ހާރޫންގެ ގޭގައި ޖިންނިއެއް އަދި ސިހުރުގެ ހާއްޔެއް

"މިހާރު ވެސް މި އިންޓަވިއުގައި ވާހަކަ ދައްކަމުންދާއިރު ވެސް އެ ޖިންނި މި ގޭގެ ގޯތި ތެރޭގައި އެބަހުރި. އަހަރެމެންގެ ލޮލަށް ނުފެނުނަސް އޭތި އަބަދުވެސް މި ގޯތީގައި އުޅޭނެ،" މިހެން ބުނެފައި އަހުމަދު ހާރޫނު އަތް ދިއްކޮށް ދައްކާލީ ވާރޭ ފެން ނަގަން ބޭނުންކުރާ ތާނގީއެކެވެ.

"އެންމެ ގިނައިން ފެންނަނީ އެތަނުން."

އޭނާ އެހެން ބުނުމުން އަހަރެންގެ ހަތަރެސް ފައިން ހީބިހި ނަގައިގަތެވެ. ފޮޓޯނަގަމުން ގެންދިޔަ ފޮޓޯގްރާފަރު ވެސް ކުއްލިއަކަށް ހުއްޓުން އަރައިފި އެވެ. އަހަރެމެން ތިބީ ހާރޫނު އޭނާގެ އަންހެނުންނާއި ދެ ކުދިންނާ އެކު ދިރިއުޅެމުން އަންނަ ސ. މަރަދޫ، ދުންފިނިގޭގެ 'މެދުވަތީގަ' އެވެ. މެދުގޯތީގައި ހެދި ފޯދި ހިޔައު ދެމުންދިޔަ ޖަނބުރޯލު ގަހެއްގެ ހިޔަލުގަ އެވެ.

ވައެއް ނުޖެހެ އެވެ. ރަތްދަކައަވީގެ ހޫނުން ދައު ހިއްލަނީ އެވެ. އާދަޔާހިލާފަށް ބޮޑެތި މަދިރި ހަފަނީ އެވެ.

ހާރޫނު ގޮސް ޖައްސާލައިގެން އިނީ ފެންޑާގެ ތިރިތިރި ފާރުބުރިމަތީގަ އެވެ. މުޅި އެ ފެންޑާތެރެ ފުރާލާފައި އޮތީ ކޮންމެވެސް ތާކުން ގެނެސް ބަރިބަރިއަށް ޖަހާފައިވާ ދޮރުފަތްތަކާއި ކުޑަދޮރުތަކުންނެވެ. އެއީ އުކާލަން ބަހައްޓާފައި ހުރި އެއްޗެއްސެއް ނޫނެވެ. އެއީ ރަށު ސްކޫލުން ބައުކޮށް ނީލަމުގައި ވިއްކާލި ދޮރުފަތްތަކެވެ.

އެކަމަކު ހާރޫނުގެ މި ގެއަށް އިތުރު އެންމެ ދޮރުފަތެއް ވެސް ބޭނުމެއް ނުވެ އެވެ. އޭނާގެ މި 'ދުންފިންޏަށް' ހިމާޔަތާއި ރައްކާތެރިކަން ފޯރުކޮށްދެނީ އެއަށް ވުރެ މާ އާދަޔާހިލާފު ބާރަކުންނެވެ.

"މި ޖިންނި އަކީ އަހަރެން އެންމެ ކުޑައިރު ވެސް މި ގޭގައި އުޅޭ ކަމަށް ބުނެވޭ ޖިންނިއެއް. މި ޖިންނިއެއް މި ގޭގައި ދިރިއުޅެމުން ގެންދަނީ އަޅުގަނޑުމެންގެ ބައްޕަގެ ޒުވާން ދުވަސްވަރުން ފަށައިގެން. މި ގެއަކީ ވަރަށް ގިނަ މީހުން އެކި ދުވަސްވަރު، އެކި ގޮތްގޮތަށް ސިހުރު ހަދާފައިވާ ގެއަކާއި ބިމެއް،" ހާރޫނުގެ މި އޮލަ ވާހަކައިގެ ތެރެއަށް ގެނބެމުން ދަނިކޮށް ސިއްސައިގެން ދިޔައީ އޭނާގެ އެއް އަތުން ވަރަށް ބާރަށް އަނެއް އަތުގައި ކުއްލިއަކަށް ހޫނު އެތިފަހަރެއް އަޅުވައިލުމުންނެވެ.

