ހުޅުމާލެ ވޯޓާ ތީމް ޕާކު އަލުން ތަރައްގީކުރަން އީއައިއޭ ހަދަނީ

ހުޅުމާލޭގެ އިރުމަތީ ފަރާތުގައި ހަދަން ފަށާ، ހުއްޓިފައިވާ ވޯޓާ ތީމް ޕާކު ސަރަހައްދު އަލުން ތަރައްގީކުރަން ނިންމާފައިވާ ކަމަށާއި އެކަން ބަޔަކާ ހަވާލުކުރުމުގެ މަސައްކަތް ކުރަމުން އަންނަ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ބުނެފި އެވެ.

ވީ ކިހިނެއް؟ - ރައްޔިތުންގެ މަޖިލީހުގެ މާލިއްޔަތު ކޮމެޓީގައި މެންބަރަކު ކުރި ސުވާލަކަށް ޖަވާބު ދެއްވަމުން އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވީ ވޯޓާ ތީމް ޕާކަކާ އެކު ކުޑަކުދިން ކުޅޭ ސަރަހައްދެއް ތަރައްގީކުރަން މިހާރު ނިންމާފައިވާ ކަމަށެވެ.

އެނގުން މުހިއްމު - ހުޅުމާލެ/ހުޅުލޭ ހައިވޭއަށް ހުޅުމާލެއިން އަރާ ހިސާބުގައި އަދި ކުރީގެ ބަސް ޓާމިނަލްއާ އިންވެގެން އޮތް ބޮޑު ބިން ވޯޓާ ފްރޮންޓު ކިޔާ ކުންފުންޏަކަށް ދިނީ ވޯޓާ ތީމް ޕާކެއް ތަރައްގީކުރާށެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި އެ މަސައްކަތް އެ ކުންފުންޏާ ހަވާލުކުރީ 2018-2019 ހިސާބުގައި ނިންމާ ގޮތަށެވެ. ނަމަވެސް ހުޅުމާލެއިން އެއް ބަޔަކަށް ދިން އެންމެ ބޮޑު ބިމުގައި ފެށި އިންވެސްޓްމަންޓް ހުއްޓި، މިހާރު އެތަން އޮތީ ފަޅަށެވެ.

ތަފްސީލް - އެ ސަރަހައްދަށް ހަދަން ނިންމާފައިވާ ގޮތާ ގުޅޭ ގޮތުން މިއަދުގެ ކޮމެޓީ ބައްދަލުވުމުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ފަޒުލް ވިދާޅުވީ އެ ސަރަހައްދު ޕްލޭންކޮށް ޑިޒައިންކުރުމުގެ މަސައްކަތް ސްރީ ލަންކާގެ ބަޔަކާ އެކު ކުރިއަށް ގެންދަން އެމްއޯޔޫއެއްގައި ސޮއިކޮށް މަސައްކަތް ކުރިއަށް ދާ ކަމަށެވެ.

"އީއައިއޭ ޕްރޮސެސް މިހާރު އެބަ ދޭ ކުރިއަށް. އީއައިއޭ ލިބުނުހާ އަވަހަކަށް އެތަނުގެ ބާކީ އޮތް ތަން އަޅުގަނޑުމެންގެ ހުޅުމާލޭން ނަގާ ވެލިން ހިއްކައިގެން އެ ސަރަހައްދު އިތުރަށް ތަރައްގީކުރުން އަމާޒަކީ،" އޭނާ ވިދާޅުވި އެވެ.

ފަޒުލް ވިދާޅުވީ އަމާޒަކީ ކުރިއަށް އޮތް އަހަރެއް ތެރޭ މަސައްކަތް ފަށާ، އެޑްވެންޗާ ޕާކެއް ވީހާވެސް އަވަހަކަށް ތަރައްގީކުރުން ކަމަށެވެ.

ވޯޓާ ފްރޮންޓާ އެކު ކުރިން ހެދި އެއްބަސްވުން އުވާލާފައިވާއިރު އެ ކުންފުނިން ކުލީގެ ގޮތުގައި އެޗްޑީސީއަށް ދައްކަން ޖެހޭ 10 މިލިއަން ރުފިޔާ އެބަ އޮތް ކަމަށް ފަޒުލް ވިދާޅުވި އެވެ. އޭނާ ވިދާޅުވި ގޮތުގައި އެޗްޑީސީގެ ފަރާތުން މާލީ ބަދަލެއް ހޯދަން ވެސް އެ ކުންފުނިން ބޭނުންވެ އެވެ. އެ ބަދަލުގެ ކަންކަން ވެސް ކޯޓު މަރުހަލާއިން ނިމޭނެ ކަމަށް އޭނާ ވިދާޅުވި އެވެ.

ފަޒުލް ވިދާޅުވީ އެ މަޝްރޫއާ އުޅޭ ގާތްގަނޑަކަށް 500،000 ޑޮލަރު ހޯދުމުގެ މަސައްކަތް ކޯޓު މެދުވެރިކޮށް އެޗުޑީސީން ކުރަމުން އަންނަ ކަމަށެވެ.