ކަރުނާޓަކާގައި އޮތް ފިލްމު ފެސްޓިވަލުން އެވޯޑް ލިބުނު ދިވެހި ފަންނާނުންނާ އެކު މިނިސްޓަރު އިބްރާހިމް ވަހީދާއި އެހެން ބައެއް ބޭފުޅުން
ކަރުނާޓަކާ އިންޓަނޭޝަނަލް ފިލްމު ފެސްޓިވަލްގައި އެވޯޑް ހޯދި ދިވެހި ފަންނުންނާ އެވޯޑް ހަވާލުކޮށްފި
އިންޑިއާގެ ކަރުނާޓަކާ އިންޓަނޭޝަނަލް ފިލްމް ފެސްޓިވަލްގައި އެވޯޑް ލިބުނު ދިވެހި ފަންނާނުންނަށް އެވޯޑު ހަވާލުކުރަަން މޯލްޑިވްސް ސޮސައިޓީ ފޯ ޕާފޯމިން އާޓްސް (އެމްއެސްޕީއޭ) އިން ހާއްސަ ހަފްލާއެއް އަންގާރަ ދުވަހުގެ ރޭ ބާއްވައިފި އެވެ.
އޮލިމްޕަހުގެ ބޭކްސްޓޭޖްގައި އޮތް މި ހަފްލާ ޝަރަފުވެރިކޮށްދެއްވާ އެވޯޑްތައް ހަވާލުކޮށް ދެއްވީ މިނިސްޓަ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާޓްސް އިބްރާހިމް ވަހީދު އެވެ.
އެވޯޑް ލިބުނީ؛
-
މުހައްމަދު ޖުމައްޔިލް ނިމާލް: ބެސްޓް އެކްޓާ، ޑާކްރެއިން އެންޓަޓެއިންމަންޓްގެ 'ގޮށްރާޅު'ން
-
ވާޝިޔާ މުހައްމަދު: އެންމެ މޮޅު ސަޕޯޓިން އެކްޓަރެސް، ޔޫސުފް ޝަފީއުގެ ޔޫއްޕެ ޕްރޮޑަކްޝަން އާއި ޝައި ޕްރޮޑަކްޝަންގެ "ހެހެސް" އިން
-
މޫސާ އިބްރާހިމް (ދަބާ): އެންމެ މޮޅު ސިނެމެޓޮގްރާފާ، 'ހަހެސް' އިން
-
އަބްދުﷲ މުއާޒް: ކުރު ފިލްމު ބައިން އެންމެ މޮޅު ޑައިރެކްޓަރު، ފިލްމު 'ރުގިއްޔާ'
-
އަހުމަދު ޝަރީފް: ކުރު ފިލްމު ބައިން އެންމެ މޮޅު ސަޕޯޓިން އެކްޓަރު، ފިލްމު 'ރުގިއްޔާ'
މި ފެސްޓިވަލްގައި 100 އަށް ވުރެ ގިނަ ފިލްމު ބައިވެރިކުރި އެވެ. އިންޑިއާގެ އެކި ސްޓޭޓްތަކުގެ ފިލްމުގެ އިތުުރުން ބޭރު އެހެން ގައުމުތަކުގެ އުފެއްދުންތައް ވެސް ވާދަކުރި އެވެ. ރާއްޖެއިން ފިލްމުތައް ބައިވެރިކުރީ އެމްއެސްޕީއޭގެ ފަރާތުންނެވެ.
އެމްއެސްޕީއޭގެ ޗެއާމަން މުހައްމަ ރަޝީދު (ދަރާ) ވިދާޅުވީ ދިވެހި ފިލްމު އިންޑަސްޓްރީ ރާއްޖޭގެ ތޮށިން ބޭރުކުރެވޭތޯ މަސައްކަތްކުރުމުގެ ގޮތުން ފެސްޓިވަލްތަކުގައި ދިވެހި އުފެއްދުންތަކާއި ފަންނާނުންނަށް ފުރުސަތު ހޯދައިދިނުން މަސައްކަތް ކުރަމުން އަންނަ ކަމަށެވެ.
މޯލްޑިވްސް އިންޓަނޭޝަނަލް ފިލްމު ފެސްޓިވަލްގެ ނަމުގައި ފިލްމު ފެސްޓިވަލެއް ބާއްވަން ތައްޔާރުވަމުން އަންނަ ކަމަށް ވެސް އޭނާ ވިދާޅުވި އެވެ. އޭގެ އިތުރުން އޭނާ ވިދާޅުވި ގޮތުގައި މި އަހަރު ފަހުކޮޅު ރާއްޖެއިން ބޭރުގައި ދިވެހި ފިލްމު ފެސްޓިވަލެއް ކުރިއަށް ގެންދަން ވެސް އަންނަނީ މަސައްކަތްކުރަމުންނެވެ.
މި ހަފުލާގައި އެމްއެސްޕީއޭއިން އިއުލާންކުރި އެންމެ މުހިންމު ކަމަކީ އެތަނުގެ ފުރަތަމަ ފިލްމު އެވޯޑްސް އެވެ. އެގޮތުން އެ އެވޯޑް ދިނުން ވެސް މި އަހަރު އޮންނާނެ ކަމަށް ރަޝީދު ވިދާޅުވި އެވެ.
މިނިސްޓަރު އިބްރާހިމް ވަހީދު ވިދާޅުވީ ބައިނަލްއަގުވާމީ ފެންވަރުގެ ސިނަމާއެއް ހުޅުމާލޭގައި އަޅާނެ ކަމަށެވެ. އެއީ މިހާރު ދިމާވެފައިވާ ޖާގަ ނެތުމުގެ މައްސަލައަށް ހައްލެއް ކަމަށް އޭނާ ވިދާޅުވި އެވެ.