ޔާމީންގެ ހިޔާލެއް: ބޭރުގެ ބޭންކުތަކަށް 500 މިލިއަން ޑޮލަރު ގެންނަން އަންގާ

ކުރީގެ ރައީސް އަބްދުﷲ ޔާމީން އެ މަނިކުފާނުގެ އަމިއްލަ ޓީވީ، ޗެނަލް-13އަށް ރޭ ދެއްވި ބަސްދީގަތުމުގައި އެ މަނިކުފާނު އެންމެ ބޮޑަށް ކަންބޮޑުވާ ކަމެއްގެ ގޮތުގައި ފާހަގަކުރެއްވީ ޓޫރިޒަމްގެ ވިޔަފާރިވެރިންނާއި ސަރުކާރާ ދެމެދު މިހާރު އުފެދިފައިވާ ނުތަނަވަސްކަމެވެ.

ރިސޯޓްތަކަށް އަންނަ ކޮންމެ ޓޫރިސްޓެއްގެ ބޮލަށް 500 ޑޮލަރު މާރުކުރަން މަރުކަޒީ ބޭންކް، އެމްއެމްއޭން އެންގި އެންގުމުގެ ސަބަބުން އެތައް އާންމުންނެއްގެ ދިރިއުޅުމާ ގުޅިފައިވާ ރާއްޖޭގެ އެންމެ ބޮޑު ސިނާއަތް އެކީ ހަލާކުވެދާނެ ކަމުގެ ކަންބޮޑުވުން ޔާމީން ފާޅުކުރެއްވި އެވެ. ޔާމީން ވިދާޅުވި ގޮތުގައި، މިއީ ރައީސް މުހައްމަދު މުއިއްޒު ވިދާޅުވާ ގޮތަށް، ރައްޔިތުންގެ ފަޅިތޯ ނޫންތޯ ބަހުސްކުރާ ވަރަށް ވުރެ މާ ބޮޑު ސީރިއަސް އިގްތިސާދީ މައްސަލައެކެވެ. 

"މިއީ ރައްޔިތުންނާއި ރާއްޖެއަށް ހިދުމަތްކޮށްފައި މި ދާއިރާއަށް ތަނަވަސްކަން ގެނެސްފައި އަނެއްކާ އެ ސިނާއަތުގެ ތެރެއިން އެތައްހާސް ދިވެހި ޒުވާނުންނަކަށް ވަޒީފާ ދީފައި [ތިއްބެވި ބޭފުޅުން]. އެ ވަޒީފާތަކަށް ބިނާވެ މި އުޅެނީ ބޯވަޔަށް ފީނާ މީހުން... މަސް ވިއްކާ މީހުން. މިހެން ގޮސް މި އިންޑަސްޓްރީއާ ގުޅިފައި ހުރި ބައިވަރު އިންޑަސްޓްރީތަކެއް މި ހުރީ. ޓުއަރިޒަމް އިންޑަސްޓްރީ ހަލާކުވެގެން ގޮސްފިއްޔާ މި ހުރިހާ އެއްޗެއް އިނދަޖެހޭނެ. އަޅުގަނޑު ދަންނަވާނީ ނޭފަތު ކުރިއާ ހަމައަށް ނުވިސްނާށޭ. އެއަށް ވުރެ ދުރަށް ވިސްނާލާށޭ،" ޔާމީން ވިދާޅުވި އެވެ.

އެއަށް ފަހު ޔާމީން ސުވާލު އުފެއްދެވީ ވިޔަފާރިވެރިންގެ އާމްދަނީއާ މެދު އަމަލުކުރާނެ ގޮތެއް އަންގައި އެމްއެމްއޭއަށް އުސޫލެއް ހެދިދާނެ ކަމާ މެދު އެވެ. ޔާމީން ވިދާޅުވީ އާންމު ފަރުދުން ވިޔަފާރިކޮށްގެން ހޯދާ އާމްދަނީން، ޓެކްސް ދައްކާ ދައުލަތަށް އަދާކުރަން ޖެހޭ މާލީ ޒިންމާތައް އަދާކުރުމަށް ފަހު ދެން ބާކީ ހުންނަ އެއްޗަކީ އެބައެއްގެ އަމިއްލަ މިލްކެއް ކަމަށެވެ. އަދި އެއާ މެދު އަމަލު ކުރާނެ ގޮތް އެނގޭނީ އެބަޔަކަށް ކަމަށް ޔާމީން ވިދާޅުވި އެވެ. 

