އުރީދޫއާ އެކު ޓިކްޓޮކް ރަސްމީކޮށް ރާއްޖެ އަށް

ސޯޝަލް މީޑިއާ ޕްލެޓްފޯމު ޓިކްޓޮކާ އެކު އުރީދޫ މޯލްޑިވްސް އިން ސްޓްރެޓެޖިކް ޕާޓްނާޝިޕް އެއްބަސްވުމެއްގައި ސޮއިކޮށް، ރާއްޖެއަށް ރަސްމީކޮށް އެ ޕްލެޓްފޯމުން މަރުހަބާ ކިޔައިފި އެވެ.

ވީ ކިހިނެއް؟ - އެކަން ފާހަގަކުރަން ރޭ އުރީދޫ ހެޑް އޮފީހުގައި ވަނީ ހާއްސަ ރަސްމިއްޔާތެއް ވެސް ބާއްވައިފަ އެވެ. އެ ހަފްލާގައި ރާއްޖޭގައި ޓިކްޓޮކް ކޮންޓެންޓް އުފައްދާ ބައެއް ކްރިއޭޓަރުން ވެސް ބައިވެރިވި އެވެ.

މި ޕާޓްނާޝިޕާ އެކު ރާއްޖޭގައި ޓިކްޓޮކް ބޭނުންކުރާ މީހުންގެ ތަޖުރިބާ އިތުރަށް ފުރިހަމަވާނެ ކަމަށާއި އެފަދަ މީހުންނަށް އިތުރު ފުރުސަތުތައް ހުޅުވިގެންދާނެ ކަމަށް އުރީދޫން ބުންޏެވެ.

ތަފްސީލް - އުރީދޫން ބުނީ އެ ކުންފުނިން އަބަދުވެސް މަސައްކަތް ކުރަނީ ކަސްޓަމަރުންނަށް އާ ކަންތައްތަކާއި އީޖާދީ ހިދުމަތްތައް ފޯރުކޮށްދިނުމަށް ކަމަށެވެ.

އުރީދޫ ނެޓްވޯކުގައި ޓިކްޓޮކް ބޭނުންކުރާ ކަސްޓަމަރުންނަށް ހަލުވި ސްޕީޑުގައި ޓިކްޓޮކް ބޭނުންކޮށް، ސްޓްރީމް ކުރެވޭނެ ކަމަށާއި އެ ޕްލެޓްފޯމުގެ ކޮންޓެންޓު ޝެއާކޮށް ކޮންޓެންޓް އުފެއްދުމުގައި އިތުރު ފަސޭހަތައް ލިބޭނެ ކަމަށް ވެސް އުރީދޫން ބުންޏެވެ.

އުރީދޫން ހަމަޖެއްސި އެހެން ކަންކަން؛

ބުނީ ކީކޭ؟ - އުރީދޫ މޯލްޑިވްސް އާއި ޓިކްޓޮކްއާ ދެމެދު ވީ ޕާޓްނާޝިޕާ ގުޅޭ ގޮތުން އުރީދޫ މޯލްޑިވްސްގެ ސީއީއޯ ހާލިދު އަލް އަމާރީ ވިދާޅުވީ މިއީ އުރީދޫ ކަސްޓަމަރުންނަށް ފޯރުކޮށްދޭ އީޖާދީ ހިދުމަތްތަކާއި ޒަމާނީ ސޮލިއުޝަންތަކަށް އިތުރުކުރެވޭ ބޮޅެއް ކަމަށެވެ.

"ޓިކްޓޮކާ އެކު، އަޅުގަނޑުމެންގެ ކަސްޓަމަރުންނަށް ކޮންޓެންޓް އުފެއްދުމަށާއި، އެކަކު އަނެކަކާ އޮންނަ ގުޅުން ބަދަހިކޮށް، އާ ކަންތައްތައް ހޯދުމުގައި އުރީދޫ ނެޓްވޯކް މެދުވެރިކޮށް އިތުރު ފުރިހަމަކަމެއް ލިބިގެންދާނެ،" އޭނާ ވިދާޅުވި އެވެ.