ބޭރު ފައިސާ ގަނެ ވިއްކާތަނެއް. (ދައުރު ފޮޓޯ/ އަބްދުﷲ އަނޫފް ޖުނައިދް)
ބޭރު ފައިސާ މާރުކުރާ ލައިސަންސަށް އަލަށް އެދުނީ 49 ފަރާތުން؛ 163 ލައިސަންސް ބާތިލް: އެމްއެމްއޭ
އަލަށް އަމަލު ކުރަން ފެށި ބޭރު ފައިސާ ގަނެ ވިއްކުމުގެ ގަވައިދުގެ ދަށުންް ބޭރު ފައިސާ ގަނެ ވިއްކުމުގެ ލައިސަންސަށް އެދި މުޅިން އަލަށް ހުށަހެޅީ 49 ފަރާތަކުން ކަމަށާއި ކުރިން ލައިސަންސް ހުރި ފަރާތްތަކާއެކު އާ ގަވައިދުގެ ދަށުން ބޭރު ފައިސާ ގަނެ ވިއްކުމުގެ ލައިސަންސަށް އެދި ޖުމްލަ 98 ފަރާތަކުން ހުށަހަޅާފައިވާ ކަމަށް މަރުކަޒީ ބޭންކު އެމްއެމްއޭ އިން ބުނެފި އެވެ.
ވީ ކިހިނެއް؟ - "މަނީ ޗޭންޖިން ވިޔަފާރިއާ ބެހޭ ގަވާއިދު"ގެ ދަށުން ދެ ބާވަތެއްގެ ލައިސަންސް ދޫކުރެ އެވެ. އެއީ:
-
ޓިއާ-1: ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސަންސް
-
ޓިއާ-2: ބޭރު ފައިސާ ހަމައެކަނި ވިއްކުމުގެ ވިޔަފާރިކުރުމުގެ ލައިސަންސް
ތަފްސީލު - މަނީ ޗޭންޖިން ގަވައިދާ ގުޅޭގޮތުން ނޫސްވެރިންނަށް މައުލޫމާތު ހިއްސާކުރުމަށް މިއަދު އެމްއެމްއޭ އިން ބޭއްވި ސެޝަންގައި ވާހަކަ ދައްކަވަމުން އެ އިދާރާގެ އެސިސްޓެންޓު އެގްޒެކެޓިވް ޑިރެކްޓާ، ފައިނޭންޝަލް އެންޑް ކޮންސިއުމާ ސާވިސް ޑިވިޝަން އާއިޝަތު އަސްނާ ހަމްދީ ވިދާޅުވީ އާ ގަވައިދާ އެކު އައި އެންމެ ބޮޑު ބަދަލަކީ ދެ ފަންތިއެއްގެ ލައިސަންސް ދޫކުރަން ފެށުން ކަމަށެވެ.
އާ ގަވައިދާއެކު މިހާރު ވެސް ބޭރު ފައިސާ ގަނެ ވިއްކުމުގެ ލައިސަންސް ދޫކޮށްފައިވާ ވިޔަފާރިތަކުން އަލުން ލައިސަންސަށް އެދެން ޖެހޭނެކަން އަސްނާ ފާހަގަ ކުރެއްވި އެވެ.
"މިހާރު އަޅުގަނޑުމެންނަށް 98 ފަރާތަކުން ވަނީ ލައިސަންސަށް އެދި ހުށަހަޅާފައި،" އޭނާ ވިދާޅުވި އެވެ.
