މަހުގެ އަގު ކޮންޓްރޯލު ކުރުމުން ކުދި ވިޔަފާރިތަކަށް ގެއްލުންވި: ޝިޔާމް

ސަރުކާރުން މަހުގެ އަގު ކޮންޓްރޯލު ކުރުމުގެ ސަބަބުން މަހުގެ އެކި ބާވަތްތައް އުފައްދާ ކުދި ވިޔަފާރިވެރިންނަށް އޭގެ ނޭދެވޭ އަސަރު ކުރި ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހުމަދު ޝިޔާމް ރޭ ވިދާޅުވެއްޖެ އެވެ.

ވީ ކިހިނެއް؟ - 'އެސްއެސް ޓީވީ'ގައި ވާހަކަ ދައްކަވަމުން ޝިޔާމް ރޭ ވިދާޅުވީ މަހުން އެކި ބާވަތްތައް އުފައްދާ ގިނަ އަދަދެއްގެ ކުދި ވިޔަފާރިވެރިން ރާއްޖޭގައި އުޅޭ ކަމަށާއި މަހުގެ އަގު ސަރުކާރުން ކޮންޓްރޯލު ކުރުމުން އެ މީހުންގެ މަސައްކަތްތައް ހުރީ ހުއްޓިފައި ކަމަށެވެ.

އެނގުން މުހިއްމު - މީގެ ކުރިން ސަރުކާރުގެ މަސް ކުންފުނި، މިފްކޯއަށް މަސް ގަންނަމުން ދިޔައީ ކަނޑައަޅާފައިވާ ވަކި އަގެއްގަ އެވެ. އޭގެ ސަބަބުން ރާއްޖޭގެ މާކެޓުގައި މަހުގެ އަގު އޮތީ ކޮންޓްރޯލުވެފަ އެވެ. ނަމަވެސް، ބޭރުގެ ބާޒާރުގައި މަހުގެ އަގު ހުރި މިންވަރަށާއި މަސް ގަނެ، އެކްސްޕޯޓު ކުރުމަށް ހިނގާނެ ހަރަދަށް ބެލުމަށް ފަހު، ކޮންމެ ހަފްތާއަކު ވެސް މަސް ގަންނަ އަގަށް ބަދަލު ގެންނަން ސަރުކާރުން ވަނީ ނިންމައިފަ އެވެ.

ތަފްސީލް - ފިޝަރީޒް މިނިސްޓަރު ވިދާޅުވީ ސަރުކާރުން މަހުގެ އަގު ކޮންޓްރޯލު ކުރުމުގެ ސަބަބުން މަހުގެ ބާވަތްތައް އުފައްދާ ވިޔަފާރިވެރިންނަށް އޭގެ ނޭދެވޭ އަސަރު ކޮށްފައިވާ ކަމަށެވެ.

"މަސް ހިއްކައިގެން ވިއްކާ ބޭފުޅުން އެބައުޅޭ. މި ބޭފުޅުންގެ ހުރިހާ އޮޕަރޭޝަންތަކެއް ހުރިހާ ހިސާބެއްގައި ހުއްޓިފައި މިހުރީ. ރިހާކުރުފުޅިއެއްގެ އަގު އެހުރި މިންވަރުގެ ވާހަކަ ދައްކާނެ ކަމެއް ނެތް ކަންނޭނގެ. ހިކި މަސް ކިލޯއެއްގެ އަގު އެހުރީ ވަރަށް ބޮޑުކޮށް،" ޝިޔާމް ވިދާޅުވި އެވެ.

މިފަދަ ތަކެތީގެ އަގު އުފުލުނީ ސަރުކާރުން މަސް ގަންނަ އަގު ބޮޑުކުރުމުން ކުދި ވިޔަފާރިތަކަށް މަސް ގަންނަން އުނދަގޫވުމުން ކަމަށް އޭނާ ވިދާޅުވި އެވެ.

މަހުގެ އަގު ކޮންޓްރޯލު ކުރުން ހުއްޓާލުމާ އެކު ކުދި ވިޔަފާރިތައް ހިނގައިގަންނަން ފަށައިފި ކަމަށާއި ސަރުކާރުން މިފަހުން ހުޅުވާލި ލޯނަށް ވެސް މަހުގެ ބާވަތްތައް އުފައްދާ ވަރަށް ގިނަ ކުދި ވިޔަފާރިތަކުން ކުރިމަތިލީ ކަމަށް ޝިޔާމް ވިދާޅުވި އެވެ.

"މިހާރުން މިހާރަށް ވެސް ރާއްޖޭގެ އެކި ހިސާބުތަކުގައި މަހުގެ އެކި ވިޔަފާރި ކުރާ ފަރާތްތައް، މަސް ގަނެ ހިއްކާ ފަރާތްތައް، ރިހާކުރު ހަދާ ފަރާތްތަކުގެ މަސައްކަތްތައް ފަށައިފި އެ ބޭފުޅުން،" ޝިޔާމް ވިދާޅުވި އެވެ.

ބައިނަލްއަގުވާމީ ބާޒާރުގައި މަހުގެ އަގު ހުރި އަގަށް ބަލައި މާކެޓު އަގު ކަނޑައެޅުމަކީ ރަނގަޅު ބަދަލެއް ކަމަށް ޝިޔާމް ވިދާޅުވި އެވެ.