ޖެހިޖެހީނުން ޗިސްކޮށްލީ މަދިރިގަނޑެކެވެ.

އުމުރުން 44 އަހަރުގެ ހާރޫނަކީ ރަށު ސްކޫލްގައި ސެކިއުރިޓީ ގާޑެކެވެ. އެކަމަކު އުމުރުންވީހާ ދުވަހެއް އޭނާ ހޭދަކުރީ ފަރުމަސްވެރިކަމުގަ އެވެ. މަސްމަރަން ނުވަތަ ދައުއަޅަން ވިޔަސް އޭނާއަށް ވަކި ވަގުތެއް ނޯވެ އެވެ. އޮއްސޭ އިރާ އެކު ނުވަތަ ދެ ނަމާދު ދޭތެރޭގައި ވެސް އޭނާ ފަރުމައްޗަށް ހިނގައިދާނެ އެވެ. މެންދަމުން އަނބުރައި ދޭއް ތިނެއް ޖަހާއިރު ވެސް އޭނާ ފީނައި މަސްމަރަން އޮވެދާނެ އެވެ. ގުގުރައި ވިދައި ކިތަންމެ ބޯކޮށް ވާރޭ ވެހުނަސް ހާރޫނުގެ ހިތަށް ފިނިކަމެއް ލިބެނީ އޭނާގެ ހަތިޔާރުތަކާ އެކު ގޮސް މޫދަށް ފޭބުމުންނެވެ. އަދި އެންމެ ގިނައިން އޭނާ ދަނީ ވެސް އެކަނިމާއެކަންޏެވެ.

މުޅި ރަށު ހިނގައިގެން، ހާރޫނު ހޯދައިގެން އޭނާގެ މި ދުންފިނި ގެއަށް އަހަރެމެން އައީ މި އާދަޔާހިލާފު ފަރުމަސްވެރިކަމުގެ ވާހަކަތައް ކިޔުއްވާށެވެ. ނަމަވެސް އޭނާގެ މި މަސްވެރިކަމުގެ ހަޔާތުގައި ހުޅުނބުޖަހަމުން ގޮސް އެންމެ ފަހުން މި ވާހަކައެއް ބަދަލުވީ ފިތްކަނޑައިގެންދާވަރުގެ ބިރުވެރި ވާހަކައަކަށެވެ.

"އެ ޖިންނިގަނޑު ހަމަ އަސްލަށް ވެސް މިތަނުގައި އެބަހުރިތަ ބްރޯ،" ފޮޓޯގަނޑެއް ކަނޑާލަން ނުކެރި ބިރުން ކުޑަވެފައި ހުރި ފޮޓޯގްރާފަރު އިންޓަވިއު ތެރެއަށް ބޯކޮށްޕައި ސުވާލުކޮށްގަތެވެ.

"މަށަކަށް ވެސް ނުފެނެއޭ. އެކަމަކު އެހެން އެންމެނަށް ފެނޭ،" ހާރޫނު މިހެން ބުނެލިތަނުން ގޭތެރެއިން ނުކުމެގެން އައީ އޭނާގެ އަންހެނުންނެވެ.

