ފިލްމީ ފަންނާނުންނާ އެކު އޮލިމްޕަހަށް 'ތަރިންގެ ރޭ' އަންނަނީ

ދިވެހި ފިލްމީ ތަރިންގެ ޝޯއެއް މާދަމާ ރޭ އޮލިމްޕަހުގެ ސްޓޭޖްގައި ބާއްވަން ހަމަޖައްސައިފި އެވެ.

ތަޖުރިބާކާރު ޑައިރެކްޓަރު ފާތިމަތު ނަހުލާގެ އިސްނެގުމަކަށް ބާއްވާ ޝޯއިން ފެނިގެން ދާނީ ރާއްޖޭގެ ފިލްމީ ދާއިރާގައި މިހާރު ވިދަމުން އަންނަ ތަރިންނެވެ. މި އަހަރުގެ އީދު ޝޯތަކުގައި އެ މީހުން ރަށްރަށުގައި ބޭއްވި ޝޯތަކުގެ ހުށަހެޅުންތަކާއި އާ އައިޓަމްތައް ވެސް މި ޝޯއިން ފެނިގެންދާނެ އެވެ.

މި ޝޯގައި އާމިނަތު ރަޝްފާ (އާޝާ) އާއި އިސްމާއިލް ޖުމެއިހް (ޖުމާ)ގެ ހުށަހެޅުމެއް ފެނިގެންދާނެ އެވެ. މިފަހުން އާޝާ ކުޅެފައިވާ އެންމެ މަޝްހޫރު ދެ ލަވަ ކަމުގައިވާ 'ތޫފާނީ އިޝްގް' އާއި 'ޝާހީ ލޮލުގައި' އެއްކޮށްލައިގެން ހޭވައްލާ ބޮޑުބެރު ގްރޫޕާ އެކު ހުށަހަޅައިދޭ ޕާފޯމަންސެއް އޭގެ ތެރޭގައި ހިމެނެ އެވެ. މީގެ އިތުރުން، 'ގުނަމުން މިދާ' ލަވަ ވެސް ތަފާތު ގޮތަކަށް ފެނިގެންދާނެ އެވެ.

މި ޝޯގެ ޓިކެޓްތައް މިހާރު ގިނަ އަދަދަކަށް ވިކިފައިވާ ކަމަށް ޝޯ އިންތިޒާމު ކުރާ އޮފިޝަލަކު ބުންޏެވެ. ޓިކެޓުގެ އަގަކީ 300 ރުފިޔާ އާއި 200 ރުފިޔާ އެވެ.

އެންމެ ފަހުން ފިލްމީ ތަރިންގެ މިފަދަ ހުށަހެޅުންތަކެއް މާލެއިން ފެނުނީ 2012ގައި ބޭއްވި 'ސްޓާސް ނައިޓް' ޝޯއިންނެވެ.