މޯލްޑިވިއަންއަށް ބޮއިން 787 ބޯޓެއް ގެންނަނީ

ގައުމީ އެއާލައިން، މޯލްޑިވިއަންއަށް ބޮއިން 8-787 ޑްރީމްލައިނާ މަރުކާގެ ބޯޓެއް ކުއްޔަށް ނަގަން އިއުލާނުކޮށްފި އެވެ.

ވީ ކިހިނެއް؟ - އެ އެއާލައިން ހިންގާ އައިލެންޑް އޭވިއޭޝަން (އައިއޭއެސް) އިން މިއަދު ވަނީ ބޮއިން 8-787 މަރުކާގެ ބޯޑެއް ޑްރައި ލީޒްކޮށްދޭނެ ފަރާތެއް ހޯދަން ޕްރޮޕޯޒަލް ހުށަހަޅަން ހުޅުވާލައިފަ އެވެ.

ތަފްސީލް - ބޮއިން 8-787 އަކީ ދިގު ދަތުރުތަކަށް ހާއްސަ ބޯޓެކެވެ. ފަހުގެ ޓެކްނޮލަޖީ ބޭނުންކޮށްގެން އުފައްދާފައިވާ މި މަރުކާގެ ބޯޓު ދަތުރުތަކުގައި ބޭނުން ކުރަން ފެށީ 2011 ވަނަ އަހަރު އެވެ.

މި ބޯޓު ކުއްޔަށް ނަގަން އިއުލާނުކޮށް އައިލެންޑް އޭވިއޭޝަނުން  އާންމުކޮށްފައިވާ ރިކުއެސްޓު ފޯ ޕްރޮޕޯސަލް (އާރުއެފްޕީ)ގައި ބުނީ:

ބޮއިން 787ގެ ބޯޓެއް ގެންނަނީ، މޯލްޑިވިއަންގެ ބައިނަލްއަގުވާމީ ދަތުރުތައް އިތުރުކޮށް، ދުރު މަންޒިލްތަކަށް ފްލައިޓުތައް ތައާރަފު ކުރަން ކަމަށާއި ރާއްޖޭގެ ފަތުރުވެރިކަން ފުޅާކޮށް ކުރިއެރުވުމަށް ރާއްޖެއަށް ފަތުރުވެރިންް އުފުލުމުގެ އަމާޒުގައި ކަމަށް ވެސް އައިއޭއެސް އިން ބުންޏެވެ.

ގުޅުން ހުރި ކަމެއް - އައިއޭއެސް އިން ވަނީ ބައިނަލްއަގުވަމީ ދަތުރުތައް ކުރުމަށް އެއާބަސް އޭ330 މަރުކާގެ ބޯޓެއް ޑްރައި ލީޒް ކުރަން ވެސް ނިންމައިފަ އެވެ.

ރާއްޖެއަށް ފަތުރުވެރިން ގެނެވޭނެ މަންޒިލްތަކަށް ދަތުރުތައް ފުޅާކުރަން ގައުމީ އެއާލައިންއަށް ވައިޑް-ބޮޑީ ދެ ބޯޓު ގެންނަން ސަރުކާރުން އެހީވާ ގޮތަށް ކެބިނެޓުން ނިންމާފައި ވާއިރު، މި ސަރުކާރުގެ ފުރަތަމަ 100 ދުވަހުގެ ތެރޭ ގައުމީ އެއާލައިނުގެ އޮޕަރޭޝަނަށް ވައިޑް ބޮޑީ ބޯޓު ތައާރަފު ކުރުމަކީ ރައީސް މުހައްމަދު މުއިއްޒުގެ ވައުދެކެވެ.

މީގެ ކުރިން، ރައީސް އިބްރާހިމް މުހައްމަދު ސޯލިހުގެ ސަރުކާރުގައި ވެސް މޯލްޑިވިއަންއަށް ވައިޑްބޮޑީ ބޯޓު ކުއްޔަށް ނަގަން އައިއޭއެސް އިން ބިޑަށް ހުޅުވާލި އެވެ. އޭރު އެ ކުންފުނިން ބުނީ ޔޫރަޕާއި ޗައިނާ ފަދަ މަންޒިލުތަކަށް ދަތުރު ފަށަން ބޭނުންވާ ކަމަށެވެ.