"މަށަށް ވަރަށް ގިނައިން ފެނޭ. ނިދަން އޮށޯތީމަ ވެސް ހީވާނީ ގޭގެ ފުރާޅަށް ހިލައިގެ ވާރޭ އޮހިގަންނަހެން. މީހަކު ފުރާޅުމަތީގައި ހިނގާހެން. ކުޑަދޮރުން ބޭރު ބަލައިލީމަ ފެނޭ ބޮޑެތި ފިޔަގަނޑުލީ ވަރަށް ސިފަ ހުތުރު ޖިންނިތައް ވެސް މި ގޭގެ ގޯތީގެ ބޭރުގައި މަޑުކޮށްލައިގެން ތިބޭތަން،" އެ އަންހެން މީހާ ކިޔައިދިނެވެ.

އެހިސާބުން އަހަރެން ހިތަށްއެރީ މި އިންޓަވިއުއެއް ނިންމާލާފައި ވީހާ ވެސް އަވަހަކަށް މާލެ ފުރައިގެންދާށެވެ. އެކަމަކު ހާރޫނު ދެން ކިޔައިދޭން ފެށީ އަދި މާ ޝައުގުވެރިކުރުވަނިވި ވާހަކަތަކެކެވެ.

އައްޑު އަތޮޅަކީ ފަންޑިތަ ސިހުރުގެ ކަޅު ތާރީޚެއް އޮތް ދުނިޔެއެކެވެ. އަދި އަހަރެމެން އައިސް މިތިބަ މަރަދޫގައި އެންމެ ފަހުން މީހުން އާބާދުވެފައި ވަނީ ވެސް ސިހުރާއި ފަންޑިތައިގެ ކޯޅުންގަނޑަކަށް ފަހުގައި ކަމަށް ތޯތޯމަތިން ކިޔައި އުޅެ އެވެ. އައްޑު އަތޮޅުގެ ގިނަ ރަށްތަކަކީ ސިހުރު ހާހޫރާ ގުޅިގެން ތާރީޚުގެ އެކި ހިސާބުތަކުގައި ފަޅުވެ ގެއްލިގެން ގޮސްފައިވާ އާބާދުތަކެއް ކަމަށް ވެސް ކިޔައި އުޅެ އެވެ.

ހާރޫނުގެ ބައްޕަ މަރަދޫގައި ވަޒަންވެރިވީ ހިތަދޫން ފުރައިގެން އައިސް އެވެ. ގއ. ގެމަނަފުށީ އަންހެނަކާ ކައިވެނިކޮށްގެން މި ގޭގެ ބީރައްޓެހި ވެށީގައި މަޑުމަޑުން އޭނާގެ އާއިލާ ބޮޑުކުރަން ފެށީ އެވެ. އެ ދެމަފިރިންގެ މި ހިޔަލަށް ޖުމްލަ 14 ކުދިން އުފަންވި އެވެ. ނަމަވެސް މިއަދު ދުނިޔޭގައި ތިބީ އޭގެ ތެރެއިން އަށް ކުދިންނެވެ. މިހާރު މި ގޭގައި ދިރިއުޅެމުން އަންނަ ހާރޫނަކީ އޭގެ އެންމެ ހަގު މީހާ އެވެ.

ނަމަވެސް ވަރަށް ފަހަކާ ޖެހެންދެން މި އާއިލާގެ އެހެން ކުދިން ވެސް ދިރިއުޅެމުން ދިޔައީ ހާރޫނާ އެކު މިގޭގަ އެވެ. އެކަމަކު އެ އެންމެން ވެސް މަޑުމަޑުން، ފަހަރަކު މީހަކު ގެއިން ނުކުމެގެން ދިޔައީ އެވެ.

"މިހާރު ވެސް މި ރަށުގައި އަޅުގަނޑުގެ އެއްބަނޑު އެއްބަފާ ބޭބެއިންނާއި ދައްތަމެން ދިރިއުޅޭ. އެކަމަކު އެއިން އެއްވެސް މީހަކު މިގެއަކަށް ނުވަންނާނެ. މިއީ އެ އެންމެންގެ ވެސް ގެ އަދިވެސް. މި ގެ އޮތީ ނުވެސް ބަހައި،" ހާރޫނު ކިޔައިދިނެވެ.