 ޔާމީން ވިދާޅުވީ ރިސޯޓްތައް ހަދަން ބޭރުން ނަގާފައިވާ ލޯނުތައް ފަދަ ބައެއް ހަރަދުތަކަށް ރިސޯޓްތަކުން ޑޮލަރު ބޭނުންވެ އެވެ. އަދި ރަސްމީ ރޭޓްގައި ޑޮލަރު މާރުކުރުމުން ރިސޯޓްތަކުން ދެން ޖެހޭނީ އެ މީހުން ބޭނުންވާ ޑޮލަރު ވެސް ކަޅު ބާޒާރުން ގަންނަން ކަމަށާއި އެއީ ރިސޯޓްތަކުން ކުރާނޭ ކަމެއް ނޫން ކަމަށެވެ. 

"އެމްއެމްއޭއަށް ހެދިދާނެ ފަދަ ގަވައިދެއް ވެސް ނޫން މިއީ. ވިޔަފާރިތަކުން ދައުލަތަށް ނަގާ ފައިސާ ނަގަން ވާނީ ޓެކްސް ގޮތަށް ގާނޫނުގެ ތެރެއިން،" ޔާމީން ވިދާޅުވި އެވެ. 

"މީގައި ހުރިހާ ވެސް މައްސައަކީ ރަސްމީ ރޭޓާއި ބޭރުން ގަންނަން ލިބޭވަރުގެ ބޮޑު ތަފާތެއް ހުރުން. އެ މީހުންނަށް ލިބޭ ޑޮލަރުކޮޅު ރަސްމީ ރޭޓްގައި މާރުކޮށްފައި އެ މީހުން ޑޮލަރު ބޭނުން ވީމާ ބޭރުން ބޮޑު އަގުގައި ރުފިޔާ ދީގެން ގެއްލުމުގައި އަނެއްކާ ޑޮލަރު ހޯދަން އެ މީހުންނަށް މަޖުބޫރެއް ނުކުރެވޭނެ."

ޔާމީން ދެން ވިދާޅުވެ ދެއްވީ ރާއްޖޭގައި އޮތް ޑޮލަރުގެ ތާށިކަމަށް އެ މަނިކުފާނުގެ ނަޒަރުގައި ގެނެވިދާނޭ ހައްލެކެވެ. ޔާމީން ދެކެވަޑައިގަންނަވާ ގޮތުގައި ރާއްޖޭގައި ހުރި ބޭރުގެ ބޭންކުތަކުން ރާއްޖެއިން ހަމައެކަނި ހޯދާ ލާރިކޮޅަކުން ބޭންކް ހިންގާހާ ދުވަހަކު އުޅެން ޖެހޭނީ އަބަދުވެސް މިހާލުގަ އެވެ.

އެހެންވެ، ޔާމީން ވިދާޅުވީ އެމްއެމްއޭއިން ކުރަންވީ ކަމަކީ ރާއްޖޭގައި ހުރި ބޭރުގެ ބޭންކުތަކުން ކޮންމެ އަހަރަކު 500 މިލިއަން ޑޮލަރު އެމީހުންގެ މައި ބޭންކުން ކެޕިޓަލްގެ ގޮތުގައި ރާއްޖޭގެ އިގްތިސާދަށް އެތެރެކުރަން އެންގުން ކަމަށެވެ. 

އެކަން ނުކުރާ ނަމަ ރާއްޖޭގައި ބޭންކު ހިންގުމަށް ދީފައިވާ ލައިސަންސް އެމްއެމްއޭން ބާތިލްކުރަން ޖެހޭ ކަމަށް ޔާމީން ވިދާޅުވި އެވެ. އެއީ ބޭންކުތަކަށް ގެއްލުން ވާނޭ ކަމެއް ނޫން ކަމަށް ވިދާޅުވި އެވެ. އޭގެ ބަދަލުގައި އެ ގެންނަ 500 މިލިއަން ޑޮލަރަކީ ރަނގަޅު އިންޓަރެސްޓް ރޭޓުގައި ރާއްޖޭގެ ވިޔަފާރިތަކަށް، ބޭރު ފައިސާ ލިބޭނޭ މަޝްރޫއުތައް ހިންގަން ދީގެން ބޭންކަށް ފައިދާ ހޯދޭނޭ ފައިސާ ކަމަށް ޔާމީން ވިދާޅުވި އެވެ. 

