ސިއްރުކުރި ދައުލަތުގެ ހަރަދާއި ދަރަނީގެ ސިޔާސަތު އާންމު ކުރަނީ

މީގެ ކުރިން ސިއްރުކުރަން ނިންމި ދައުލަތުގެ ހަރަދާއި އާމްދަނީ އަދި ދަރަނީގެ ސިޔާސަތު އާންމު ކުރަން ނިންމާފައިވާކަމަށް ފިނޭންސް މިނިސްޓަރު ޑރ. މުހައްމަދު ޝަފީގު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައްޔިތުންގެ މަޖިލީހުގެ މާލިއްޔަތު ކޮމެޓީގައި މިއަދު މިނިސްޓަރު ވިދާޅުވީ ދައުލަތުގެ ދަރަންޏާއި މާލީ ސިޔާސަތު ފިނޭންސް މިނިސްޓްރީގެ ވެބްސައިޓާއި ސަރުކާރުގެ ގެޒެޓުގައި ވެސް އާންމު ކުރާނެ ކަމަށެވެ.

މިނިސްޓަރު ވިދާޅުވީ ދަރަނީގެ ސްޓެރެޓެޖީ އަދި ފިސްކަލް ސްޓްރެޓެޖީ ސިއްރު ކުރުމުގެ ނިޔަތެއް ނެތް ކަމަށެވެ. އަދި އެއީ ރައްޔިތުންނަށް ތަފްސީލްކޮށް އެނގެން ޖެހޭ މައުލޫމާތެއްކަން ވެސް މިނިސްޓަރު ފާހަގަކުރެއްވި އެވެ. 

ތަފްސީލް - މިނިސްޓަރު މީގެ ކުރިން މާލިއްޔަތު ކޮމެޓީގައިި އެދިވަޑައިގަތީ ދައުލަތުގެ ހަރަދާއި އާމްދަނީ އަދި ދަރަނީގެ ސިޔާސަތު މަޖިލީހުގެ މާލިއްޔަތު ކޮމިޓީއާ ހިއްސާ ކުރުމަށް ފަހު އެ މައުލޫމާތު ސިއްރު ކޮށްދިނުމަށެވެ.

ދައުލަތުގެ ހަަރަދަށް ޒިންމާވުމުގެ ގާނޫނުގައިފައިވާ ގޮތުން މިނިސްޓްރީން ސިއްރު ކުރަން އެދުނު އެ ދެ ލިޔުމަކީ ކޮންމެ އަހަރެއްގެ ޖުލައި މަސް ނިމުގެ ކުރިން މާލީ ވުޒާރާއިން މަޖިލީހާ ހިއްސާ ކުރަން ޖެހޭ ދެ ބަޔާނެވެ.  އޭގެ ތެރެއިން:

ގާނޫނުގައި ބުނާގޮތުން ފިސްކަލް ސްޓްރެޓަޖީ ބަޔާނުގެ މަގުސަދަކީ ދައުލަތުގެ ހަރަދާއި އާމްދަނީގެ ސިޔާސަތާ މެދު އާންމު ހޭލުންތެރިކަން އިތުރުކުރުމާއި އެ ސިޔާސަތުގެ އަމާޒުތައް ހާސިލުކުރުމަށް ސަރުކާރުން އަޅަމުންދާ ފިޔަވަޅުތައް ވަޒަންކުރެވޭނެ ވަސީލަތެއް ގާއިމް ކުރުމެވެ. 

ދަރަނީގެ ސްޓްރެޓަޖީ ބަޔާނުގެ މަގުސަދަކީ ދައުލަތުގެ ދަރަނި ހަރުދަނާ އުސޫލުތަކެއްގެ މަތިން އަދާކޮށް ބަލަހައްޓަމުން ގެންދިޔުމަށްޓަކައި ސަރުކާރުން އަޅަމުންދާ ފިޔަވަޅުތައް ދެނެގަތުމަށް ބޭނުންވާ މައުލޫމާތު ފޯރުކޮށްދިނުމެވެ. 

ފާހަގަކޮށްލެވޭ - މީގެ ކުރިން ވެސް މާލީ ވުޒާރާއިން އެ ރިޕޯޓްތައް މަޖިލީހާ ހިއްސާކުރުމަށް ފަހު ވެބްސައިޓުގައި އާންމު ވެސް ކުރެ އެވެ.