ރެވިއޯ ބޭންޑްގެ ލަވަ 'ވޭ އުމުރަށް'ގެ ވީޑިއޯއިން މަންޒަރެއް
'އުދުހިލާ' ފަދަ މަގުބޫލު ލަވަތައް ގެނެސްދީފައިވާ ދިވެހި ޕޮޕް ރޮކް ބޭންޑް ރެވިއޯ އިން ވަނީ ހުކުރު ދުވަހު އާ ވީޑިއޯ ލަވައެއް ނެރެފަ އެވެ.
ޒުވާނުންގެ މެދުގައި މަގުބޫލު މި ބޭންޑްގެ 'ވޭ އުމުރަށް' ފެންނަނީ ޕޮޒިޓިވް ވައިބެއް ގެނެސްދޭ ލޯބީގެ އަޕްބީޓް ލަވައެއްގެ ގޮތުގަ އެވެ. ރެވިއޯ އިން ބުނި ގޮތުގައި މިއީ އެ މީހުން އަލަށް ނެރެން އުޅޭ އަލްބަމްގައި ހިމެނޭ ލަވައެކެވެ.
ބޭންޑުން ބުނީ މި ލަވައިގެ ވީޑިއޯ ހެދުމަކީ ވަރަށް ކުރާހިތުން ކުރި މަސައްކަތެއް ކަމުގަ އެވެ.
ލީޑް ލަވަކިޔުންތެރިޔާ އަހުމަދު ހުމާމް (ޒޯލޯ)ގެ ޅެމަކަށް ބޭންޑުން މިއުޒިކް ހަދާފައިވާ ލަވަ އަޑުއަހާލަން ފަސޭހަ އެވެ.
މި ލަވަ އާއި ލަވައިގެ ވީޑިއޯ ހެދުމުގެ ފަހަތުގައި އެން ނައިން ސްޓޫޑިއޯ އާއި މަދޮޝިޕްގެ މަސައްކަތް ވެސް ހިމެނެ އެވެ.
އެއް ދުވަސްތެރޭ ހާހެއްހާ ވިއުސް ލިބިފައިވާ މި ލަވަ ޒުވާނުންގެ މެދުގައި އަންނަނީ މަގުބޫލުވަމުންނެވެ.