މަގޭ ރިވިއު: 'ރޮބޭމޭން ދަ މޫވީ'

ދަރިން ގޮވައިގެން މި މާލޭގައި މިދިޔަ ބަންދުގައި ކުރާނެ ކަމެއް ނޭނގިގެން އުޅެމުން އެންމެ ފަހުން ޓިކެޓު ނެގީ 'ރޮބޯމޭން' ފިލްމު ބެލުމަށެވެ. ދަރިން ނަލަކޮށްލައިގެން ފިލްމަށް ދިއުމުން އެ މީހުން ވެސް ތިބީ އުފަލުންނެވެ. މުޅި ހަޔާތުގައި ވެސް އަލަށް އޮލިމްޕަހުގެ ދޮރާށިން ދިވެހި ފިލްމެއް ބަލަން ވަން ފުރަތަމަ ފަހަރުކަމުންނެވެ.

ހަވީރު 4:30ގައި އޮތް ޝޯގެ ގަޑި ކައިރިވި އިރު ސިނަމާގެ ދެބައިކުޅަ އެއްބައިހެން ފުރިއްޖެ އެވެ. އުނގުގައި ތިބެވޭ ވަރު ކުދިންނާއި އެކި ފުރައިގެ ކުދިން އައިސް ތިއްބެވެ.

ފިލްމު ފެށި އިރު ނާންނަ މީހުން ގޮނޑި ހޯދައި ހަމަޖެހިލަން އިރުކޮޅެއްވި އެވެ. އަހަރެން ކަހަލަ ދުރާލާ ގޮސް ތިބި މީހުންނަށް މިކަން ވީ ފޫހި ކަމަކަށެވެ. ފަށައިގަތް އިރު ކުޑަކޮށް ވާނުވާ ނޭނގިގެން އަހަރެން ވެސް އުޅެން ޖެހުނީ މި މީހުންނާ ހެދި އެވެ.

ފިލްމުގެ ކުރިމަރާނުލާ ފިލްމާ ގުޅޭ ކޮންމެވެސް ވާހަކައެއް ދައްކާލާނަމެވެ. ހިޔާލީ ވާހަކައެއްގެ މައްޗަށް ބިނާކޮށް އޯކޭޒް އިންކް އާއި މީޑިއާނެޓްގެ ވީޑިއޯ ކްލަބު ގުޅިގެން އުފައްދައި 26 ސެޕްޓެމްބަރުގައި ޕްރިމިއާކުރި މި ފިލްމުގައި 2040 ވަނަ އަހަރު ދައްކާލާކަން ޓްރެއިލާ ބެލި އެންމެންނަށް ވެސް އެނގޭނެ އެވެ. މި ބައި ދެއްކި އިރު ލިބުނީ ހޮލީވުޑް ވައިބެކެވެ. ކުރިއަރައި ތަހުޒީބުވެފައިވާ މުޅިން އެހެން މާލެއެެއްގެ މަލަމަތި ވެސް ފެނުނެވެ.

ފިލްމަށް ދިރުން ގެނެސްދިން ދެ އެކްޓަރުންނަކީ މީގައި ހިމެނޭ ޗައިލްޑް އާޓިސްޓުންނެެވެ. މި ދާއިރާއަށް އަލަށް ނުކުތް ކުޑަކުދިން ކަމަށްވާ އަމީލިއާ ނަސްރުﷲ ޝަކީބު އާއި މިޝާ އިސްމާއިލް ނިޔާޒްގެ އެކްޓިންއަށް އަހަރެން ދޭނީ 100 އެވެ. އެކްޓް ކުރާހެން ހީވެސްނުވެ އެވެ. އެވަރަށް އެ ކުދިން ތިބީ ކެރެކްޓާގެ ތެރެއަށް ވަދެފަ އެވެ. އެ ކުދިންގެ ދުވަހީ ދިރިއުޅުމާއި ސްކޫލް މާހައުލު ދައްކާލަނީ ވަރަށް އުފާވެރި ގޮތަކަށެވެ. މި ބައި ކުޑަކޮށް ލަސްހެން ހީވީ ކުންނު ބަލާހިތުން ހުރި ވަރުން ކަމުގައި ވެދާނެ އެވެ.

