ފިރިމީހާ ގޭމު ކުޅޭތީ ކައިވެންޏަށް އަަސަރު ކުރޭތަ؟

ޒުވާން އަންހެނަކު އޭނާގެ ކައިވެނި ރޫޅެން މެދުވެރި ގޮތް ކިޔައިދިނެވެ. ރައްޓެހިވެގެން އުޅެފައި މާ ގިނަ ދުވަހެއް ނުވެ ކައިވެނި ކުރީ ވަރަށް ލޯބިންނެވެ. ކައިވެނި ކުރި އިރު ފިރިހެން މީހާގެ ވަޒީފާއެއް ނެތެވެ. ދެ މީހުންނަކީ ވެސް މާލޭ މީހުންނަށް ވެފައި މާލޭގައި މައިންބަފައިންގެ ގެ ހުންނާތީ ވަޒީފާއެއް ނެތަސް ދިރިއުޅެން އުނދަގުލެއް ނެތެވެ.

އެކަމަކު މައްސަލަ އަކަށްވީ މިކަމެވެ. އަންހެންމީހާ ކޮންމެ ދުވަހަކު ތެދުވެގެން އޮފީހަށް ދާން ތައްޔާރުވާއިރު އޭނާގެ ފިރިމީހާ ހުންނަނީ މުޅި ރޭ ހޭލާ ގޭމް ކުޅޭށެވެ. ހެޑްސެޓް އަޅައިގެން އަބަދު ގޭމް އަޅުވައިގެން ހުންނަ އިރު ދުވަހަކު ވާހަކަ ދައްކާލާނެ ފުރަސަތެެއް ނެތެވެ.

ގޭމް ކުޅެން އިންނަނީ ވެސް ދެމަފިރިން ނިދާ ކޮޓަރީގައި ކޮމްޕިއުޓަރެއް ބަހައްޓައިގެންނެވެ. އަންހެންމީހާ އޮފީސް ނިންމާލާފައި ގެއަށް އަންނަ އިރު ފިރިމީހާ އޮންނަނީ ނިދާފަ އެވެ. އިރުއޮއްސެން ކައިރިވާ އިރަށް ކިރިޔާ ލޯ ފެންނަނީ އެވެ. ރޭގަނޑުވުމުން އަނެއްކާވެސް ގޭމެވެ.

ޒުވާން އުމުރުގައި ކައިވެނިކުރީ އުއްމީދާ އެކު އެވެ. އެކަމަކު މި ކައިވެނީގައި ކުޅިފަސް ހޯދީ ގޭމެވެ. އަންހެންމީހާ ވަރިވީ އެވެ.

އެހެން މީހަކު ބުންޏެވެ. އޭނާގެ ފިރިމީހާ ގޭމަށް އަވަލާފައި ހުންނަވަރުން 24 ގަޑި އިރުގެ މަސައްކަތަކީ އެއީ އެވެ. އެއް ތަނުން އަނެއް ތަނަށް ދާ އިރު ސައިކަލު ޕާކުކޮށްފައި ހުންނަ ތަނަށް ދެވެންދެން ވެސް އަތުގައި އޮންނަ  މޮބައިލް ފޯނާއި ގޭމުގަ އެވެ.

މިއީ ދެ މީހެއްގެ ތަޖުރިބާ އެވެ. އެކަމަކު، މި ބުނަނީ ގޭމް ކުޅޭ ކޮންމެ މީހެއްގެ ކައިވެނި ރޫޅޭނެއެކޭ ވެސް ނޫނެވެ. ބައިވެރިޔާއަކީ ގޭމަށް ދެވިހިފާފައިވާ މީހެއް ނަމަ، އަދި އޭނާ ކުރަންޖެހޭ އެހެން ކަންކަން ނުކޮށް ގޭމަށް ގެއްލިފައި ހުންނަ ނަމަ ދެމަފިރިން ދޭތެރޭ މައްސަލަ ޖެހެން މެދުވެރިވެ އެވެ.