"އެކަމަކު މި މަގުން ހިނގާލާފައި ދާއިރު ވެސް އެ މީހުން މިގެއަކަށް ނުވަންނާނެ. ބުނަނީ ވަންނަ ހިތެއް ހަމަ އެއްގޮތަކަށް ވެސް ނުވެޔޭ. ރަށުގެ އާންމުން ވެސް މި ގެއަށް ވަރަށް ނާންނާނެ. އަމުދުން ރޭގަނޑު މިގެއަށް ނުވަންނާނެ."

ސިހުރުގެ ސަބަބުން ދުންފިނިގެ މަޑުމަޑުން ފަޅުވެ ވީރާނާވަނީ އެވެ. ހާރޫނު ބުނީ މިހެންނެވެ.

"ގަބޫލުކުރެވެނީ މި ގެ ފަޅުކޮށްލަން މީހަކު ސިހުރު ހަދަނީ ކަމަށް. މަންމާމެން ބައްޕާމެންގެ ޒަމާނުގައި ވެސް މި ގެއަށް ސިހުރު ހަދާފައި އެބަހުރި،" ހާރޫނު ބުނެލި އެވެ.

"މިހާރު ވެސް މި ގެއަށް ސިހުރު ހަދާ މީހަކު މި ހިސާބުގަނޑުގައި ދިރިއުޅޭ. އެއީ ކާކުކަން ވެސް އެނގޭ. އެކަމަކު އޭނާގެ ނަން ބުނަން ބޭނުމެއް ނޫން."

ހާރޫނު ބުނީ އެ ސިހުރު ބާތިލުކުރަން ހުވަދޫ އިން ފަންޑިތަވެރިޔަކު ގެނެސް ކިޔެވެލިތައް ކިޔަވަން ފެށުމުން ގޭތެރެއިން ހިކަންޖާއި ކަކުންޏާއި ބަރަވެލި ނުކުމެގެން ދިޔަތަން އޭނާގެ ދެ ލޮލުން ވެސް ދެކެފައިވާ ކަމަށެވެ.

"އެ އެއްޗެހިތައް ނުކުމެގެން ދިޔައީ މި ދޮރުން. ތި ދިމާލުން."

ހާރޫނު މިހެން ބުނުމުން ފައިދަށުން ބިންގަނޑު ދެމިގަތެވެ. އަހަރެން އަނެއް ފަރާތަށް ޖެހިގަތީ އެވެ.

"ފަންޑިތަވެރިޔާ ބުނީ އެއީ ގެއަށް ހަދާފައިވާ ސިހުރާ ގުޅިގެން މި ގޭގައި ވަޒަންވެރިވެ ވެރިވެގަނެގެން އުޅުނު ޖިންނިތަކޯ. އޭނާގެ ކިޔެވެލިތައް ކިޔަވައިގެން އެފަހަރު ގޭތެރެއިން ވަރަށް ބައިވަރު ސޫފާސޫފިތައް ނުކުމެގެން ދިޔަ. އެކަމަކު ދެން ވެސް ފަންޑިތަވެރިޔާ ހިތްހަމައެއް ނުޖެހުނު،" ހާރޫނު ކިޔައިދިނެވެ.

"ދެން މަންމަ އަހައިފި ކިހިނެއްވީ ހެއްޔޭ؟ ދެން ފަންޑިތަވެރިޔާ މި ހުންނަނީ ގެއާ ދިމާލަށް ބަލަހައްޓައިގެން. މިހެން ހުރެފައި ބުނެފި އަދިވެސް އެބަ އުޅެޔޭ އެކަކު މި ގޭ ތެރޭގައި. އެކަމަކު ތިމަންނާ ކިތަންމެ ގިނަ އިރެއް ވަންދެން ކިޔެވިޔަސް އޭނާ މި ގެއަކުން ނުނިކުންނާނެއޭ."

