ސްރީލަންކަންގެ ފްލައިޓެއް ގަން އެއާޕޯޓްގައި
ޓޫރިޒަމްގައި އެންމެ ކުރީގައި އޮންނަ ތަނަކަށް އައްޑޫ ހެދޭނެ: ނިޒާރު
އެންމެން ގުޅިގެން ކުރާ މަސައްކަތުގެ ނަތީޖާއެއްގެ ގޮތުން އައްޑު އަކީ ޓޫރިޒަމްގައި އެންމެ ކުރީގައި އޮންނާނެ ތަން ކަމަށް ހެދޭނެ ކަމަށް އައްޑޫގެ މޭޔަރު އަލީ ނިޒާރު މިއަދު ވިދާޅުވެއްޖެ އެވެ.
ވީ ކިހިނެއް؟ - ފުރިހަމަ ސިޓީ ބްރޭންޑެއް ތަރައްގީކޮށް ޕްރިމިއާ ބްރޭންޑެއްގެ ގޮތުގައި އައްޑޫ ޕްރޮމޯޓު ކުރުމަށް 'ޑެސްޓިނޭޝަން އައްޑޫ 2024' ސަމިޓު ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ނިޒާރު ވިދާޅުވީ އެ ސަމިޓުގެ މަގުސަދަކީ މާޔޫސް ކަމެއް ނެތި، އައްޑޫގައި ޓޫރިޒަމް ކުރިއެރުވުމުގެ ކަންތައް ކަމާ ގުޅުން ހުރި ފަރާތްތަކާ އެކު ކުރުން ކަމަށެވެ.
ތަފްސީލް - ނިޒާރު ވިދާޅުވީ ބްރޭންޑެއްގެ ގޮތުގައި އައްޑޫ ޓޫރިޒަމަށް ތައާރަފުކޮށް ޓޫރިޒަމްގެ ސިނާއަތް އައްޑުއަށް ގެނައުމަށް ދެެކެވޭ ވާހަކަތަކުގައި އަބަދު ވެސް ގޮންޖެހުންތައް ހުންނަ ކަމަށެވެ.
"ގޮންޖެހުންތަކުން އަރައިގަތުމަށް އަދި ހުރި މައްސަލަތައް ދެނެގަތުމަށް ޑެސްޓިނޭޝަނެއްގެ ގޮތުގައި އައްޑޫ ގެންދިޔުމަށް ޓަކައި ބޭނުންވާ ސިފަތައް ހޯދުމަށް އަދި އެކަމުގައި ހުރި ހުރަސްތައް ވެސް ދެނެގަތުމާ އެކު ކުރިއަށް ދިޔުމަކީ މަގުސަދު،" ނިޒާރު ވިދާޅުވި އެވެ.
އޭނާ ވިދާޅުވީ މިހާރު ތަސުއްވުރު ކުރާ މަންޒަރުތަކާ އެއްގޮތަށް ކުރިއަށް ހިނގައްޖެ ނަމަ އައްޑުއަކީ ވަކި މަންޒިލެއްގެ ގޮތުގައި ދުނިޔެއަށް ވެސް ރާއްޖެ އަށް ވެސް ޕްރޮމޯޓު ކުރެވޭނެ ކަމަށެވެ.
"ޓޫރިޒަމްގެ ސިނާއަތަށް މަންފާއެއް ލިބެންޏާ، އައްޑޫ ވެގެންދާނީ އެކަމުގައި އެންމެ ކުރީގައި އޮތް ތަނަކަށް،" އޭނާ ވިދާޅުވި އެވެ.
"އެކަމަކު އެއީ އެންމެން ގުޅިގެން ކުރެވޭ މަސައްކަތުގެ ނަތީޖާ އެއްގެ ގޮތުން،"
ނިޒާރު ވިދާޅުވީ ހުރިހާ ސަރުކާރަކުން ވެސް އައްޑޫގައި ޓޫރިޒަމް ކުރިއަރުވަން މަސައްކަތް ކުރި ކަމަށެވެ. ނަމަވެސް ކުރަންޖެހޭ ކަމަކީ އެކަން ކުރާގޮތް ބަދަލު ކުރުން ކަމަށާއި ގޮންޖެހުންތަކުން އަރައިގަތުމަށް މަސައްކަތް ކުރަން ޖެހޭ ކަމަށެވެ.
އެގޮތުން އައްޑޫ ގަން އިންޓަނޭޝަނަލް އެއާޕޯޓު ތަރައްގީ ކުރުމަށް ކުރާ މަސައްކަތާ އެކު ރާއްޖެން ބޭރުން ސީދާ ފްލައިޓުތައް އެތަނަށް ގެންނަން ޖެހޭ ކަމަށް ނިޒާރު ވިދާޅުވި އެވެ.
"މާލެ އަށް ބަރޯސާވެ އައްޑޫގެ ޓޫރިޒަމް ކުރިއަކަށް ނުދާނެ. އެންމެން ގުޅިގެން ކުރަން ޖެހޭ މަސައްކަތަކީ އައްޑޫ ގަން އެއާޕޯޓަށް ބޭރުން ފްލައިޓުތައް ގެނެވޭނެ ގޮތެއް ހޯދުން. އެކަމަށް ބޭނުންވާ އެންމެ މުހިއްމު ކަމަކީ އައްޑުއަށް އެނދުތައް އިތުރު ކުރުން،" މޭޔަރު ވިދާޅުވި އެވެ.
"ދުނިޔޭގެ އެއްވެސް ތަނެއްގައި ރާއްޖޭގައި ވެސް ސަރުކާރަކުން ހޮޓާތައް އަޅައި އެނދުތައް އިތުރުކޮށްފަ އެއް ނެތް. ނަމަވެސް އައްޑޫގައި އެކަން ކުރިއަށް ދަނީ. ހަންކެޑެ ޕްރޮޖެކްޓަކީ ސަރުކާރަކުން، ސަރުކާރު ކުންފުންޏަކުން އެކަން ތަރައްގީ ކުރަން ކުރެވޭ މަސައްކަތް." އޭނާ ވިދާޅުވި އެވެ.