"އެމްއެމްއެމްއޭއިން ބުނަންވީ ކަލޭމެން ބޭރުގެ ބޭންކުތައް ތިތިބީ ރާއްޖޭގައި ވިޔަފާރިކުރަން އައިހޭ. ކޮންމެ ބޭންކަކަށް އަންގަންވީ ނޫންތޯ އެ މީހުންގެ ލައިސަންސް ޓާމްސްގެ އެއްކަމަކީ ކޮންމެ އަހަރަކު ކޮންމެ ބޭންކަކުން ކަލޭމެން ރާއްޖޭން ބޭރުން ކަލޭމެންގެ ކެޕިޓަލްތަކުން ރާއްޖެއަށް ގެންނާށޭ 500 މިލިއަން ޑޮލަރު. އެއިން ލިބޭނޭ ކަލޭމެންނަށް ފައިދާ ވެސް. އެއީ ޑޮލަރު އިންވެސްޓްމަންޓް ވެއްޖިއްޔާ އެ މީހުން ވެސް [ބޭންކުތަކުން] އެ ލާރި ދޭނީ ދިވެހި ވިޔަފާރިތަކުން ޑޮލަރުން ރިޕޭ ކުރާ މީހުންނަށް ރަނގަޅު މަޝްރޫއުތަކަށް،" ޔާމީން ވިދާޅުވި އެވެ. 

އިސްލާމިކް ބޭންކް (އެމްއައިބީ) ހިމެނޭ ގޮތުން ރާއްޖޭގައި ހަރަކާތްތެރިވާ ބޭރުގެ ފަސް ބޭންކެއް އެބަ ހުއްޓެވެ. ޔާމީން ވިދާޅުވާ ގޮތަށް އެ ފަސް ބޭންކުން އަހަރަކު 500 މިލިއަން ޑޮލަރު ކެޕިޓަލްގެ ގޮތުގައި ރާއްޖެ ގެންނަން މަޖުބޫރު ކުރާ ނަމަ އަހަރަކު 2.5 ބިލިއަން ޑޮލަރު ރާއްޖޭގެ އިގްތިސާދަށް ވަންނާނެ އެވެ. 

ޔާމީން ވިދާޅުވީ މިފަދަ ފިޔަވަޅުތައް ނާޅާ ސަރުކާރުން މިހާރު އަމަލުކުރާ ގޮތުން ބޭންކުތަކުގައި އާންމު ފަރާތްތަކުން ޑޮލަރުން ބަހައްޓާފައި ހުރި ފައިސާއާ މެދުވެސް އިތުބާރު ކުޑަވެފައިވާ ކަމަށެވެ. އަދި މިހާރު ކަންކަން ކުރާ ގޮތުން މާލީ ނިޒާމާއި ބޭންކިން ނިޒާމަށް ވެސް އިތުބާރު ކުޑަވާނޭ ކަމަށް ޔާމީން ވިދާޅުވި އެވެ. 

ސަރުކާރަށް އެއް އަހަރު ވެގެން ދިޔައިރު ޑޮލަރުގެ މައްސަލަ ހައްލުކުރަން ސަރުކާރު ފެއިލްވެފައި ވަނީ ޔާމީން ވިދާޅުވި ގޮތުގައި މި ސަރުކާރުގެ ނާގާބިލްކަމުން އެކަން ކުރަން ނޭނގިގެންނެވެ. ކޮންމެ ސަރުކާރެއް ވެސް ނިމިގެން ދާއިރު ބޮޑެތި ދަރަނިތައް އޮންނަކަން ފާހަގަ ކުރައްވާ ޔާމީން ވިދާޅުވީ ޑޮލަރުގެ ތާށިކަން ކުރިމަތިވީ ދަރަނި ދައްކަން ޖެހިގެން ނޫން ކަމަށެވެ. އޭގެ ބަދަލުގައި މި ސަރުކާރުން ވެސް "ހަބޭހަށް" ހަރަދުކުރީ ކަމަށް ޔާމީން ވިދާޅުވި އެވެ.

