ބާޒާރުގައި ފިޔާ އަގުހެޔޮވާން ފަށައިފި

ރާއްޖޭގެ ބާޒާރުގައި ފިޔާ ލިބުން ދަތިވެ، އަގު އުފުލިފައި އޮތުމަށް ފަހު ފިޔާގެ އަގު ދަށްވާން ފަށައިފި އެވެ.

ވީ ކިހިނެއް؟ - މި މަހުގެ މެދަކާ ހަމައަށް ދިޔައިރު ފިޔާގެ އަގު އުޅުނީ ކިލޯއެއް 50 ރުފިޔާއިން މަތީގަ އެވެ. ބާޒާރުން އޭރު ފިޔާ ލިބުން ވެސް ދަތިވި އެވެ.

ތަފްސީލު - ފިޔާ ހުސްވާން ކައިރިވެ، އަގު އުފުލުމުން އަގު ކޮންޓްރޯލުކޮށް، ފިޔާ ލިބުމުގެ މައްސަލަ ހައްލުކުރަން އެސްޓީއޯއިން ރާއްޖެއަށް ފިޔާ ޝިޕްމެންޓުތައް ގެންނާނެ ކަމަށް ސަރުކާރުން އޮތީ ބުނެފަ އެވެ.

އެސްޓީއޯއިން ގެނައި ފިޔާ ޝިޕްމެންްޓުތަކުގެ ތަފްސީލެއް ނުލިބެ އެވެ. ނަމަވެސް އެސްޓީއޯ ސުޕަމާޓުގައި މިހާރު ފިޔާ ކިލޯއެއް 15ރ. އަށް ލިބެން އެބަ ހުއްޓެވެ. ބާޒާރުމަތީ ފިހާރަތަކުގައި ފިޔާ ކިލޯއެއް އުޅެނީ 25ރ. އާއި 30ރ.އާ ދެމެދު އެވެ.

ފިޔާގެ އަގު ބޮޑުވީ އާންމުކޮށް އެންމެ ގިނައިން ފިޔާ އެތެރެކުރާ އިންޑިއާއިން ފިޔާ ލިބުން ދަތިވެގެންނެވެ. އިންޑިއާގެ ބައެއް ސަރަހައްދުތަކަށް ވިއްސާރަކޮށް ފެންބޮޑުވުމުގެ ސަބަބުން ދަނޑުތައް ހަލާކުވެ، އެ ގައުމުގައި ވެސް ފިޔާގެ އަގު އުފުލުނެވެ. އެއާ އެކު އިންޑިއާ ސަރުކާރުން ވެސް ވަނީ އެ ގައުމުގެ ބާޒާރުގައި ފިޔާގެ އަގު ކޮންޓްރޯލުކުރަން ފިޔަވަޅުތައް އަޅައިފަ އެވެ.