މިސް ޔުނިވާސްގެ ތާޖު މިސް ނިކަރާގުއާއަށް

މިސް ޔުނިވާސް 2023ގެ ތާޖު މިސް ނިކަރާގުއާ ޝެއިނިސް ޕަލަސިއޯސްއަށް ދީފި އެވެ.

މި އަހަރުގެ ފުރަތަމަ ރަނާރަޕްކަން ލިބުނީ ތައިލޭންޑްގެ އެންޓޯނިއާ ޕޯސްލިޑް އަށެވެ. ދެވަނަ ރަނާރަޕް އަކީ އޮސްޓްރޭލިއާގެ މޮރާޔާ ވިލަސަން އެވެ.

މި އަހަރުގެ މިސް ޔުނީވާސްގެ ތާޖު ހޯދުމަށް 84 ގައުމަކުން ވާދަކޮށްފައިވެ އެވެ.

އެލް ސެލްވެޑޯގެ ވެރިރަށް ސޭން ސެލްވެޑޯގައި އިއްޔެ ބޭއްވި މި ރަސްމިއްޔާތުގެ ކުރިން، 20 ގައުމެއް ވަނީ ޝޯޓްލިސްޓް ވެފަ އެވެ. އެއަށް ފަހު ސުވިމިން ސޫޓް ރައުންޑުން 10 ބައިވެރިން އަލުން ޝޯޓްލިސްޓް ކުރި އެވެ. ދެން ކުރިއަށް ގެންދިޔައީ އީވްނިން ވެއާ ރައުންޑެވެ.

މިއީ މި މުބާރާތް ބޭއްވި 72 ވަނަ އަަހަރެވެ. މި އަހަރުގެ މިސް ޔުނިވާސް އެހެން އަަހަރުތަކާ ތަފާތެވެ. އެގޮތުން ޕްލައިސް ސައިޒްގެ ބައިވެރިޔަކު ވަނީ މި މުބާރާތުގައި ފުރަތަމަ ފަހަރަށް ސެމީ ފައިނަލްއާ ހިސާބަށް ގޮސްފަ އެވެ. އެއީ މިސް ނޭޕާލްގެ ގޮތުގައި މުބާރާތުގައި ވާދަކުރި ޖޭން ދިޕިކާ ގެރެޓް އެވެ.

ސުވިމިން ސޫޓް ރައުންޑްގައި މިސް ޕާކިސްތާން އެރީކާ ރޮބިން ވާދަ ކުރީ ބުރްކިނީއެއް ލައިގެންނެވެ. އޭނާ އަކީ ކްރިސްޓިއަނެކެވެ.

މިސް ޔުނިވާސްގެ ތާރީހުގެ ތެރެއިން ހާއްސަ ޖާގައެއް ހޯދި އަނެއް ބައިވެރިޔަކީ މިސް ކޮލޮމްބިއާ ކެމީލާ އަވޭލާ އެވެ. އޭނާއަކީ ކައިވެނިކޮށް ދަރިޔަކު ހުންނަ މީހަކަށް މިސް ޔުނިވާސްގެ ޝަރަފުވެރި ވަަނައެއް ލިބުނު ފުރަތަމަ ބައިވެރިޔާ އެވެ. އޭނާ ހޯދީ މުބާރާތުން ފަސްވަނަ އެވެ.

 ކެމީލާގެ އިތުރުން، މި މުބާރާތުގައި ވާދަކުރި މިސް ގުއާޓަމާލާ އަކީ ވެސް މައެކެވެ.

މިސް ޔުނިވާސްގެ ގަދަ ދިހައިގައި ހިމެނުނު އެތީނިއާ ޕެރޭޒްއަކީ ސްޕެއިނުން ނެރުނު ކަޅު ނަސްލަށް ނިސްބަތްވާ މީހެކެވެ.

މިއަހަރުގެ ޖަޖިން ޕެނެލްގައި މޮޑެލް ހަލީމާ އާޑެން އާއި ޓިކްޓޮކް އިންފުލުއެންސަރުން އަދި ކުރީގެ މިސް ޔުނިވާސްކަން ހޯދާފައިވާ މީހުން ހިމެނެ އެވެ.