"ދެން އަނެއްކާވެސް ކިޔަވަން ފެށި ގޮތަށް ކިޔަވަމުން ގޮސް އިންކުރަހައި އެ އިން ބަންދުކޮށްލީ. އެހިސާބުން ފެށިގެން މިއަދު ވެސް އެ ޖިންނި ދިރިއުޅެނީ މި ގޭގައި."

މިހެން ބުނެފައި ހާރޫނު އަނެއްކާވެސް ތާނގި ހުރި ދިމާލަށް ބަލައިލި އެވެ. މި ގޭގައި ދިރިއުޅޭ ޖިންނި ލޮލަށް ނުފެނުނަސް އޭގެ އަސަރު އޭނާއަށް އިހުސާސުވާ ކަހަލަ އެވެ.

"ބޮޑަށް ލަފާކުރެވެނީ މި ގޭގައި ވަޒަންވެރިވެގެން އުޅެނީ އަވައްޓެހިންނޭ އެ ކިޔާ ކަހަލަ ޖިންނިއެއް ކަމަށް،" ހާރޫނު މަޑުމަޑުން ބުނެލި އެވެ.

'އަވައްޓެހި އަންހެން ކުދިންނަކީ' ގޭގައި ގެންގުޅޭ ކަމަށް ބުނާ ރޫހާނީ އަންހެން ޖިންނިއެކެވެ. އޭތި ގެންގުޅެން އެނގިއްޖެ ނަމަ ގޭގައި ކުރަން ޖެހޭ މަސައްކަތް ވެސް އެ ޖިންނި ކޮށްދޭ ކަމަށް ބުނެ އުޅެ އެވެ. އަދި ނުބައިވެގެންވީ އެހެން ބާރުތަކަށް ގެއަށް ވަންނާކަށް ވެސް ނުކެރޭނެ އެވެ.

"އެ ޖިންނި އަކީ މި ގޭގައި ރައްކަލަކަށް އުޅޭ އެއްޗެއް ކަމަށް ފަންޑިތަވެރިން ވެސް ބުނެފައި ވަނީ. ސިހުރު މެދުވެރިކޮށް މި ގެއަށް އެހެން ޖިންނިތަކަށް ނުވަދެވެނީ ވެސް މި ޖިންނިއާ ހެދި ކަމަށް ވަނީ،" ހާރޫނު ބުނެލި އެވެ.

"މި ގޭގައި ޖިންނިއެއް އުޅުނަސް އަހަރެމެންނަށް އެއްވެސް ގޯނާއެއް ނުކުރޭ. އެކަމަކު އެ ޖިންނި އަކީ އެކި ކަންކަމުގައި އެހީތެރިކަން ފޯރުކޮށްދޭ ޖިންނިއެއް. ގޭތެރެ ތަރުތީބުކޮށް ކުނިކަހައި ކުނިއުކާ ވެސް ދޭނެ."

ހާރޫނު ކިޔައިދިން ގޮތުގައި ދުންފިނި ގެއަކީ ސިހުރުގެ ހާއްޔެކެވެ. އޭނާ ބުނަނީ އަދިވެސް އޭނާގެ ގެއަށް ސިހުރުހަދާ ބަޔަކު ދަނީ އެކަން ކުރަމުން ކަމަށެވެ. ސިހުރުގެ ލިޔުންތައް އެކި ސިފަސިފައިގައި ފުރާޅުމަތިންނާއި ތާނގީތަކުގެ ތެރެއިން އަދި ގޯތީގައި ވަޅުލާފައި ވަނިކޮށް ވެސް ފެނިފައި އެބަ ހުއްޓެވެ.