ރޮބޯމޭންގެ ފިލްމެއް ކަމުން ނެށުން އޭގައި އޮންނާނެކަން ޔަގީންވާނެ އެވެ. ފިލްމުގައި ދައްކާ ޖޫނިއާ ރޮބޯ ޗެލެންޖްގައި މި ދެ އެކްޓަރުން ނެށި އިރު އާއްމުކޮށް އަހަރެމެންނަށް ފެންނަ އިންޑިއާގެ ނެށުމުގެ ޝޯތަކުގައި ދައްކާ ކުދިންނާ އެއްވަރު ހުނަރެއް ނެތަސް، ނަށަން ވެސް މި ދެ ކުދިން ކުޅަދާނަ އެވެ. ފިލްމުގައި އިތުރަށް ދައްކާލާ ކުދިން ވެސް މޮޅެވެ.

ފިލްމުގެ ޕްލޮޓުން ބޮޑެތި މީހުންނަށް މެސެޖެއް ދޭނެއޭ ފިލްމު ބަލަން ދިޔުމުގެ ކުރިން އަހަަންނަށް ވެސް ހަބަރުތަކުގެ ސުރުހީތަކުން ފެނުނެވެ. އެކަމަކު ދެން މާ މުހިއްމު މެސެޖެއް ދެވޭނެ ކަމަކަށް އޭރު ގަބޫލެއްނުކުރެވުނެވެ.

އިބްރާހިމް ވިސާން (ކަނޑި) ޑައިރެކްޓްކޮށް މުހައްމަދު މުންތަސިރުގެ ވާހަކައަކަށް ބިނާކޮށްފައިވާ މި ފިލްމުން ލިބުނީ ދިވެހި މުޖުތަމައުއާ ވަރަށް ގުޅޭ މެސެޖެކެވެ. އަދި ކޮންމެހެން ވެސް ދިވެހިން ހޭލުންތެރިވެ ދަރިން ތަރުބިއްޔަތު ކުރުމުގައި ސަމާލުކަން ދޭން ޖެހޭ ކަމެކެވެ. ރޮބޯމޭންގެ ސަބަބުން ކުއްޖަކަށް ހިތްބަރުކަމެއް ލިބިފައި އޮތް ނަމަ އެކަން ވެސް ހިތުން ފޮހެލަން ބާރުއެޅި އެވެ.

ފިލްމުގެ ވިލަންގެ ބައި ނުވަތަ ނެގެޓިވް ރޯލް ކުޅެފައިވާ މީހުން ވެސް އެކަމަށް ކުޅަދާނަ އެވެ. އުމަރުގެ ކެރެކްޓާ ކުޅުނު ޝާބިން އާތިފް އެ ރޯލު ކުޅުނު ގޮތް ރަނގަޅެވެ. އެކަމަކު ކަމުނުދިޔަ ތަންކޮޅެއް އެބަ އޮތެވެ.

އުމަރު އާއި އޭނާގެ އެކުވެރިން، އެ މީހުންގެ މަޝްވަރާތައް ކުރުމަށް ދަނީ ވަރަށް އާއްމު ތަނަކަށެވެ. އަހަރެމެން އަހަރެމެންގެ ދަރިން ގޮވައިގެން ހަވީރު ފިންޏަށް ދާ ތަންތަނުގައި ޖެހިގެން ހުންނަ މޭޒުގައި އެފަދަ ބަޔަކު ތިބުމަކީ މުޖުތަމައުގެ ހަގީގަތްވިޔަސް އަދި މި މެސެޖު ދަރިންނަށް ދޭން ތައްޔާރެއް ނޫނެވެ. މިއީ އަހަރެންގެ ހިޔާލެވެ.