"ޑޮލަރު މަދުވެގެން މި އުޅެނީ ސަރުކާރުގެ ހަރަދު ބޮޑުވެގެން. އެމްއެމްއޭގެ ޒިންމާއަކީ ސަރުކާރުގައި މި ވާހަކަ ބުނުން،' ޔާމީން ވިދާޅުވި އެވެ. 

އޭނާ ވިދާޅުވީ ރާއްޖޭގައި ޑޮލަރުގެ އަގު ހިފެހެއްޓުމުގެ ގޮތުން އިގްތިސާދުގައި ދައުރުވާ ޑޮލަރަށް ވުރެ ގިނައިން ހަރަދުނުކުރަން ސަރުކާރަށް އަންގަން ޖެހޭނީ އެމްއެމްއޭން ކަމަށެވެ. އަދި ރަސްމީ ރޭޓަށް ވުރެ ބޮޑު އަގުގައި ޑޮލަރު މާރުކުރާ ކަޅު ބާޒާރު ނުވަތަ ޕެރަލަލް މާކެޓެއް އޮތީ ސަރުކާރުން ހަރަދު ކުރުމުގައި ސުލޫކެއް ނެތުމުންކަން ވެސް ޔާމީން ފާހަގަ ކުރެއްވި އެވެ.

ދިވެހި ރުފިޔާގެ އަގު ހިފެހެއްޓުމަކީ ޓޫރިޒަމް ސިނާއަތުގެ ކަމަކަށް ވެގެން ނުވާނޭ ކަމަށް ވެސް ޔާމީން ވިދާޅުވި އެވެ. އެކަމުގައި ޓޫރިޒަމް ސިނާއަތް ގޯސްކޮށް އެ މީހުން ޒިންމާވާން ޖެހޭ ކަމަކަށް ހަދައިގެން ނުވާނޭ ކަމަށް ޔާމީން ތަކުރާރުކޮށް ވިދާޅުވި އެވެ. އޭގެ ބަދަލުގައި ޓޫރިޒަމް ސިނާއަތަށް ކަންކަން ފަހިކޮށްދިނުމަށް އެދިވަޑައިގެންނެވި އެވެ. 

"އެކި މީހުން ލައްވާ މި ކިޔަނީ މިވެނި ވަރެއް މާރުކުރިމާ އެ މީހުންނަށް ގެއްލުމެއް ނުވާނެ. ރައްޔިތުންނަށް މިވަރުކަމެއް ކޮށްދޭން އެ މީހުން ދެކޮޅު ހަދަނިއްޔޭ. އެ އެނަލިސިސް ރަނގަޅެއް ނޫނޭ. އެކަމަކު ނޭނގޭތަ ރައްޔިތުންގެ ގިނަ މީހުން ތިބީ ޓޫރިޒަމް އިންޑަސްޓްރީގައި ވަޒީފާގައި ކަމެއް. ޓޫރިޒަމްގެ އެމްބެސެޑަރަކަށް އަޅުގަނޑު ވަނީކީ ނޫން،" ޔާމީން ވިދާޅުވި އެވެ.

ސަރުކާރުގެ ހަރަދުތައް ކުޑަކޮށް އިހުލާސްތެރި ނިޔަތަކާ އެކު ޓޫރިޒަމް ސިނާއަތުގެ ފަރާތްތަކާ އެކު ވެސް ސަރުކާރުން މަޝްވަރާއަށް އިށީނުމަށް ވެސް ޔާމީން ގޮވާލެއްވި އެވެ. 

"ޓޫރިޒަމް ދާއިރާގެ ބޭފުޅުންނަކީ މި ސަރުކާރުން ގެންނަން ވެސް މަސައްކަތް ކުރި ބޭފުޅުން، ރަނގަޅު އިގްތިސާދީ ސިޔާސަތެއް ފެނިގެން ދާނޭ ކަމަށް. އެކަމަކު އެކަހަލަ ސިޔާސަތެއް ނުފެނޭ އަދި އުނދަގޫ އެތައް ކަމެއް މި ފެންނަނީ،" ޔާމީން ވިދާޅުވި އެވެ.