އޯ ލެވެލް ނަތީޖާއަކީ ހުރިހާ ކަމެއް ނިމުމެއް ނޫން

ރާއްޖޭގައި މި އަހަރުގެ ކެމްބްރިޖް ޖީސީއީ އޯ ލެވެލް އަދި އެސްއެސްސީ އިމްތިހާނުގައި ބައިވެރިވި 7،500 ދަރިވަރުންނަށް ނަތީޖާ ދޫކުރަން ފަށާފައިވާ އިރު، ނަތީޖާ އަތަށް ލިބޭ ދުވަހަކީ އެ ދަރިވަރުންނަށް ވަރަށް ހާއްސަ އެވެ.

އިމްތިހާނުގައި އިށީން ދަރިވަރުންގެ ތެރެއިން އެއް ބަޔަކު ނަތީޖާއާ މެދު އުފާކުރާ އިރު އަނެއްބައި ދަރިވަރުން އެމީހުންނަށް ލިބުނު ނަތީޖާއާ މެދު ހިތްހަމަނުޖެހިދާނެ އެވެ.

އެކުދިންގެ މައިންބަފައިންގެ ފަރާތުން ވެސް ނަތީޖާއާ ގުޅޭ ޝަކުވާތަކެއް އަތުވެދާނެ އެވެ. 

މިސާލަކަށް އެއް ދަރިވަަރަކާއި އަނެއް ދަރިވަރެއްގެ ނަތީޖާ އަޅާބެލުން ފަދަ ކަންކަން ބަައެއް ބެލެނިވެރިން ކުރެ އެވެ. ތަޖުރިބާކާރު މުދައްރިސް އަދި ޓީޗަރުން ބިނާ ކުރުމަށް މަސައްކަތް ކުރައްވާ ނިއުމާ މުހައްމަދު ވިދާޅުވާ ގޮތުގައި ދަރިފުޅުގެ އޯ ލެވެލް ނަތީޖާއަކީ ދަރިވަރުގެ ކުރިއެރުން ވަޒަން ކުރާނެ އެއް ގޮތެވެ. 

އޯ ލެވެލް ނިންމާލާ އިރު އިމްތިހާނެއްގެ ނަތީޖާއިން ނުފެންނަ އެތައް ކަމެއް މި 12/10 އަހަރުގެ ތެރޭ ދަސްވެފައި ހުރެދާނެ އެވެ. މިސާލަކަށް ދަރިފުޅަށް ލިބިފައިވާ ރީތި އުޅުމާއި، އަހުލާާގާއި، އަމަލީ ތަޖުރިބާތަކުން ދަސްވެފައިވާ ކަންކަން ވަޒަންކުރަން ޖެހޭނެ އެވެ. 

އެހެންކަމުން، ދަރިވަރުގެ ކުރިމަގު ބިނާކުރަންވާނީ އޭނާ އޯ ލެވެލްގައި ހެދި މާއްދާތަކުގެ ތެރެއިން، ކޮންމެ މާއްދާއަކަށް ނެގި ގަޑިއެއްހާ އިރުގެ އިމްތިހާނުން ލިބޭ ނަތީޖާއަށް އެކަންޏެއް ނޫނެވެ.

އެ އިމްތިހާނުގައި ދަރިވަރުގެ އަސްލު ފެންވަރު ނުފެނިދާނެ އެތައް ސަބަބެއް ނިއުމާ ވިދާޅުވި އެވެ.

އޯ ލެވެލް ނަތީޖާ ވަކި ގޮތަކަށް އައުމަކީ އަދި ނިމުމެއް ނޫނެވެ. ސަބަަބަކީ އޯ ލެވެލް އަކީ ތައުލީމީ ހަޔާތުގައި ހަދާ އިމްތިހާނުގެ ތެރެއިން އެންމެ ދަށް ހަރުފަތަށް ވުމެވެ. 

މީގެ އިތުރުން މުޖުތަމައުގައި ކާމިޔާބު މީހެއް ކަމަށް ބަލައިގަންނަނީ މީހާގެ ހުނަރުވެރިކަމެވެ. ޓެސްޓަކުން ލިބުނު ނަތީޖާއަކުން ނޫނެވެ.

