ވިޔަފާރި ބަނދަރު ތަރައްގީކުރަން ބަޔަކަށް ނުދެން: އެމްޕީއެލް

މާލޭ ވިޔަފާރި ބަނދަރު ތިލަފުއްޓަށް ބަދަލުކޮށް އެ ތަނުގައި ބަނދަރު ތަރައްގީ ކުރުމަށް ފިލިޕީންސްގެ ކުންފުންޏަކާ އެކު ސޮއިކުރި އެމްއޯޔޫގެ މުއްދަތު ހަމަވެ، އެ ކުންފުންޏާ އެކު ކުރިއަށް ގެންދިޔަ މަޝްވަރާތައް ހުއްޓާލައިފި އެވެ.

ވީ ކިހިނެއް؟ - މައި ވިޔަފާރި ބަނދަރު ތަރައްގީ ކުރުމަށް ފިލިޕީންސް ކުންފުންޏަކާ އެކު މަޝްވަރާތައް ކުރިއަށް ގެންދިޔަ ނަމަވެސް އެ ކުންފުންޏާ އެ މަސައްކަތް ހަވާލު ކުރާކަށް ނުނިންމަ އެވެ.

ފިލިޕީންސް ކުންފުންޏާ އެކު ހެދި އެމްއޯޔޫ އުވާލައި ޗައިނާ ކުންފުންޏަކާ އެކު ކުރިއަށް ދާން އެމްޕީއެލް އިން ނިންމި ކަމަށް ބުނެ ސޯޝަލް މީޑިއާގައި ދައްކާ ވާހަކަ ވެސް އެމްޕީއެލް އިން ވަނީ ދޮގުކޮށްފަ އެވެ.

ތަފްސީލް - އެމްޕީއެލްގެެ ސީއީއޯ މުހައްމަދު ވަޖީހު މިއަދު 'ދައުރު'އަށް ވިދާޅުވީ، ފިލިޕީންސް ކުންފުންޏާ އެކު ހެދި އެމްއޯޔޫގެ މުއްދަތު ހަމަވެއްޖެ ކަމަށާއި އޭގެ ފަހުން އަދި ބަނދަރާ ގުޅޭ އެއްވެސް އެއްބަސްވުމެއް އެއްވެސް ކުންފުންޏަކާ އެކު ނުހަދާ ކަމަށެވެ.

"މިހާރު ބަލަމުން މިދަނީ އެންމެ ރަނގަޅު ގޮތްތަކެއް. ޕޯޓު ބަދަލު ކުރުމަކީ ކޮންމެހެން ވެސް ކުރަން ޖެހޭ ކަމެެއް. އެންމެ ރަނގަޅު އޮޕްޝަނަކީ ކޮބަައިތޯ ސަރުކާރުން ވެސް އެ ދަނީ ބަލަމުން،" އޭނާ ވިދާޅުވި އެވެ.

ގުޅުން ހުރި - ތިލަފުށީގައި ގާއިމް ކުރާ ބައިނަލްއަގުވާމީ ވިޔަފާރި ބަނދަރުގެ މަސައްކަތަށް އިންޑިއާ އިން އެހީތެރިކަން ދޭން ތައްޔާރު ކަމަށް އެ ގައުމުގެ ބޮޑުވަޒީރު ނަރެންދުރަ މޯދީ ވަނީ މި ފަހުން ވިދާޅުވެފަ އެވެ. 

"ތިލަފުށީގައި އާ ކޮމާޝަލް ޕޯޓެއް އަޅަން ވެސް އެހީތެރިކަން ދޭން އިންޑިއާ އިން ތައްޔާރު،" ރައީސް މުހައްމަދު މުއިއްޒު މި މަހު އިންޑިއާއަށް ކުރެއްވި ދަތުރުފުޅުގައި ދެއްވި ގުޅިފައިވާ ބަޔާނުގައި މޯދީ ވިދާޅުވި އެވެ.

ތިލަފުށީގައި އަޅާ ބަނދަރަށް އިންޑިއާގެ އެހީތެރިކަން ދޭނެ ކަމުގެ އިޝާރާތެއް މޯދީ ދެއްވި އިރު، އެ މަޝްރޫއަކީ މީގެ ކުރިން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ގުޅިފަޅުގައި ކުރިއަށް ގެންދަން ނިންމާފައި އޮތް މަޝްރޫއެކެވެ.

އެ މަޝްރޫއު ކުރިއަށް ގެންދަން އޮތީ އިންޑިއާގެ ކްރެޑިޓް ލައިންގެ ދަށުންނެވެ. ރައީސް މުއިއްޒުގެ ސަރުކާރުން ވަނީ އެ މަޝްރޫއު ގުޅިފަޅުގައި ކުރިއަށް ގެންދިއުމުގެ ބަދަލުގައި ތިލަފުށީގައި އެ ބަނދަރު އަޅަން ނިންމައިފަ އެވެ.