ކެންސަރު ހޮސްޕިޓަލާއި މެންޓަލް ހޮސްޕިޓަލް އަންނަ އަހަރުގެ ބަޖެޓަށް

ކެންސަރު ހޮސްޕިޓަލާއި ނަފްސާނީ ބަލިތަކަށް ފަރުވާ ދޭ ހޮސްޕިޓަލު ގާއިމު ކުރުމަށް އަންނަ އަހަރަށް ލަފާކުރާ ބަޖެޓުގައި ހިމަނައިފި އެވެ.

ވީ ކިހިނެއް؟ - އަންނަ އަހަރަށް ލަފާކުރާ ބަޖެޓު ހުށަހަޅައިިދެއްވަމުން ފިނޭންސް މިނިސްޓަރު މޫސާ ޒަމީރު މިއަދު ވިދާޅުވީ ކެންސަރު ފަދަ ބޮޑެތި ބަލިތަކާއި ނަފްސާނީ ދުޅަހެޔޮކަމަށް ފަރުވާދެވޭ ވަރަށް ވުރެ ރާއްޖޭގެ ސިއްހީ ނިޒާމު ބަލިކަށި ކަމަށެވެ.

ތަފްސީލް - މިނިސްޓަރު ވިދާޅުވީ ސިއްހީ ނިޒާމު ވަރުދަކޮށް، ފުޅާކުރުމަށާއި ދިވެހިންނަށް ރާއްޖޭގައި ތިބެގެން ގޮޑެތި ބަލިތަކަށް ފަރުވާ ހޯދޭނެ ފެންވަރަށް ޒަމާނީ ސިއްހީ ވަސީލަތްތަކާއި އިންފްރާސްޓްރަކްޗާ ގާއިމްކުރުން މުހިއްމު ކަމަށެވެ.

"ހަމަ އެހެންމެ ދިވެހީންގެ ސިއްހީ ހިދުމަތުގައި ތަމްރީނުލިބިފައިވާ ދިވެހި ދަރީން ތިބުމަކީ ސަރުކާރުން ނުހަނު އިސްކަންދޭ ސިޔާސަތެއް،" އޭނާ ވިދާޅުވި އެވެ.

ޒަމީރު ވިދާޅުވީ އެ ތަސައްވަރު ހަގީގަތަކަށް ހެދުމަށް އަންނަ އަހަރުގެ ބަޖެޓުގައި ސިއްހީ ނިޒާމަށް ބޭނުންވާ މުހިންމު މަޝްރޫއުތަކެއް ހިމަނާފައިވާނެ ކަމަށެވެ.

މިނިސްޓަރު ވިދާޅުވީ ކެންސަރުގެ ފަރުވާއަށް ހާއްސަ ހޮސްޕިޓަލަކާއި މެންޓަލް ހެލްތު ހޮސްޕިޓަލެއް ގާއިމުކުރަން ހިމަނާފައިވާނެ ކަމަށެވެ.

މީގެ އިތުރުން، ރަށްރަށުގެ ހެލްތު ސެންޓަރުތަކާއި ހޮސްޕިޓަލުތަކުން ލިބޭ ހިދުމަތްތައް ފުޅާކޮށް އެ ތަންތަން ތަރައްގީކުރުމަށް ވެސް ބަޖެޓުގައި ހިމަނާފައިވާނެ ކަމަށް އޭނާ ވިދާޅުވި އެވެ. އެގޮތުން:

ފާހަގަ ކުރެވޭ - ކެންސަރު ހޮސްޕިޓަލާއި މެންޓަލް ހޮސްޕިޓަލުގެ މަސައްކަތް ބަޖެޓުގައި ހިމަނާފައި ވާއިރު، ކުރީގެ ރައީސް އިިބްރާހިމް މުހައްމަދު ސޯލިހުގެ ސަރުކާރުގައި ނިންމާފައިި އޮތީ އިންޑިއާގެ ކްރެޑިޓް ލައިންގެ ދަށުން ލ. ގަމުގައި ކެންސަރު ހޮސްޕިޓަލު އެޅުމަށެވެ.

ނަމަވެސް، ފަހުން މި ސަރުކާރުން ނިންމާފައިވަނީ ކެންސަރު ހޮސްޕިޓަލު މާލޭގައި އެޅުމަށެވެ. އަދި މެންޓަލް ހޮސްޕިޓަލު ގަމުގައި އަޅަން ވެސް މި ސަރުކާރުން ވަނީ ނިންމައިފަ އެވެ.