އައިއެސްޕީއެސް ގޭޓު އިފްތިތާހުކުރުމަށް ހއ. އުލިގަމުގައި ބޭއްވިި ރަސްމިއްޔާތު (ފޮޓޯ/އެމްޕީއެލް)
މެރިޓައިމް ހިދުމަތްތައް ދިނުމަށް އުލިގަމުގައި އައިއެސްޕީއެސް ގޭޓު އިފުތިތާހުކޮށްފި
ރާއްޖޭގެ އުތުރުން ދަތުރުކުރާ ބޮޑެތި ބޯޓުފަހަރަށް މެރިޓައިމް ހިދުމަތްތައް ފޯރުކޮށްދިނުމަށް އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިޔުރިޓީ (އައިއެސްޕީއެސް) ގޭޓް ފެސިލިޓީ އިފްތިތާހުކޮށްފި އެވެ.
ވީ ކިހިނެއް؟ - އައިއެސްޕީއެސް ހިދުމަތް އިފްތިތާހު ކުރުމަށް ރޭ ހއ. އުލިގަމުގައި ބޭއްވި ރަސްމިއްޔާތުގައި ހިދުމަތް އިފްތިތާހުކޮށްދެއްވީ ދައުލަތަށް 50 އަށް ވުރެ ގިނަ އަހަރު ހިދުމަތް ކުރައްވާފައިވާ ޖަސްޓިސް ރިޓަޔާޑް އިދުރީސް އާދަމް އެވެ.
އެނގުން މުހިއްމު - އުތުރުގައި އޮފް ޝޯ ބަންކަރިިންގެ ހިދުމަތް ފަށަން ތައްޔާރުވެފައިވާ އިރު ބަންކަރިންގެ ހިދުމަތް ހޯދާ ބޯޓުފަހަރަށް ބޭނުންވާނެ ޕައިލޮޓޭޖު ހިދުމަތާއި ޑޮކިން ހިދުމަތް އަދި ކްރޫ އިން ބަދަލު ކުރުމާ ގުޅޭ ހިދުމަތްތަކުގެ އިތުރުން ބޯޓުތަކަށް ބޭނުންވާ ފެން ފޯރުކޮށްދީ ކުނި އުކާލުމުގެ ހިދުމަތް ފޯރުކޮށްދިނުމަށް މޯލްޑިވްސް ޕޯޓްސް ލިމިޓެޑު (އެމްޕީއެލް) އިން ވަނީ ތައްޔާރުވެފަ އެވެ.
ބަންކަރިންގެ ހިދުމަތް ފޯރުކޮށްދެނީ ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލް އާ ގުޅިގެން ސަރުކާރުގެ މައި ވިޔަފާރި ކުންފުނި އެސްޓީއޯ އިންނެވެ.
ތަފްސީލް - އައިއެސްޕީއެސް ހިދުމަތްތައް ފޯރުކޮށްދިނުމަށް އެމްޕީއެލް އިން ވަނީ އެމަކަށް ހާއްސަ އޮފީހެއް އުލިގަމުގައި ގާއިމުކޮށްފަ އެވެ.
ރާއްޖޭގެ އެންމެ އުތުރުން އިހަވަންދިއްޕޮޅު އޮންނަ ސަރަހައްދަކީ ކަނޑު ދަތުރުކުރާ ބޮޑެތި އުޅަނދުފަހަރު ހުރަސްކުރާ ސަރަހައްދެކެވެ. ދުނިޔޭގެ ބޮޑެތި ޝިޕިން ރޫޓުތަކާ ގުޅިފައިވާ އެ ސަރަހައްދަކީ މެރިޓައިމް ހިދުމަތްތައް ތަރައްގީކުރަން އެންމެ އެކަށީގެންވާ ސަރަހައްދު ކަމަށް އެމްޕީއެލް އިން ބުންޏެވެ.
އެގޮތުން
-
ދުނިޔޭގެ މައި ޝިޕިން ލައިންތައް ގުޅުވައިދޭ މައި މަގު އޮތީ އިހަވަންދިއްޕޮޅާ ގާތްގަނޑަކަށް 30 ނޯޓިކަލް މޭލު ދުރުގައި
-
ދުވާލެއްގެ މައްޗަށް 200 އަށް ވުރެ ގިނަ އުޅަނދު އެ މަގުން ދަތުރު ކުރޭ
-
އަހަރަކު އެތައް ބިލިއަން ޑޮލަރުގެ މުދާ ހިފައިގެން އެތައް ސަތޭކަ އުޅަނދެއް އެ މަގުން ދަތުރު ކުރޭ
އެމްޕީއެލް އިން ބުނީ ބަންކަރިން ހިދުމަތާ އެކު ދެން ފޯރުކޮށްދޭންޖެހޭ އެހެން ހިދުމަތްތައް އެ ކުންފުނިން ފޯރުކޮށްދޭނީ ބައިނަލްއަގުވާމީ މިންގަނޑުތަކަށް ފެތޭނެހެން، ރާއްޖޭގެ ގާނޫނުތަކާއި ގަވައިދުތަކާ އެއްގޮތަށް ކަމަށެވެ.
ފާހަގަ ކުރެވޭ - މޯލްޑިވްސް އިކޮނޮމިކް ގޭޓްވޭ ޕްރޮޖެކްޓުގެ ދަށުން ކުރިއަށް އޮތްތަނުގައި އިހަވަންދިއްޕޮޅިގައި ޓްރާންސްޝިޕްމެންޓް ބަނދަރެއްގެ އިތުރުން، އޮން ޝޯ ބަންކަރިން ފެސިލިޓީ އެއް ތަރައްގީ ކުރާނެ އެވެ.
މީގެ އިތުރުން:
-
އުލިގަމުގައި ޔޮޓް މެރީނާއެއް ތަރައްގީ ކުރާނެ
-
އިހަވަންދޫގައި ޑޮކްޔާޑެއް ހަދާނެ
އެމްޕީއެލް އިން އަމާޒު ހިފާފައިވަނީ އިގުތިސޯދުގެ މައި ތިން ވަނަ ތަނބުގެ ގޮތުގައި މެރިޓައިމް ދާއިރާ ތަރައްގީކޮށް ކުރިއެރުވުމަށެވެ.