް ހުންނަތާ 10 ވަރަކަށް އަހަރުވެފައިވާ އިމާރާތެއްގައި ހެދި ކުތުބުހާނާއެކެވެ. އާދަމް ވިދާޅުވިގޮތުގައި އެ އިމާރާތް އެޅީ ރަށުގައި ހައްދާ ތަކެތި ވިއްކާ މާރުކޭޓެއްގެ ގޮތުގައި ބޭނުން ކުރުމަށެވެ.

"އެކަމަކު މާކެޓަކީ އެގޮތަށް ބަންދު ތަނެއްގައި ހުންނަން ޖެހޭ ތަނެއް ނޫން. އޯޕަން ސްޕޭސްއެއް ބޭނުންވާ ތަނެއް. ފަހުން ކޮވިޑް-19ގައި އިމާރާތް ކުޅުދުއްފުށީ ހޮސްޕިޓަލުން ބޭނުން ކުރީ ފުލޫ ކްލިނިކެއްގެ ގޮތުގައި،" އޭނާ ވިދާޅުވި އެވެ.

ކައުންސިލްގެ ނިންމުމަކަށްވީ ދަރިވަރުންގެ އާބާދީ ބޮޑު އެ ރަށުގައި އާއްމުންނަށް ފައިދާހުރި ގޮތަކަށް އެ އިމާރާތް ބޭނުން ކުރުމެވެ.

"އަޅުގަނޑުމެން މި ތަން ހެދުމުގެ ކުރިން ފޯކަސް ގުރޫޕްގެ ގޮތުގައި ޒުވާނުންނާ ވާހަކަ ދައްކައިގެން އެ މީހުން އެންމެ ބޭނުން ގޮތަށް މިތަން ޑިޒައިން ކޮށްފައި ވާނީ. އެ މީހުންގެ މަޝްވަރާ އަކަށްވީ މާލޭގައި ތިބޭ ކައުންސެލަރުންނާއި ސައިކޮލޮޖިސްޓުންނާ އެކު އެކު އޮންލައިން ކޮންސަލްޓޭޝަންތައް ކުރިއަށް ގެންދިއުމަށް ޕްރައިވެސީ ލިބޭނެ ފަދަ ތަނެެއް ނުހުންނާތީ އެފަދަ ތަނެއް ހަދައިދިނުން،" އާދަމް ވިދާޅުވި އެވެ.

އާދަމް ވިދާޅުވިގޮތުގައި މިތަން އިތުރަށް ތަރައްގީކޮށް ރަށުގެ ޒުވާން އާބާދީއަށް ފޮތް ކިޔުމަށް ހިތްވަރުދީ، އިލްމު ހޯދުމަށް މަގުފަހި ކޮށްދިނުމަކީ ކައުންސިލްގެ އަމާޒެކެވެ.

އައުޓްޑޯ ރީޑިން ޕާކަކާއި ދާރުލްއާސާރެއްގެ އިތުރުން މެންޓަލް ހެލްތު ހެޑް ސްޕޭސްއެއް ހެދުމަށް ވެސް ކައުންސިލުން އަންނަނީ ރާވަމުންނެވެ.