ހުރިހާ ހުސް ވަގުތެއް ގޭމަށް ދޫކޮށްލުމުގެ ބަދަލުގައި ބައިވެރިޔާއާ އެކު ވަގުތު ހޭދަ ކުރާށެވެ. އެކީގައި ތަންތަނަށް ގޮސް ރައްޓެހިންނާ ބައްދަލުކޮށް ހަދާށެވެ. ކޮފީއަށް ގޮސް، ކާން ގޮސް ވެސް ހަދާށެވެ. އެކީގައި ވަގުތު ހޭދަކުރުމަކީ ހަމައެކަނި ބޭރަށް ދިއުމެއް ވެސް ނޫނެވެ. ގޭތެރޭގައި ވެސް ބައިވެރިޔާއަށް ވަގުތު ދޭށެވެ. އޭނާގެ ދުވަސް ހޭދަވި ގޮތް އޮޅުންފިލުވައި ސަމާލުކަން ދީ ހަދާށެވެ.

ބައިވެރިޔާއަށް އޭނާއަކީ ތިމާގެ ހަޔާތުގެ މުހިއްމު ބައެއްކަން އިހްސާސް ކުރެވެން ޖެހެ އެވެ. ބައިވެރިޔާގެ ފަރާތުން އަޅާލުން، ލޯބި، އަދި އޭނާއާ ކޮންމެ ވަގުތެެއްގައި ވެސް ކަންކަން ހިއްސާ ކުރެވޭނެކަމުގެ ޔަގީންކަން އޮންނަންވެ އެވެ.

ކައިވެންޏެއް ކޮށް ދިރިއުޅުން ބިނާ ކުރުމަށް ކުރާ މަސައްކަތަކީ ދެ މީހުންގެ ވެސް ހިއްސާ އެއްވަރަކަށް އޮންނަންވާ ކަމެކެވެ. އެކަކު ދިރިއުޅުން ބިނާ ކުރުމަށް އަބަދު މަސައްކަތް ކުރާ އިރު އަނެކަކު ވަޒީފާއަށް ނުގޮސް ގޭގައި ގޭމް ކުޅެން އިނުން އެއީ ގޯހެކެވެ. 

ފިރިހެނުންނެކޭ އެއްގޮތަށް ގޭމް ކުޅޭ އަދި ގޭމަށް ދެވިހިފާފައި ތިބޭ އަންހެނުން ވެސް އުޅެ އެވެ. ދިރާސާތައް ބުނާ ގޮތުގައި ދެމަފިރިންގެ ތެރެއިން އެކަކު ގޭމަށް ދެވިހިފާފައިވާ ނަމަ، ކުދިކުދި މައްސަލަތައް ޖެހުން އިތުރުުވެ އެވެ. ކުދި ކަންކަން ވެސް ބޮޑެތި މައްސަލަތަކަށް ބަދަލުވުމުގެ ފުރުސަތު ބޮޑުވަނީ ގޭމަށް ގެއްލިފައި ހުންނާތީ ބައިވެރިޔާއާ ވާހަކަ ދައްކަން ވަގުތު ނުދެވޭތީ އެެވެ.

އެކަމަކު ގޭމް ކުޅުމަކީ ކުރަން ހުންނަ ކަންކަން ކޮށްފައި ހިތްހަމަޖައްސާލުމަށް ކުރާ ކަމެއް ނަމަ، އޭގެ މާ ބޮޑު މައްސަލައެއް ނެތެވެ. 

ބައިވެރިޔާ ގޭމު ކުޅުމާ މެދު އަބަދު ޝަކުވާ ކުރަން ޖެހުމަކީ ތިމާއަށާއި އޭނާއަށް ވެސް ފަސޭހަ ކަމެއް ނޫނެވެ. އަބަދު ގޭމް ކުޅޭތީ ކިތަންމެ ވަރަކަށް އެކަމާ ޝަކުވާކޮށް ހެދިޔަސް އަނެކާ ގުޑާނުލާ ނަމަ މިކަމުގެ ސަބަބުން ތިމާއަށް ނަފްސާނީ ގޮތުން އަސަރުތަކެއް ކުރެ އެވެ. ބަސްނުވިކޭކަމުގެ އިހްސާސް ކުރެވެ އެވެ. ގުޅުމުގައި އެކަނިވެރިވެ އެވެ. އަދި ތިމާއަކީ މުހިއްމު މީހެއް ނޫން ކަމަށް ގަބޫލު ކުރެވެ އެވެ.

