އަންހެން ބޮޑުބެރު ގްރޫޕް 'ފަތްމިނި' މިރޭ އޮލިމްޕަހަށް

ދިވެހި ސަގާފަތުގައި ބޮޑު ބެރަކީ ކުރިން ހަމައެކަނި ފިރިހެނުންނަށް ހާއްސަ އެއްޗަކަށް ވިޔަސް، ދޭތެރެ ދޭތެރެއިން އަންހެން ބޮޑުބެރު ގްރޫޕްތައް ފެނެ އެވެ. އެގޮތުން 2014 ގައި 'ހޯޕް ފޯ ވިމަން' ޖަމިއްޔާއިން އެ އަހަރުގެ އަންހެނުންގެ ދުވަހާ ގުޅުވައިގެން އަންހެނުން ބޮޑުބެރުގެ ތެރެއަށް ނެރެން ކުރި މަސައްކަތް ކާމިޔާބެވެ.  

'ސިކަންދަރު' ބެރު ގުރޫޕްގެ އެހީގައި، އަޖުމަބެލުމުގެ ގޮތުން އަންހެނުންނަށް ބެރު ޖަހަން ދަސްކޮށްދިނެވެ. މިއީ އަންހެން ބޮޑުބެރު ގުރޫޕް 'ފަތްމިނި' އުފައްދަން ހޯޕް ފޯ ވިމަންއިން ކުރި މަސައްކަތުގެ ނަތީޖާ އެވެ.

ބެރަށް ހުރި ލޯތްބާއި ޝައުގާ އެކު ވޭތުވެދިޔަ ނުވަ އަހަރު ފަތްމިނި ފާހަގަކުރެވުނީ މެދު ކެނޑުމެއްނެތި، ޕްރޮފެޝަނަލްކޮށް ޝޯ ދިން ހަމައެކަނި އަންހެން ބޮޑުބެރު ގުރޫޕަށެވެ.

ފަތްމިނި ބޮޑުބެރު ގުރޫޕްގައި ހިމެނެނީ؛

ބެރުޖެހުމުގައި؛

އައިޝަތު ހިޝްމަ

ލިލާ އިބްރާހިމް

އައިޝަތު ރިފްގާ

ފާތިމަތު ރިޝްތާ (ނެށުންތެރިޔާ)

ނަގާ ކިޔާމީހުން؛

އައިމިނަތު ރިޝްމާ

ޝައިހާ ސަމީއު

ޒުވާބު ކިޔާ؛

ލީނާ އިބްރާހިމް

އައިޝަތު ޝަހުމާ (ނެށުންތެރިޔާ9

އައިޝަތު ޖައުދާ

ހަދީޖާ ފައިނާން އަލީ (ނެށުންތެރިޔާ)

ފާތިމަތު ޝިފާ ޝަފީގު (ނެށުންތެރިޔާ)

ފާތިމަތު މަލްސާ (ނެށުންތެރިޔާ)

މަރިޔަމް ޖިނާން

ހައްވާ ނުޒުހަތު

ޝައުފާ ހުސެން ހަބީބް

ފާތިމަތު މަލްދާ (ނެށުންތެރިޔާ)

 މި ގްރޫޕް މާލޭގެ ކަނޑުތޮށިން ބޭރަށް އެކި ދަތުރުތަކުގައި ހިނގައްޖެ އެވެ. އަދި ރާއްޖެއިން ބޭރަށް ވެސް ވަނީ ދަތުރުކޮށްފަ އެވެ. އެގޮތުން އިންޑިއާ، މެލޭޝިއާ އަދި އެމެރިކާގައި ބޮޑުބެރުގެ ހަރަކާތްތައް ދައްކާލި އެވެ.

ގުރޫޕްގެ ފަރާތުން 'ދައުރު' އަށް އިންޓަވިއުދިނީ ފެށުނީއްސުރެ އެ ގުރޫޕުގައި ބެރުޖެހުމުގައި ހަރަކާތްތެރިވި އައިޝަތު ހިޝްމާ އެވެ. ރ. ރަސްމާދުއަށް އުފަން ހިޝްމާ ނިސްބަތްވަނީ ބޮޑު ބެރުގެ އާއިލާއަކަށެވެ. އެގޮތުން އޭނާގެ ބައްޕަ އާއި ބޮޑު ބޭބެމެންނަކީ ބެރުޖެހުންތެރިންނެވެ.

ހޯޕް ފޯ ވިމަން އިން ގޮވާލި ގޮވާލުމަށް އިޖާބަދީ، ބެރާ އެކު އޭނާ ލީޑް ނެގި އެވެ. ކަރުގައި ބެރު އެލުވާ، އެ ޖަހަން ފެށި ގޮތަށް އޭނާ އަދިވެސް، އެހެރީ އެކަމުގަ އެވެ.

ހިޝްމާ ބުނި ގޮތުގައި ވަރަށް ގިނަ މީހުން، އެ ގުރޫޕާ ގުޅި ޝޯދިނުމުގައި ހަރަކާތްތެރިވިޔަސް 2014 އިން ފެށިގެން މިހާ ހިސާބަށް ތިބީ ތިން މީހުންނެވެ. އެކި ސަބަބުތަކާ ހެދި ކެނޑިގެން ދާން ޖެހެނީ އެވެ.

"އެއްބަޔަކު ކެނޑެނީ އާއިލާއިން ފުރިހަމަ ސަޕޯޓް ނުލިބިގެން، ނުވަތަ ބޮއިފްރެންޑްގެ ފަރާތުން މިކަމަށް ސަޕޯޓް ނުލިބިގެން،" ހިޝްމާ ބުންޏެވެ.