އެކާވީސް ގަރުނުގެ ހުނަރުތައް ޓެސްޓް ޕޭޕަރެއްގެ ނަތީޖާއަށް ވުރެ ދިރިއުޅުން ކާމިޔާބުކުރަން މާ މުހިންމެވެ. ސަބަބަކީ މީހުންނަށް އެއްބާރުލުން ދިނުމާއި، ޑިޖިޓަލް ލިޓްރޭސީ އާއި ފާޑުކިޔައި ވިސްނުމުގެ ގާބިލުކަން ފަދަ ކަންކަމަކީ ޓެސްޓް ނަތީޖާއަކުން މިންކުރެވޭ ކަންކަން ނޫން ކަމަށް ނިއުމާ ވިދާޅުވި އެވެ.

މިނިސްޓަ އޮފް ހަޔާ އެޑިއުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މަރިޔަމް މާރިޔާ 'ދައުރު'އާ ވާހަކަ ދައްކަވަމުން ވިދާޅުވީ އޯ ލެވެލް ނިންމާާލާ ދަރިވަރަށް ތަފާތު ހުނަރުތައް ދަސްކުރުމުގެ ފުރުސަތު އެބަ އޮތް ކަމަށެވެ. 

"ކޮންމެ ދަރިވަރަކީ އެކަޑެމިކް ދާއިރާތަކުން ކުރިއަށް ދާން ޕްލޭން ކުރާ ދަރިވަރަކަށް ވާކަށް ނުޖެހޭ. އެންމެ މުހިއްމީ މީހާގެ ހުނަރު ތަރައްގީކުރުން. ތަރައްގީވަމުން އަންނަ ގައުމަކަށް ބަލާ އިރު އަހަރެމެންގެ ރާއްޖޭގައި ނެތީ ސްކިލްޑް ޕީޕަލް. ކޮންމެ ސިނާއަތަކަށް ބެލިޔަސް އެކަން ފާހަގަކުރެވޭނެ،" މާރިޔާ ވިދާޅުވި އެވެ.

މިނިސްޓަރު ދެން ފާހަގަކުރެއްވީ ވޮކޭޝަނަލް ޓްރެއިނިންގެ މުހިއްމު ކަމެވެ.

 ވޮކޭޝަނަލް ޓްރެއިނިންއަކީ މުހިއްމު އެތައް ހުނަރެއް ދަސްކޮށްގެން އަމިއްލަ ފައިމައްޗަށް ތެދުވެ، ގަދަރުވެރިކަމާ އެކު މަސައްކަތް ކުރުމަށް ތަފާތު ގިނަ ފުރުސަތުތައް ފަހިވާނެ ކަމެއް ކަމަށް މާރިޔާ ފާހަގަކުރެއްވި އެވެ.  

އޭގެ އިތުރުން އޭނާ ވިދާޅުވީ ކާމިޔާބު މީހަކަށް ވުމަށް 21 ގަރުނުގެ ހުނަރުތައް ހޯދުން ވަރަށް މުހިންމު ކަމަށެވެ.

ރަނގަޅު އިންސާނަކަށް ވުމަކީ، މާރިޔާ ވިދާޅުވި ގޮތުގައި، އަތުގައި އޮންނަ ސެޓްފިކެޓަކަށް ވުރެ މާ މުހިއްމު ކަމެކެވެ. އެގޮތުން އެހެން މީހުންގެ އިހްސާސްތައް ދަަންނަ ހުލްގު ހެޔޮ ރަނގަޅު މީހަކަށް ވުމަކީ ކޮންމެ ދަރިވަރެއްގެ ވެސް އެންމެ ބޮޑު ހުވަފެނަށް ވާން ޖެހެ އެވެ. އެހެންކަމުން އޯ ލެވެލް ނަތީޖާއަކީ އަދި ނިމުމެއް ނޫނެވެ. އެއީ ފެށުމެކެވެ.