ގޭމް ދެކެ ލޯބިވާ ފިރިމީހާ، އޭނާ ކުރާހިތްވާ ކަމެއް ބައިވެރިޔާގެ ސަބަބުން ދޫކޮށްލަން ޖެހުން އެއީ އޭނާއަށް މައްސަލައަކަށް ވާ ކަމެކެވެ. އެހެންކަމުން ގޭމަށް ދެވިހިފާފައިވާ ނަމަ، އެކަން ވަކި ހައްދެއްގެ ތެރެއަށް ގެންދިޔުމަށް ނިންމަންވީ އަމިއްލަ އަށެވެ.

ބައެއް ދެމަފިރިންނަކީ ދެ މީހުން އެކީގައި ވެސް ގޭމް ކުޅޭ މީހުންނެވެ. އެ މީހުންނަށް ގޭމް ކުޅުމަކީ ދެ މީހުން އެކީގައި ވަގުތު ހޭދަކޮށް ގުޅުން ބަދަހި ކުރުމަށް ލިބޭ ފުރުސަތަކަށްވެ އެވެ. 

ދިރާސާތަކުން ބުނާ ގޮތުގައި ބައިވެރިޔާއާ އެކު ގޭމު ކުޅޭ ނަމަ ކައިވެނީގައި މައްސަލަޖެހުން މަދުވެ އެވެ. ވަރިއާ ހިސާބަށް ނުގޮސް ކައިވެނި ދެމިއޮތުމަށް ފަސޭހަ އެވެ.

އަނެެއްބައި ދެމަފިރިންގެ ތެރޭގައި ގޭމް މައްސަލައަކަށް ނުވެ ދަނީ އެކަކު ގޭމް ކުޅޭ ވަގުތު، އަނެކާ އޭނާގެ ހޮބީތަކަށް ވަގުތު ހުސްކުރާތީ އެވެ. ރައްޓެހިންނާ އެކު ވަގުތު ހޭދަކުރުން، ނެޓްފްލިކްސް ބެލުން ނުވަތަ އެހެން ވެސް ކަމެއް ކުރުމަށް އެ ވަގުތު ބޭނުން ކުރަން ލިބޭތީ ދެ މީހުންގެ ދެމެދުގައި މާ ބޮޑު މައްސަލައަކަށް ގޭމް ކުޅުން ނުވެ އެވެ.

ބައިވެރިޔާއަކީ ގޭމް ކުޅޭ މީހެއް ނުވަތަ ގޭމް ކުޅޭ މީހެއް ނޫން ނަމަވެސް، ދަންނަންވީ ބައިވެރިޔާގެ ސަމާލުކަން ތިމާއަށް 24 ގަޑި އިރު ނުލިބޭނޭ ކަމެވެ. އަބަދު އޭނާގެ ސަމާލުކަން ހޯދަން އުޅުމަކީ ވެސް އެޅޭ ޅައެއްޗެކެވެ. ދުޅަހެޔޮ ގުޅުމެއް ނަމަ ކޮންމެ މީހަކު ވެސް އަމިއްލަ ސިކުނޑި ހުސްކޮށްލާ، އަމިއްލައަށް ކުރާހިތްވާ ކަންކަން ކުރުމަށް ވަގުތު ދޭންވެ އެވެ.

އަބަދު އޭނާގެ ސަމާލުކަން ހޯދަން އުޅޭ ނަމަ މިކަމުން ދޭހަވަނީ ތިމާއަކީ ނަފްސާނީ ގޮތުން އެންމެ ފިޓު މީހާ ނޫން ކަމެވެ. އަމިއްލަ ނަފްސަށް އުފާވެރިކަން ގެނެސްދިނުމަށް އެހެން މީހަކަށް ބަރޯސާވާކަށް ނުޖެހެ އެވެ. އެކަނި ހުންނަ އިރު ވެސް އުފާވާން އެނގެންވެ އެވެ.

މައްސަލަނުޖެހި ބައިވެރިޔާއާ އެކީ އުފާވެރި ކައިވެންޏެއް ދަމަހައްޓަން ބޭނުން ނަމަ، ދެ މީހުން އެކީގައި މަސައްކަތް ކުރަން ޖެހެ އެވެ. ގޭމު ކުޅުން ކަހަލަ، ކައިވެންޏަށް ބުރޫ އަރާ ފަދަ ކަންކަން ކުރާ ނަމަ އެކަންކަމަށް ވަކި ހައްދެއް ކަނޑައަޅަންވާނެ އެވެ.