ފެނަކައަށް ލިބެންޖެހޭ 500 މިލިއަން ރުފިޔާ ނުދައްކާ އެބަހުރި

އެކި ފަރާތްތަކުން ފެނަކައަށް ދައްކަންޖެހޭ 500 މިލިއަން ރުފިޔާ ނުލިބި އެބަހުރި ކަމަށް އެ ކުންފުނިން ބުނެެފި އެވެ.

ވީ ކިހިނެއް؟ - ފެނަކަ އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކުންފުނީގެ ޗީފް ފައިނޭންޝަލް އޮފިސަރު މުހައްމަދު މަސްއޫދު ވިދާޅުވީ މި އަހަރުގެ ދެވަނަ ކުއާޓަރު ނިމުނު އިރު އެ ކުންފުންޏަށް ލިބެންޖެހޭ ފައިސާގެ އަދަދު 501 މިލިއަން ރުފިޔާ އަށް އަރާ ކަމަށެވެ.

"އޭގެ ތެރެއިން އެކްޗުއަލް ރިސީވަބްލްސްގެ ގޮތުގައި މި އުޅެނީ 380 މިލިއަން ރުފިޔާ. އެއީ އަޅުގަނޑުމެން މަހުގެ 26-27 ހިސާބުގައި ބިލު ކުރާތީ ޑިޔު ނުވާ ބިލުތައް ހުންނާނެ. ޑިޔު ވެފަ ނުދައްކާ ބިލުގެ ތެރޭގައި 380 މިލިއަން ރުފިޔާ މި އުޅެނީ،" އޭނާ ވިދާޅުވި އެވެ.

މަސްއޫދު ވިދާޅުވިގޮތުގައި ފެނަކަ އަށް ދައުލަތުގެ އިދާރާތަކުން 148 މިލިއަން ރުފިޔާ ނުދައްކާ އެބަހުއްޓެވެ. އޭގެ ތެރޭގައި 2020 ވަނަ އަހަރުން ފެށިގެން އެ ކުންފުންޏަށް ފައިސާ ނުލިބި ހުރި ބިލުތައް ވެސް ހިމެނޭ ކަމަށް އޭނާ ވިދާޅުވި އެވެ.

މަސްއޫދު ވިދާޅުވީ ފައިސާ ނުދައްކާ ފަރާތްތަކުގެ ތެރޭގައި ސަރުކާރުގެ އޮފީސްތަކުގެ އިތުރުން ވިޔަފާރިތަކާއި ގޭބިސީތައް ވެސް ހިމެނޭ ކަމަށެވެ.

"ވަރަށް ގިނަ ރަށްރަށުގައި އެބަހުރި ކުދިކުދި ވިޔަފާރިތަކާއި [ފެނަކައިން] ކުރީގައި ކުއްޔަށް ނަގާފައި ހުރި ތަންތަނަށް ފެނަކައިން [ވެސް] ލާރި ދޭން ޖެހޭ. އެ އެއްޗެހިތަކުގެ ސެޓްއޯފްތަކެއް ހެދުމުގެ މަސައްކަތް ކުރިއަށް އެބަ ގެންދަން،" އޭނާ ވިދާޅުވި އެވެ.

ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވީ ބައެއް ބިލުތަކަށް ފައިސާ ހޯދުމުގައި ދަތިތައް ދިމާވާ ކަމަށެވެ.

ނަމަވެސް ތިންވަނަ ކުއާޓަރު ނިމޭއިރު ކުންފުންޏަށް ލިބެންޖެހޭ ފައިސާގެ ތެރެއިން ބޮޑު އެއްޗެއް ހޯދޭނެ ކަމަށް ލަފާކުރެވޭ ކަމަށް ފެނަކަ އިން ބުންޏެވެ.

"އަޅުގަނޑުމެން ހާއްސަ ހަރަކާތެއް ކުރިއަށްް އެބަ ގެންދަން މިހާރު ހުރި އައުޓްސްޑޭންޑިން ކަސްޓަމަރުންނާ އެކު، އެއްފަހަރާ ނުދެއްކޭ ކަސްޓަމަރުންނަށް އިންސްޓޯލްމެންޓެއް ދީގެން ބިލުތަކަށް ލާރި ހޯދުމުގެ މަސައްކަތް،" މަސްއޫދު ވިދާޅުވި އެވެ.