މެލޭޝިއާ އެއާލައިންސްގެ ރާއްޖެ ދަތުރުތައް ބުރާސްފަތީގައި ފަށަނީ

މެލޭޝިއާގެ ގައުމީ އެއާލައިން، މެލޭޝިއާ އެއާލައިންސް އިން އަންނަ ބުރާސްފަތި ދުވަހުން ފެށިގެން ރާއްޖެއަށް ދަތުރުތައް ފަށަން ތައްޔާރުވެއްޖެ އެވެ.

ވީ ކިހިނެއް؟ - އެ އެއާލައިނުން އެންމެ ފަހުން ރާއްޖެއަށް ދަތުރު ކުރީ 2017 ވަނަ އަހަރު އެވެ. މި ހަފްތާ މެލޭޝިއާ އެއާލައިނުން ރާއްޖެއަށް ދަތުރު ފަށަނީ ހަ އަހަރުގެ މެދުކެނޑުމަކަށް ފަހު އެވެ.

ތަފްސީލް - އެ އެއާލައިނުން ރާއްޖެއަށް ދަތުރުތައް އަލުން ފަށާއިރު، ކޮންމެ ދުވަހަކު ދަތުރެއް އޮންނާނެ އެވެ. މެލޭޝިއާގެ ކުއަލަ ލަމްޕޫރުން ރާއްޖެއަށް ކުރާ މި ދަތުރުތައް ކުރާނީ ބޮއިން 800-737 މަރުކާގެ ބޯޓުގަ އެވެ. މިއީ 174 މީހުންގެ ޖާގައިގެ ބޯޓެކެވެ.

މެލޭޝިއަން އެއާލައިންސް އިން ރާއްޖެއަށް ދަތުރު ފަށާއިރު، ދެކޮޅު ޓިކެޓު އަގު އުޅެނީ ގާތްގަނޑަކަށް 600-700 ޑޮލަރުގަ އެވެ.

އެނގުން މުހިއްމު - މިހާރު ވެސް ބަޓިކް އެއާ އަދި އެއާ އޭޝިއާ އިން ކުއަލަ ލަމްޕޫރާއި މާލެއާ ދެމެދު ދަތުރުތައް ކުރެ އެވެ.

މެލޭޝިއާ އަކީ ކިޔެވުމަށާއި ޗުއްޓީއަށް އަދި އެހެނިހެން ބޭނުންތަކަށް ދިވެހިން އާންމުކޮށް ދަތުރުކުރާ ގައުމެކެވެ.

ފަސްމަންޒަރު -  މެލޭޝިއާ އެއާލައިންސްގެ ބޯޓު އެމްއެޗް 370، 2014ގައި ވީނުވީއެއް ނޭނގި ގެއްލުމާއި 2020ގައި ކުރިމަތިވި ކޮވިޑްގެ ސަބަބުން މާލީ މައްސަލަތަކެއް ކުރިމަތިވި އެވެ. އޭގެ ފަހުން މިހާރު އެ އެއާލައިނުން އަންނަނީ އޮޕަރޭޝަން ފުޅާ ކުރުމަށް މަސައްކަތް ކުރަމުންނެވެ.