"އެއް ފަހަރަކު ގޯތި ތެރެއިން ފެންނަނީ ފުޅިއަކަށް ކަޅުކުލައިގެ އެއްޗެހިތަކެއް އަޅައިގެން ވަޅު ކައިރީގައި އެނބުރެމުން ދިޔަ މީހަކު. އެމީހާ އިރުކޮޅަކުން ގެއްލިއްޖެ. ދެން އެއީ ކޮންމެވެސް ނުބައި ކަމެއް ކުރަން އުޅޭ މީހެއްކަން ޔަގީވެގެން އޭނާ އެ ފުޅީގައި ހުރި އެއްޗެހިތައް އެޅީ ކޯއްޗަތަކަށްތޯ ބަލަން ފެށީ،" ހާރޫނު ކިޔައިދިނެވެ.

"ދެން ބަލަމުން ގޮސް ތާނގީގެ މަތިގަނޑު ނަގައި ބެލިއިރު ތާނގީ ތެރެއަށް އަޅާފައި ހުރީ ބައިވަރު ފައިދިގުމަކުނު. މަރާލާފައި ތާނގީ ތެރެއަށް އަޅާލާފައި ހުއްޓައި. ފޮށިލީ ފައިދިގުމަކުނުތަކެއް."

އޭނާ ބުނީ ފުރާޅުން ފެން ނަގައިގެން ފެން ބުއި ދުވަސްވަރު ފުރާޅުމަތިން ވެސް ސިހުރުގެ ލިޔުންތައް ފެނުމަކީ އާންމު ކަމެއް ކަމަށެވެ.

"އަޅުގަނޑު ފުރާޅު މައްޗަށް އެރި ފަހަރަކު ވޮލެޓެއް ފެނިގެން ނަގައިގެން ބެލިއިރު އޭގެ ތެރެއިން ފެނުނީ ސިހުރުޗލިޔެފައި އޮތް ވަރަށް ބޮޑު ކަރުދާސްގަނޑެއް. ރޫޅަމުން ރޫޅަމުން ގޮސް ބޮޑު ކަރުދާސްގަނޑަކަށް ބަދަލުވި،" ހާރޫނު ކިޔައިދިނެވެ.

"ފަންޑިތަވެރިޔާ ބުނެފި ތާނގީއަށް ފެން އެޅިފައިވާ ނަމަ އެ ހުރިހާ ފެނެއް ދޫކޮށްލާށޭ. އެ ފެން ނުބޮއްޗޭ. އެފަހަރު ދެން އެ ތާނގީ ތަޅާލީ."

ނަމަވެސް ހާރޫނު ބުނީ ގެއަށް ހަދާ ކަމަށް ބެލެވޭ ސިހުރުގެ އެއްވެސް އަސަރެއް އޭނާއަކަށް ދުވަހަކު ވެސް ނުކުރެ އެވެ. އެކަމަކު އެ ގޭގައި ކުރިން އުޅުނު، އާއިލާގެ އެހެން މީހުން ގެއިން ނުކުމެގެން ދިޔައީ ސިހުރުގެ އުނދަގޫ އެކި ސިފަސިފައިގައި ކުރިމަތިވެގެން ކަމަށް އޭނާ ގަބޫލުކުރެ އެވެ.

ދުންފިނީގެ މި ބިރުވެރި ވާހަކަތައް ކިޔައިދެމުން ގޮސް ހާރޫން ދެން ކިޔައިދޭން ފެށީ މޫދުގައި އުޅެނިކޮށް އޭނާ ފަހަތު އަޅުވާލި 'ޖިންނިއެއް' ގެ ވާހަކަ އެވެ. އެހައި ހިސާބަށް ދިއުމުން އަހަރެން ހިތަށްއެރީ މި އިންޓަވިއުއެއް ރަސްމީކޮށް ނިއްވާލާށެވެ. އެކަމަކު ހާރޫނު ލައްވައި ކިޔުއްވަން އައި މަސްވެރިކަމުގެ ވާހަކަތައް އަދި އެހިސާބުން ކިރިޔާ ފެށުނީ އެވެ.