އޭގެ ތެރޭގައި މިހާރު ވެސް ބޭރު ފައިސާ ގަނެ ވިއްކުމުގެ ލައިސަންސް އޮންނަ 49 ފަރާތެއް ހިމެނެ އެވެ. އެއީ:
-
ޓިއާ-1 ގެ ލައިސަންސަށް 44 ފަރާތަކުން މުޅިން އަލަށް ހުށަހަޅާފައިވޭ، ކުރިން ލައިސަންސް އޮޮންނަ 35 ފަރާތަކާއެކު ޖުމްލަ 79 ފަރާތަކުން މި ލައިސަންސަށް ވަނީ އެދިފައި
-
ޓިއާ 2 ލައިސަންސަށް އެދި އަލަށް ހުށަހަޅާފައިވަނީ 5 ފަރާތުން، ކުރިން ލައިސަންސް އޮންނަ 14 ފަރާތަކާއެކު ޖުމްލަ 19 ފަރާތަކުން މި ލައިސަންސަށް އެދިފައިވޭ
އެމްއެމްއޭ އިން ބުނީ އާ ގަވައިދުގެ ދަށުން ލައިސަންސަށް އެދި ހުށަހެޅުމުގެ މުއްދަތު ހަމަވުމާއެކު ކުރިން ބޭރު ފައިސާ ގަނެ ވިއްކުމުގެ ލައިސަންސް އޮންނަ 163 ފަރާތެއްގެ ލައިސަންސް ބާތިލްވެފައިވާ ކަމަށެވެ. އެއީ:
-
99 ކޮމާޝަލް ބިޒްނަސް
-
64 ޓުއަރިސްޓު ރިސޯޓު
އާ ގަވައިދުގެ ދަށުން ޓިއާ-1ގެ ލައިސަންސް ދޫކުރާ ވިޔަފާރިތަކުން އަމަލުކުރަން ޖެހޭ އުސޫލުތަކަކީ:
-
ވިޔަފާރީގައި ހަރަކާތްތެރިވާ ހުރިހާ މުވައްޒަފުން ވެސް ވާންވާނީ ދިވެހިނަށް
-
އެފަދަ ވިޔަފާރިއަކުން ދުވާލެއްގެ މައްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތްކުރެވޭނީ 50،000ރ. ނުވަތަ އެއާ އެއްވަރުގެ ބޭރު ފައިސާގެ އަދަދަކަށް
-
ބޭރު ފައިސާ ގަތުމާއި ވިއްކުމުގެ ހުރިހާ މުއާމަލާތްތަކެއް މޮނިޓާ ކުރެވޭނެ އިލެކްޓްރޯނިކް ނިޒާމެއް ގާއިމުކުރަން ޖެހޭ
-
މި ލައިސަންސް ދޫކުރާނީ 5 އަހަރަށް
-
މި ލައިސަންސްގެ ފީއަކީ 20،000ރ.؛ އަދި ލައިސަންސް އަހަރީ ފީގެ ގޮތުގައި 24،000ރ. ދައްކަން ޖެހޭނެ
ޓިއާ-2ގެ ލައިސަންސް ދޫކުރާނީ ޓޫރިސްޓު ރިޒޯޓް ހިންގަން ހުއްދަ ނުވަތަ ލައިސަސް ލިބިފައިވާ ކުންފުނިތަކަށް އެކަންޏެވެ.
ޓިއާ-2 ލައިސަންސް ދޭ ވިޔަފާރިތަކުން އަމަލުކުރަން ޖެހޭ އުސޫލުތަކަކީ:
-
ލައިސަންސްގެ މުއްދަތަކީ ޓޫރިސްޓް ރިޒޯޓް ހިންގަން ލިބިފައިވާ ހުއްދައިގެ ނުވަތަ ލައިސަންސްގެ މުއްދަތު
-
މި ފަރާތްތަކުން ބޭރު ފައިސާ ވިއްކުމުގެ މުއާމަލާތް ކުރަންވާނީ ބޭންކަކާ އެކު ނުވަތަ ޓީއާ-1ގެ ލައިސަންސް އޮންނަ ފަރާތްތަކަކާ އެކު
-
މި ލައިސަންސް ދީފައިވާ ތަންތަނުން ބޭރު ފައިސާ ވިއްކުމަށްފަހު ކަސްޓަމަރަށް ރަސީދެއް ދޭން މަޖުބޫރު
-
މި ޓިއާގެ ލައިސަންސް އެޕްލިކޭޝަން ފީއަކީ 1،300 ޑޮލަރު؛ އަދި ލައިސެންސްގެ އަހަރީ ފީއަކީ 1،800 ޑޮލަރު
ލައިސަންސް ލިބިފައިވާ ކޮންމެ ފަރާތަކުން ވެސް ސެކިއުރިޓީ ޑިޕޮސިޓްގެ ގޮތުގައި 50،000 ޑޮލަރު ބަހައްޓަން ޖެހެ އެވެ.
އެމްއެމްއޭ އިން ބުނީ، އާ ގަވައިދުގެ ދަށުން ލައިސަންސަށް އެދި ހުށަހެޅި ފަރާތްތަކުގެ ލިޔެކިޔުންތަކުގެ ސައްހަކަން ދެނެގަނެ އިވެލުއޭޓު ކުރުމުގެ މަސައްކަތް ކުރަމުންދާ ކަމަށެވެ. ނަމަވެސް އާ ލައިސަންސް ދޫކުރާނެ ތާރީހެއް ހާމައެއް ނުކުރެ އެވެ. އެ އިދާރާ އިން ބުނީ،ލައިސަންސަށް އެދި ހުށަހަޅައި ވަކި ގޮތެއް ނިންމައި އަންގަންދެން މިހާރު ހުރި ލައިސަންސުތަކުގެ ދަށުން ވިޔަފާރި ކުރިއަށް ގެންދެވޭނެ ކަމަށެވެ.
ކޮމެންޓް