ރާއްޖޭގެ ފަތުރުވެރިކަން ބަންގްލަދޭޝްގައި އިޝްތިހާރުކުރުމަށް އޭޓީއެފްގައި ބައިވެރިވެއްޖެ

ބަންގްލަދޭޝްގައި ބާއްވާ އޭޝިއަން ޓޫރިޒަމް ފެއާ (އޭޓީއެފް)ގައި ރާއްޖެ އިން ފުރަތަމަ ފަހަރަށް ބައިވެރިވެއްޖެ އެވެ.

އިއްޔެ އިން ފެށިގެން މާދަމާގެ ނިޔަލަށް ޑާކާގައި ކުރިއަށްދާ މި އަހަރުގެ އޭޓީއެފްގައި ރާއްޖެ އިޝްތިހާރު ކުރުމަށް 'ވިޒިޓް މޯލްޑިވްސް' ޝިއާރުގެ ދަށުން އެމްއެމްޕީއާރުސީއާ އެކު ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އިން ބައިވެރިވެ އެވެ.

އެންއެޗްޖީއޭއެމް އިން ބުނިގޮތުގައި އޭޓީއެފްއަކީ ރާއްޖޭގެ ފަތުރުވެރިކަން ބަންގްލަދޭޝްގައި އިޝްތިހާރު ކުރުމަށް މުހިއްމު ފެއާއަކަށް ވާނެ އެވެ.

އޭޓީއެފްގައި ރާއްޖެއިން ބައިވެރިވީ ދެކުނު އޭޝިއާގެ ގައުމުތަކުގައި ރާއްޖޭގެ ފަތުރުވެރިކަން އިޝްތިހާރު ކުރުމަށް ކުރަމުން އަންނަ މަސައްކަތުގެ ދަށުންނެވެ. އެ ގައުމުތަކުގެ ތެރޭގައި ހިމެނެނީ އިންޑިއާ، ބަންގްލަދޭޝް، ނޭޕާލް އަދި ބޫޓާން އެވެ.

އެންއެޗްޖީއޭއެމް އިން ބުނިގޮތުގައި ބަންގްލަދޭޝްއަކީ ރާއްޖޭގެ ފަތުރުވެރިކަމުގައި މުހިއްމު މާކެޓަކަށް ހެދުމުގެ ފުރުސަތު އެބައޮތެވެ. މި މަހުގެ 12 ވަނަ ދުވަހުގެ ނިޔަލަށް އެ ގައުމުން 18،000 އަށް ވުރެ ގިނަ ފަތުރުވެރިން ރާއްޖެ އައިސްފައިވެ އެވެ. ބަންގްލަދޭޝްގެ ފަތުރުވެރިންނަށް ރާއްޖެ އިޝްތިހާރު ކުރުން ފުޅާ ކުރެވިއްޖެ ނަމަ އެ ގައުމުން ރާއްޖެ އަންނަ ފަތުރުވެރިންގެ އަދަދު އިތުރުވާނެ ކަމަށް އެންއެޗްޖީއޭއެމް އިން ދެކެ އެވެ. ހާއްސަކޮށް ދެ ގައުމުގެ ދެމެދުގައި ދަތުރުފަތުރުގެ ނިޒާމެއް ގާއިމްވެފައި އޮތުމަކީ ބޮޑު ފަސޭހައެއްކަން އެތަނުން ފާހަގަކުރެ އެވެ.

އޭޓީއެފްގައި ރާއްޖޭގެ ފަތުރުވެރިކަމުގެ އެކި ޕްރޮޑަކްޓުތައް އިޝްތިހާރު ކުރުމަށް ބައިވެރިވާ ކުންފުނިތަކަށާއި ހޮޓާ، ގެސްޓުހައުސްތަކަށް ހާއްސަ ކަންތައްތަކެއް ފެއާ އިންތިޒާމުކުރާ ފަރާތްތަކާއި އެންއެޗްޖީއޭއެމް ގުޅިގެން ވަނީ ރާވައިފަ އެވެ.

އެގޮތުން:

އޭޓީއެފްގައި ރާއްޖޭގެ ސްޓޭންޑު ފަރުމާކޮށްފައިވަނީ ރާއްޖޭގެ ގުދުރަތީ ރީތިކަމާއި ކަނޑުއަޑީގެ ހިތްގައިމުކަން ފެންނަ ގޮތަށެވެ. ރާއްޖޭގައި ޗުއްޓީ ހޭދަކުރާ ފަތުރުވެރިންނަށް ކުރެވޭނެ ތަޖުރިބާތައް ވެސް ސްޓޭންޑުގައި ފެންނަން ހުންނާނެ އެވެ.

އެގޮތުން ރާއްޖެ އަކީ ހުރިހާ ފަންތިއެއްގެ މީހުންނަށް ވެސް ޗުއްޓީ ހޭދަކުރެވޭނެ މަންޒިލެއްކަން ބުނެދީ ރާއްޖޭގައި ފަތުރުވެރިންނަށް ކުރެވޭނެ ތަޖުރިބާތައް ކިޔައިދީ ފެއާގައި ރާއްޖެ އިޝްތިހާރުކުރަން ވަނީ އިސްކަންދީފަ އެވެ.

މި ފެއާއަށް ބަންގްލަދޭޝްގެ މަތީ ފަންތީގެ ވެރިންނާއި އެ ގައުމަށް ރާއްޖެއިން ކަނޑައަޅާފައި ހުންނަވާ ސަފީރު ޝިއުނީން ރަޝީދު ވަނީ ޒިޔާރަތް ކުރައްވައިފަ އެވެ.

ފެއާގެ އިންތިޒާމުތަކުން ފެށިގެން ބަންގްލަދޭޝްގެ ކަމާބެހޭ ފަރާތްތަކުން ފޯރުކޮށްދޭ މެހުމާންދާރީ ވަރަށް ފުރިހަމަ ކަމަށް ރާއްޖޭގެ ފަރާތުން ފެއާގައި ބައިވެރިވާ ވަފުދުން ފާހަގަކުރެ އެވެ. ހާއްސަކޮށް ބަންގްލަދޭޝްގެ ސަރުކާރާއި ޓޫރިޒަމް މިނިސްޓްރީ އަދި އެ ގައުމުގެ ޓޫރިޒަމް ބޯޑުން ރާއްޖޭގެ ފަތުރުވެރިކަމަށް ޝައުގުވެރިކަން ފާޅުކޮށްފައިވާކަން ވަފުދުން ވަނީ ފާހަގަކޮށްފަ އެވެ.