ފިލްމުގައި ހެނދުނު ސަޔަށް ސޮސެޖް ދިނުން ވެސް އަހަންނަށް ކަމުނުދިޔަ އެވެ. މިއީ ފިލްމުން ލިބެންވާ މެސެޖާއި ފިލްމުގެ މޮޅުކަމާ މެދު އެހެން މީހުން ސުވާލު ނުއުފައްދާ އަދި ނޯމަލް ކަމެއް ހެން ހީވިޔަސް، މިފަދަ ފިލްމަކުން ސިއްހަތަށް ގެއްލުން ހުރި ސޮސެޖް ފެނިގެން ނުވާނެ ކަމަށް އަހަރެން ގަބޫލުކުރަމެވެ.

ދެން އޮތީ އެންމެ މުުހިއްމު އެއް ވާހަކަ އެވެ. މި ފިލްމް ބަލަން ދިޔައީ ހަތް އަހަރާއި 11 އަހަރާ ދެމެދުގެ އުމުރުފުރައިގެ ފަސް ކުދިން ގޮވައިގެންނެވެ. ފިލްމު ނިމުމުން އެ ކުދިންނާ ފިލްމާ ގުޅޭ ގޮތުން ސުވާލު ކުރީމެވެ. ފިލްމުގައި ވީ ގޮތް ކިޔައިދޭން އެނގޭތޯ އަދި ދެނެގަނެވުނުތޯ ބެލުމަށެވެ. މަހުދީ އަހުމަދުގެ ސްކްރީންޕްލޭ ކުޑަކުދިންނާ ގުޅޭ ގޮތަށް އަދި އެ މީހުންނަށް ފަހުމްވާ ގޮތަށް ގެނެސްދެވިފައިވާކަން ޔަގީންކުރުމުގެ ބޭނުމުގަ އެވެ.

އޮލިމްޕަހުގައި އަޅުވާ ފިލްމުތައް ބަލަން ދާއިރު ފިލްމުގެ ޑައެލޮގަށް ބައެއް ފަހަރަށް އޯޑިއަންސުން އެއްލާލައި ބޭއަދަބީ ބަސްތަކާއި ހޯއްގޮވުންތަކާ ކުރިމަތިލާން ޖެހެ އެވެ. ރޮބޯމޭން ފިލްމުގައި އެފަދަ ކަމެއް ނުފެނެ އެވެ. އެކަމަކު ސްކްރީނުން ރޮބޯމޭން ދައްކާލާއިރު ކުދިން ބޭއިހްތިޔާރުގައި ވެސް އޭނާއަށް ސަޕޯޓްކޮށް ބުނެލާ "ޔޭ ރޯބޯމޭން!" ފަދަ ބަސްތައް ސިނަމާގެ ތެރެއިން އިވެ އެވެ. 

ކުޑަކުދިންގެ އޯޑިއަންސް ބޮޑުވާނެ މި ފިލްމު ބަލަން ދިޔައީ ކުދިން ވާހަކަ ދައްކާ އަޑާއި ރޯ އަޑުގެ ސަަަބަބުން ފިލްމުގެ ތަޖުރިބާ އެންމެ ފުރިހަމަނުވާނެ ކަމަށް ދެކިގެނެވެ. އެކަމަކު ހީކުރިވަރަށް ވުރެ ކުދިން މާ މަޑުމައިތިރި އެވެ. ގިނަ ކުދިން ތިބީ ފިލްމަށް ގޮސް ހުސްވެފަ އެވެ.

އޮލިމްޕަހަށް ފަހު މިހާރު ފިލްމު ރަށްރަށުގައި އަޅުވަން އެ ދަނީ ތައްޔާރުވަމުންނެވެ. މޮޅު، ރީތި ފިލްމެކެވެ. މި ފިލްމު ބަލަން ހޭދަކުރި ފައިސާ ހަމަ އެކަމަށް އެކަށީގެންވެ އެވެ. އާއްމުކޮށް މޮޅަށް އިޝްތިހާރުކޮށް ހަދާ ފިލްމުތަކަށް ގޮސް ހިތްހަމަނުޖެހިގެން ނުކުންނަން ޖެހޭ ކަހަލަ ތަޖުރިބާއެއް ނޫނެވެ. 'ރޮބޭމޭން ދަ މޫވީ' ހީކުރިވަރަށް ވުރެ މާ ފުރިހަމަ އެވެ.