އެމްއައިބީގެ ބިޒްނަސް ކަސްޓަމަރުންނަށް ހާއްސަ އާ ހިދުމަތްތަކެއް ތައާރަފު ކުރުން. (ދައުރު ފޮޓޯ/ އަބްދުﷲ އަނޫފް ޖުނައިދް)
އެމްއައިބީގެ ބިޒްނަސް އެކައުންޓު ހުޅުވުން ޑިޖިޓަލްކޮށް، ވިޔަފާރިތަކަށް އާ ހިދުމަތްތަކެއް
މޯލްޑިވްސް އިސްލާމިކް ބޭންކު (އެމްއައިބީ)ގެ ބިޒްނަސް އެކައުންޓުތައް ވެސް އޮންލައިންކޮށް ހުޅުވޭނެ ގޮތް ހަމަޖައްސައި ވިޔަފާރި ކަސްޓަމަރުންނަށް އާ ހިދުމަތްތަކެއް ތައާރަފުކޮށްފި އެވެ.
ވީ ކިހިނެއް؟ - ބުރާސްފަތި ދުވަހުގެ ރޭ މީރުމާ އިވެންޓު ހޯލްގައި ބޭސްވި ރަސްމިއްޔާތެއްގައި އެމްއައިބީ އިން ވަނީ ޑިޖިޓަލްކޮށް ބިޒްނަސް އެކައުންޓު ހުޅުވުމުގެ ހިދުމަތުގެ އިތުރުން ވިޔަފާރިތަކަށް ހާއްސަ ޝަރީއާ ކޮމްޕްލަޔަންޓު އޯވާ ޑްރާފްޓުގެ ހިދުމަތް ވެސް ތައާރަފުކޮށްފަ އެވެ.
ތަފްސީލް - އެމްއައިބީ އިން ބުނީ ވިޔަފާރިތަކަށް އެ ބޭންކުން ދޭ ހިދުމަތްތައް ފުޅާކޮށް ހިދުމަތުގެ ފެންވަރު ރަނގަޅު ކުރުމަށް އަބަދު ވެސް މަސައްކަތް ކުރަމުން އަންނަ ކަމަށެވެ.
އެގޮތުން
-
ބިޒްނަސް ބޭންކިން ކަސްޓަމަރުންނަށް ހާއްސަކޮށް އެމްއައިބީގެ ބިޒްނަސް ބޭންކިން ބްރާންޗުން ހެނދުނު 8:30 އިން ހަވީރު 4 އަށް ހިދުމަތް ދޭނެ
-
ވިޔަފާރިތަކުގެ އެކްސްޕެންސް މެނޭޖުކުރުމަށް ފަސޭހަވާނެހެން ތައާރަފު ކުރި ބިޒްނަސް އެކްސްޕެންސް ކާޑު ފަސޭހައިން ޓޮޕްއަޕް ކުރެވޭނެ ހިދުމަތާ އެކު ކަސްޓަމަރުންގެ ފީޑް ބެކާ އެކު އެ ކާޑުގެ ބޭނުންތައް ވަނީ ފުޅާކޮށްފައި
-
ޕޭރޯލް އަވަހަށް ޕްރޮސެސް ކުރުމަށް މުސާރަ ކޯޑު މެދުވެރިކޮށް މުސާރަތައް ކޮންމެ ބޭންކަކަށް ވެސް ޖަމާކުރެވޭނެ
-
ބަލްކް ޓްރާންސްފާ ހިދުމަތާ އެކު ޕޭމެންޓު ޝެޑިއުލް ކުރެވޭނެ ހިދުމަތެއް ވެސް ތައާރަފުކުރި
-
ވިޔަފާރި ކަސްޓަމަރުންނަށް ފަވަރަ ބޭނުންކޮށްގެން ބަލްކް ޓްރާންސްފާގެ ހިދުމަތް ހޯދޭނެ
ފާހަގަ ކުރެވޭ - އެމްއައިބީ އިން ވަނީ އެ ބޭންކުގެ ވިޔަފާރި ކަސްޓަމަރުންނަށް ދޭ ހިދުމަތްތަކާ ގުޅޭ މައުލޫމާތު ދިނުމަށް ބުރާސްފަތި ދުވަހު އޯޕަންޑޭއެއް ވެސް ބާއްވައިފަ އެވެ. ކުރިއަށް އޮތްތަނުގައި އެ ހަރަކާތް ކޮންމެ އަހަރަކު ވެސް ބާއްވާން ބޭންކުން ވަނީ ނިންމައިފަ އެވެ.