"އަޅުގަނޑަށް ޖިންނިއެއް ނުފެނޭ ގެއަކުން. އެކަމަކު އަބަދުވެސް ރޭގަނޑު މަސްވެރިކަމުގައި ގޮސް އުޅޭއިރު އާދަޔާހިލާފު އެއްޗެހި ފެނޭ،" އައު ފެށުމަކުން ހާރޫނު ފަށައިގަތެވެ.

"އެގޮތުން ދުވަހަކު ވެސް ނުފެންނަ ސިފަސިފައިގެ މަސްތައް ވެސް ފެނޭ. ވަކި ވައްތަރެއްގެ މަހެއް އަބަދުވެސް އަޅުގަނޑާ އެއްވަރަކަށް ފަތަމުން ގެންދާތަން ވެސް ފެނޭ. އެކަމަކު އަޅުގަނޑު ފަހަތު ވަރަށް ނުރައްކާ ޖިންނިއެއް އަޅުވާލި ހާދިސާއެއް މީގެ އަށެއްކަ އަހަރު ކުރިން ދިމާވި."

"އަންހެން ކުއްޖަކު ވަރަށް ރީއްޗަށް ތުނބުން ފުމޭ އަޑު އިވެނީ. މޫދުގައި އޮންނައިރު ވެސް އަދި އެއްގަމަށް އެރީމަ ވެސް. އެ ހިސާބުން އަޅުގަނޑަށް ޔަގީންވެއްޖެ މިއީ ގޯހެއްކަން."

އެ ހިސާބަށް ދިޔައީމަ ދެން އަހަރެމެން ހާރޫނުގެ ވާހަކަތައް މެދުކަނޑާލައި ރިކޯޑިން ވެސް ނިއްވާލައިފީމެވެ. އޭރު އިރުއޮއްސެނީ އެވެ.

"އިރުއޮއްސުނީމަ މިހާރު ވެސް މި ރަށު މީހުން ނާންނާނެ މި ގެއަކަށް. އިރުއޮއްސިގެން މި ގެއަށް އަންނަ ވަރަށް ގިނަ މީހުންނަށް އެއްޗެހި ފެނޭ،" ހާރޫނު އަނެއްކާވެސް އެހެން ދިމާލަކުން ފަށައިގަތެވެ.

އެކަމަކު އަހަރެމެން ބެލީ އެ ބުނާ ފާޑުފާޑުގެ އެއްޗެހިތައް ފައުޅުވާން ފެށުމުގެ ކުރިން އެތަނުން ރައްކާވޭތޯ އެވެ. ދުޔަ މަގުމަތީގައި ހިތަށް އެރީ ހާރޫނު ކިޔައިދިން އެ ހުރިހާ ވާހަކައެއްގައި ވަނީ ކިހާ ވަރެއްގެ ބަރުދަނެއްތޯ އެވެ؟ އެހެން ހިތަށް އަރައި ވާހަކަ ދައްކަން ފެށުނީ ދުންފިނި ގޭގެ ބައެއް އަވައްޓެރިންނާ އެވެ.

އަވައްޓެރިން އަދި ކިޔައިދޭން ފެށީ މާ ބިރުވެރި ވާހަކައެވެ. ދުންފިނި ގޭގެ ގޯތި ތެރޭގައި ހެދި ފެތުރިފައި ހުރި ޖަނބުރޯލު ގަހާ ދިމާލަށް ބަލަހައްޓައިގެން ތިބެފައި އަހަރެމެން ސައިކަލަށް އަރައިގެން ނައްޓާލީ އެވެ.

އެ ގަހުގައި ދުވަހަކު މޭވާއެއް ހަރެއް ނުވެ އެވެ. ސިހުރުގެ މަޑު ގިނީގައި ދުންފިނިގެ ފަޅުވެ ވީރާނާ ވަނީ ހެއްޔެވެ؟