ލަޔާލް ގަލަމުން ކުރަހާފައިވާ ކުރެހުންތައް ގައުމީ އާޓް ގެލެރީގައި ދައްކާލަނީ

މަރިޔަމް ލަޔާލް ނުވަތަ އެންމެން ދަަންނަ ނަމުން ނަމަ 'ލައިލީ' ވަނީ ބޯލްޕޮއިންޓު ގަލަމުން ކުރަހާފައިވާ އޭނާގެ ކުރެހުންތަކަށް ސޯޝަލް މީޑިއާގައި މަގުބޫލުކަން  ހޯދާފަ އެވެ. ލައިލީގެ ފުރަތަމަ ބޮޑު އަމިއްލަ މައުރަޒު 'އެކެއް' އާއްމުންނަށް ހުޅުވާލީ މި މަހު 21ގައި ގައުމީ އާޓް ގެލެރީގަ އެވެ.

އުމުރުން 17 އަހަރުގައި ފުރަތަމަ ފަހަރަށް ބޯލްޕޮއިންޓު ގަލަން ބޭނުންކޮށްގެން ކުރަހަން ފެށި ލައިލީގެ އުފެއްދުންތަކުގައި ހިމެނެނީ ރާއްޖޭގެ ސަގާފަތާއި ތާރީހީ އެކި ތަކެއްޗެވެ. ކުރީގައި ދިވެހިން އާއްމުކޮށް ބޭނުންކުރި ފާނޫޒާއި 1951ގައި ނެރުނު 100 ރުފިޔާގެ ނޫޓު ވަނީ އޭނާގެ ހުނަރުން ދައްކާލައިފަ އެވެ.

ބޮޑު ރަސްމިއްޔާތަކުން ހުޅުވި 'އެކެއް' މައުރަޒުގައި ދައްކާލަނީ ދިވެހިންގެ ދިރިއުޅުމުގެ އާދަކާދައިގެ ރީތިކަމާއި، އަޅުގަނޑުމެންގެ ތާރީޚީ އާސާރީ ތަކެއްޗާއި، ދިވެހިވަންތަކަމަށް ނުފޫޒު ކުރާ އެކި އެއްޗިއްސެވެ. ކަޅު ކުލައިގެ ބޯލް ޕޮއިންޓު ގަލަން ބޭނުންކޮށްގެން އޭނާ ވަނީ އިހުގެ ބަނޑަހަގެ، މިހާރު އުވިފައިވާ ދިގުލާރި ނުވަތަ އިހު ޒަމާނުގައި ދިވެހިން ބޭނުންކޮށް އުޅުނު ފަހާ ފޮށި އަދި އިސްތިރި ފަދަ ތަކެތި ކުރަހައިފަ އެވެ.

"އަޅުގަނޑު ބޮޑުވީ ޒަމާންވީ ތަކެތި ހިމާޔަތްކުރުމަށް ހާއްސަ އަހައްމިއްޔަތެއް ދޭ އާއިލާއަކާ އެކު. އެހެންވީމާ، މި މައުރަޒުގައި އަޅުގަނޑު ދައްކާލަން ހިޔާރުކުރީ ދިވެހި ސަގާފަތް ރަމްޒުކޮށްދޭ ތަފާތު އާސާރީ ތަކެތި. މި މައުރަޒު ފުރިހަމައަށް ބާއްވަން އަޅުގަނޑުގެ އާއިލާގެ ފަރާތުން އެހީތެރިކަމާއި ހިތްވަރު ވަރަށް ބޮޑަށް ލިބުނު،" ލަޔާލް ބުންޏެވެ.

ލަޔާލްގެ ހުނަރު ދައްކައިދޭން ބޭނުންކުރަނީ ބޯލް ޕޮއިންޓު ގަލަމެވެ. ކުރެހުންތެރިއެއްގެ ގޮތުގައި ލައިލީއަށް އެންމެ ކަމުދިޔަ އެއް މީޑިއަމްއަކީ ބޯލް ޕޮއިންޓު ގަލަން ކަމަށް އޭނާ ބުންޏެވެ. އޭނާ ގަބޫލުކުރާ ގޮތުގައި އޭނާގެ ފަންނުވެރި ހުނަރާއި ދައްކައިދޭން ބޭނުންވާ ތަސްވީރުތައް، ތަފްސީލާ އެކު ކުރަހަން އޭނާއަށް އެންމެ ކަމުދަނީ ބޯލް ޕޮއިންޓު ގަލަމެވެ. އެއީ އަމިއްލަ ހިތްހަމަޖެހުމެއް ވެސް ލިބޭ ކަމެއް ކަމަށް ބުންޏެވެ. އެގޮތުން އޭނާ ބޭނުންކޮށް، ދެލި ހުސްވެފައި ހުރި އޮރެންޖު ކުލައިގެ ބޯލް ޕޮއިންޓު ގަލަންތައް ވަރަށް ފަރުވާތެރިކަމާ އެކު ފްރޭމުކޮށް މައުރަޒުގައި ދައްކާ ވެސް ލި އެވެ.

'އެކެއް' މައުރަޒު ހުޅުވުމުގެ ރަސްމިއްޔާތުގައި ގިނަ އަދަދެއްގެ ބަޔަކު ބައިވެރިވި އެވެ. އެގޮތުން މައުރަޒު ހުޅުވުމުގައި އެމްއެމްއޭގެ ގަވަރުނަރު އަލީ ހާޝިމް އާއި މިނިސްޓަ އޮފް ދިވެހި ލޭންގުއެޖް، ކަލްޗާ އެންޑް ހެރިޓޭޖު އާދަމް ނަސީރު އިބްރާހިމް އާއި ކުރީގެ ރައީސް މުހައްމަދު ނަޝީދު ވެސް ބައިވެރިވެވަޑައިގަތެވެ. މީގެ އިތުރުން ނޭޝަނަލް ސެންޓާ ފޮ ދަ އާޓްސްގެ އިސް ވެރިންނާއި ރާއްޖޭގެ ފުންނާބު އުސް އާޓިސްޓުން ވެސް ރަސްމިއްޔާތުގައި ބައިވެރިވި އެވެ.

'އެކެއް' ގައުމީ އާޓް ގެލެރީގައި ކުރިއަށްދާނީ 1 ޑިސެމްބަރުގެ ނިޔަލަށެވެ.