ދިވެހި ބޮޑުބެރަކީ ފިރިހެނުން ކުޅެމުން އައި އެެއްޗަކަށް ވިޔަސް 'އަންހެނުންނަށް ވާނެއޭ' ބުނަމުން ފަތްމިނި މިހާތަނަށް ތަފާތު ޝޯތައް ދީފި އެވެ.

އެމެރިކާގެ ނިއު ޔޯކްގައި ހުންނަ އދ.ގެ މައި އޮފީހުގައި 2018 ވަނަ އަހަރު އެމީހުން ބޮޑުބެރު ޖެހި އެވެ. މެލޭޝިއާ އާއި އިންޑިއާ އަދި ޖަޕާންގައި ވެސް ރާއްޖެ ތަމްސީލުކޮށްދިނެވެ. ރިސޯޓްތަކުގައި އާންމުކޮށް ޝޯ ދެ އެވެ. އެކި އިވެންޓްތަކުގައި ވެސް ލަވަ ހުށަހަޅަ އެވެ.

ނިއު ޔޯކަށް ދިއުމާ ބެހޭ ގޮތުން ހިޝްމާ ބުނީ އެކަހަލަ ފުރުސަތެއް ލިބުމުން ވަރަށް އުފާވި ކަމަށެވެ.

"އެއީ ހަމަ ވަރަށް ބޮޑު މައިލްސްޓޯނެއް،" އޭނާ ބުންޏެވެ.

ޔޫއެންގައި ފަތްމިނިން ބޮޑުބެރު އެންމެން ވެސް ފޯރި ނެގި އެވެ.

"ރާއްޖެއިން ބޭރަށް ގޮސް ދޭ ޕާފޯމަންސްތަކުން އަބަދުވެސް ވަރަށް ޕޮޒިޓިވް ރިއެކްޝަނެއް ލިބޭ،" އޭނާ ބުންޏެވެ.

މިއީ ރާއްޖޭގެ ގުރޫޕެއް ޔޫއެންގައި ތަމްސީލްކުރި ފުރަތަމަ ފަހަރެވެ. ފަތްމިނިއަށް ލިބުނު މި ފުރުސަތުގައިދިވެހި ސަގާފަތުގެ ސިފަތައް ދައްކާލި އެވެ. 

މެލޭޝިއާގައި އަންހެން 40 ޓީމާ ވާދަކޮށްގެން، މުބާރާތަކުން އެއް ވަނަ ހޯދި އެވެ. މިއީ އެމީހުންނަށް ލިބުނު ފަހުރުވެރި ކާމިޔާބީއަކަށް ވިޔަސް އެކަން މާ ބޮޑަށް ފާހަގަނުކުރެވުނު ކަމަށް ހިޝްމާ ބުންޏެވެ.

މީގެ އިތުރުން، ކްރޫޒްޝިޕެއްްގައި އެހެން ބޮޑުބެރު ގުރޫޕަކާ އެކު ވެސް ފަތްމިނިން ޝޯއެއް ދިނެވެ.

ފަތްމިނިގެ އަމިއްލަ ލަވަތައް އެބަ ހުއްޓެވެ.  އޭގެ ތެރޭގައި 'ކަނބަލުންގެ ޝުއޫރު' ޔޫޓިއުބުގައި މިލިއަން ވިއުސް ހޯދި އެވެ. މިފަހުން އީދަށް ހެދި ލަވަ ވެސް މަގުބޫލެވެ.

މިހާތަނަށް މާލޭގައި ނަންކިޔާ، ހުރިހާ ބޮޑު ގުރޫޕަކާ އެކު ހެން ފަތްމިނި ވަނީ ޕާފޯމްކޮށްފަ އެވެ.

ބައެއް މީހުންގެ ފާޑުކިއުންތައް އަމާޒުވި ނަމަވެސް އެއަށް ބެލުމެއް ނެތި، މި ގްރޫޕް އަންނަނީ ހަރަކާތްތެރިވަމުންނެވެ. ގުރޫޕް ދަނީ ކުރިއަށެވެ.

"ވަރަށް ތަފާތު ކުރުންތަކާ ދިމާވޭ ފެށިގެން އައި އިރުއްސުރެ އަހަރެމެންނަކީ އަންހެނުން ކަމުގައި ވުމުން. ބައެއް ފަހަރު ޝޯ ކުޅުވާފައި، ފައިސާ ނުދިނުމާއި ފައިސާ ދިނުން ލަސްކުރުން ވެސް ހިމެނޭ،" ހިޝްމާ ބުންޏެވެ.

"މިކަމުގެ ސަބަބުން ކޮންޓްރެކްޓް ހެދުމާއި، އެޑްވާންސް ޕޭމަންޓް ހޯދުން ފަދަ ކަންތައް މިހާރު ދަސްވެއްޖެ." 

މިއަދު އޮލިމްޕަސްގައި އޮންނަ ނޮއިސްއަކީ ފަތްމިނިން އެމީހުންގެ ހުނަރު ދައްކާލަން ލިބުނު އާ ޕްލެޓްފޯމެކެވެ. ނޮއިސްއާ އެކު މީގެ ކުރިން މަސައްކަތްކޮށްފައި ނެތަސް ފަތްމިނިން ބުނާ ގޮތުގައި މިއީ މާލޭގައި މިގޮތަށް ބޮޑު ޝޯއެއްގައި އެމީހުން މި ފަހުން ބައިވެރިވާ ފުރަތަމަ ފަހަރެވެ.

ނޮއިސްގައި ފެންނާނީ ފަތްމިނީގެ އަމިއްލަ ލަވަތަކެވެ. ގައުމީ ލަވަތައް ވެސް ހުންނާނެ އެވެ. ލޯބީގެ ލަވަތަކެއް ވެސް ހިމެނެ އެވެ.