އެމެކްސްއާ އާ ގުޅިގެން ދިވެހި އާ ޖީލަށް މާލީ ހައްލުތައް ހޯދައިދޭނަން: ބީއެމްއެލްގެ ސީއީއޯ ޝަރީފް

އެމެރިކަން އެކްސްޕްރެސް (އެމެކްސް)އާ ގުޅިގެން ދިވެހި އާ ޖީލަށް ބޭނުންވާނޭ ޒަމާނީ، ފަސޭހަ މާލީ ހައްލުތައް ބޭންކް އޮފް މޯލްޑިވްސް (ބީއެމްއެލް) އިން ކުރިއަށް އޮތް ތަނުގައި ހޯދައިދޭނެ ކަމަށް އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވެއްޖެ އެވެ. 

ވީ ކިހިނެއް؟ - އެމެކްސްގެ ހިދުމަތްތައް ބީއެމްއެލްއިން ފެށިތާ 20 އަހަރު ފުރުމުގެ މުނާސަބަތުގައި ރޭ ހުޅުމާލެ ފަރުކޮޅުގައި ބޭއްވި ހަފްލާގައި ވާހަކަދައްކަވަމުން ޝަރީފް ވިދާޅުވީ 2004ގައި އެމެކްސްއާ އެކު ބޭންކުން ގާއިމްކުރި ގުޅުމުގެ ސަބަބުން  ބީއެމްއެލްއަށް ގިނަ ކުރިއެރުންތަކާއި ކާމިޔާބީތައް ހޯދިފައިވާ ކަމަށެވެ. 

ޝަރީފް ވިދާޅުވި ގޮތުގައި ބީއެމްއެލް އާއި އެމެކްސްގެ ގުޅުމުގެ އަމާޒު މިހާރު ހުރީ ޒަމާނީ އީޖާދީ ހިދުމަތްތަކެއް ތައާރަފްކުރުމަށް ކަމަށެވެ. 

"މިއީ ކުރިއަށް ބެލުމުގެ ވަގުތު. ފައިސާ ދެއްކުމާއި ބޭންކިންގެ ހިދުމަތްތަކަށް ޒަމާނާ އެކު ބަދަލުތައް އަންނައިރު އެމެކްސްއާ އެކު، އަޅުގަނޑުމެން މިވަނީ އާ އީޖާދުތަކުގެ ކުރީ ސަފުގައި ތިބުމަށް އަޒުމް ކަނޑައަޅާފައި. ޑިޖިޓަލް ބަދަލުތައް ގެންނަން މަސައްކަތްކުރުމާ އެކު، ރާއްޖޭގެ އާ ޖީލުތަކުން ބޭނުންވާ މާލީ ހައްލުތައް ފޯރުކޮށްދޭން މަސައްކަތްކުރާނަން،" އެމެކްސް އާއި ބީއެމްއެލްގެ ޓީމް ގުޅިގެން ކުރާ މަސައްކަތް ފާހަގަކުރައްވައި ޝަރީފް ވިދާޅުވި އެވެ. 

ތަފްސީލް - އެމެކްސްއާ ބީއެމްއެލްއިން ގުޅުމަކީ ރާއްޖެ ދުނިޔޭގެ ފެންވަރުގެ ޕޭމަންޓް ނިޒާމަކަށް ހުޅުވިގެން ދިޔުމުގެ ބިންގާކަން ފާހަގަކުރައްވައި ޝަރީފް ވިދާޅުވީ:

ކްރެޑިޓް ކާޑް އަލަށް ތައާރަފްކުރަން މަސައްކަތް ކުރިއިރު ބީއެމްއެލްގައި އޭރު އުފެއްދި ކާޑް ޑިޕާޓްމަންޓުގެ އެންމެ އިސް ބޭފުޅެއްގެ ގޮތުގައި ހުންނަވައިގެން ޝަރީފް ކުރެއްވި މަސައްކަތް އޭނާ ހިސާކުރެއްވި އެވެ. އެއީ ފަހުރުވެރި މަސައްކަތެއްގެ ގޮތުގައި ފާހަގަކުރައްވައި ޝަރީފް ވިދާޅުވީ އެއީ ގޮންޖެހުން ބޮޑު މަސައްކަތެއް ނަމަވެސް އެމެކްސްގެ އެހީތެރިކަމާ އެކު ހުރަސްތައް ގިރާކުރަން ފަސޭހަވި ކަމަށެވެ. 

"ބޭންކުގައި އަލަށް އުފެއްދި ކާޑު ޓީމު އިސްވެ ހިންގުމުގެ ޝަރަފް އަޅުގަނޑަށް އޭރު ލިބުނު. އަޅުގަނޑުމެންނަށް އެ ދުވަސްވަރު ގިނަ ގޮންޖެހުންތަކާ ކުރިމަތިވި. ރާއްޖެއަށް [ކުރެޑިޓް ކާޑަކީ] މުޅިން އާ ހިދުމަތަކަށް ވުމާ އެކު އެކަމާ ގުޅޭ މައުލޫމާތާއި ތަޖުރިބާ އަޅުގަނޑުމެންގެ ކިބާގައި މަދުވި ނަމަވެސް، އަޅުގަނޑުމެން އެ މަސައްކަތް ފުރިހަމަކުރީ ޖޯޝާއި ފޯރީގައި،" ޝަރީފް ވިދާޅުވި އެވެ. 

"މާ ބޮޑު ތަޖުރިބާއެއް ނެތް ނަމަވެސް އަޅުގަނޑުމެންގެ މައިގަނޑު އަމާޒަކަށް ވީ އެއްވެސް ލަސްކަމެއް ނުގެނެސް އަދި ހަމައެހެންމެ ހުއްޓުމެއް ނެތި ކަސްޓަމަރުންނަށްމި ހިދުމަތް ފޯރުކޮށްދިނުން." 

އެމެކްސް އާއި ބީއެމްއެލް ގުޅިގެން ކުރިއަށް ގެންދިޔަ ކާމިޔާބު ހަރަކާތްތަކުގެ ގޮތުގައި ޝަރީފް ފާހަގަކުރެއްވީ: 

"ފަތުރުވެރިކަމުގެ ސިނާއަތަށް އެހީތެރިވެދީ، ދުނިޔޭގެ އެންމެ މަގުބޫލު މަންޒިލަކަށް ރާއްޖެ ހެދުމަށް އެމެކްސްގެ ފުޅާ ނެޓްވޯކާ އެކު މަސައްކަތް ކުރުމަކީ އަޅުގަނޑުމެންނަށް ލިބޭ ފަހުރެއް،" ޝަރީފް ވިދާޅުވި އެވެ. 

ފާހަގަކޮށްލެވޭ - ބީއެމްއެލްއަކީ ރާއްޖޭގައި އެމެކްސް ބަލައިގަންނަ ހަމައެކަނި ބޭންކެވެ.

އެނގުން މުހިންމު - ބީއެމްއެލްއަކީ 300،000 އަށް ވުރެ ގިނަ ކަސްޓަމަރުންނާއި 8،000 އަށް ވުރެ ގިނަ މާޗެންޓުންނާ އެކު ރާއްޖޭގައި އެންމެ ފުޅާ ދާއިރާއެއްގައި ކާޑު ދޫކުރުމާއި ކާޑުގެ ހިދުމަތް ބަލައިގަންނަ ބޭންކެވެ.