ދަނޑު ހައްދަން ޗައިނާ ކުންފުނިން އުތުރުތިލަފަޅުން 200 ހެކްޓަރު ހިއްކަނީ

އުތުުރު ތިލަފަޅުގައި ގާއިމްކުރާ އެގްރިކަލްޗާ އިންޑަސްޓްރިއަލް ޒޯނަށް އެ ސަރަހައްދުން 200 ހެކްޓަރުގެ ބިން ހިއްކާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.

ވީ ކިހިނެއް؟ - ރޭ ބޭއްވި ކެމްޕޭނު އިވެންޓެއްގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭން ބޭރުން ކާބޯތަކެތި އެތެރެކުރުމަށް ކުރާ ހޭދަ މަދުކޮށް ރާއްޖޭގެ އިގްތިސޯދު ހަމައަކަށް އެޅުވުމަށް ސަރުކާރުން މަސައްކަތް ފަށާފައިވާ ކަމަށެވެ.

ތަފްސީލު - އެ މަސައްކަތުގެ ދަށުން، އުތުރު ތިލަފަޅުގައި އެގްރިކަލްޗާ އިންޑަސްޓްރިއަލް ޒޯނެއް ގާއިމްކުރުމަށް އެ ތަނުން 200 ހެކްޓަރުގެ ބިން ހިއްކާނެ ކަމަށް ރައީސް ވިދާޅުވި އެވެ.

"ރާއްޖޭގައި އުފެއްދޭނެ ހުރިހާ ބާވަތެއްގެ ކާބޯތަކެތި ބޭރުން އެތެރެކުރުމަށްޓަކާ މި ހޭދަކުރާ ބިލިއަނުން މިލިއަނުން ޑޮލަރު، ހޭދަކޮށް އާޅުގަނޑުމެންގެ އިގްތިސާދު މި އޮތް ހާލަތު އިތުރަށް ގޯސްވެގެން ދާދިޔުން ނިމުމަކަށް ގެނައުމަށްޓަކާ މި ގައުމުގައި އުފެއްދޭނެ ހުރިހާ ބާވަތެއްގެ ކާބޯތަކެތި، ދިވެހި ރައްޔިތުންނަށް ބޭނުންވާ ވަރަށް އުފެއްދުމަށްޓަކާ އެ އަމިއްލަ ވަންތަކަން ގާއިމް ކުރުމަށް އެ ވަނީ މަސައްކަތް ފެށިފައި،" ރައީސް ރޭ ވިދާޅުވި އެވެ.

ރައީސް ވިދާޅުވީ ރާއްޖޭގައި ފުޑްސެކިޔުރިޓީ ފުރިހަމައަށް ގާއިމްކޮށްދެއްވާނެ ކަމަށެވެ.

"... ރާއްޖޭގައި ދަނޑުވެރިކަމުގެ މަސައްކަތް ހިންގާ ރައްޔިތުން ދިރިއުޅޭ ރަށްރަށުގެ ތެރެއިން ވެސް ބައެއް ރަށްރަށް ހިމަނައިގެން، އުތުރާއި ދެކުނުގައި ހުރި މިކަހަލަ ބިނޔަ ބޮޑު ބިން ހުރި ރަށްރަށުގައި ވެސް މި މަޝްރޫއުގެ ބައިބައި ހިނގާނެ،" ރައީސް ވިދާޅުވި އެވެ.

އެމަނިކުފާނު ވިދާޅުވީ އެ މަސައްކަތުގެ މައި ހަބަކަށް ވާނީ އުތުރު ތިލަފަޅު ކަމަށާއި އުތުރާއި ދެކުނު ހިމަނައިގެން އެ މަސައްކަތް ކުރާއިރު ރާއްޖޭން ބޭރުން އެތެރެކުރާ ބާވަތްތައް މަދުކުރެވޭނެ ކަމަށެވެ.

މީގެ އިތުރުން ޓޫރިޒަމް ދާއިރާ އަށް ބޭނުންވާ ވަރަށް ކާބޯތަކެތި އުފެއްދުމުގެ މަޝްރޫއު، އެ މަސައްކަތުގެ ދެވަނަ ފިޔަވަހީގެ ގޮތުގައި ފައްޓަވާނެ ކަމަށެވެ.

ގުޅުން ހުރި - ކާބޯތަކެތީގެ ރައްކާތެރިކަން ނުވަތަ ފުޑް ސެކިޔުރިޓީ ޔަގީން ކުރުމަށް ސަރުކާރުން ފަށާފައިވާ މަޝްރޫއު ކުރިއަށް ގެންދިޔުމަށް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯންއާއި (އެމްއައިޑީ) އާއި ޗައިނާ ހާބާ އިންޖިނިއަރިން ކޮމްޕެނީ ލިމިޓެޑާއި އެކު ވަނީ އެމްއޯޔޫ އެއްގައި ސޮއިކޮށްފަ އެވެ.

މި އެމްއޯޔޫގެ ދަށުން ކާބޯތަކެތީގެ ރައްކާތެރިކަން އިތުރުކޮށް، އިގްތިސާދު ސިންދަފާތުކުރުމާއި، އިމްޕޯޓްކުރާ ކާބޯތަކެތީގެ މައްޗަށް ބަރޯސާވުން ކުޑަކުރުމަށް ރާއްޖެއިން ކުރާ މަސައްކަތް ހަރުދަނާވާނެ ކަމަށް އެމްއައިޑީ އިން ބުންޏެވެ.

މި މަޝްރޫއާއެކު ރާއްޖޭގައި ތަރުކާރީ އަދި މޭވާ އުފެއްދުމުގެ ބޭސް އަކާއި އެގްރިކަލްޗަރަލް ޓެލެންޓް ޓްރެއިނިން ބޭސްއެއްގެ އިތުރުން އެގްރިކަލްޗަރަލް ޕްރޮޑަކްޓްސް، ލޮޖިސްޓިކްސް އަދި ޑިސްޓްރިބިއުޝަން ސެންޓަރެއް ވެސް ގާއިމް ކުރާނެ އެވެ.