އެމްއޭސީއެލްގެ މުވައްޒަފުންގެ މުސާރައިގެ %50 އަނެއްކާވެސް ޑޮލަރުން ދޭން ފަށައިފި

މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ މުވައްޒަފުންގެ މުސާރައިގެ %50 ޑޮލަރުން ދެމުން ދިޔަ ދިޔުން ކޮވިޑް-19އާ ގުޅިގެން ހުއްޓާލާފައި އޮތުމަށް ފަހު، މި މަހުން ފެށިގެން އެކަން އިއާދަކުރަން ނިންމައިފި އެވެ.

ވީ ކިހިނެއް؟ - ކޮވިޑުގެ ކުރިން އެމްއޭސީއެލްގެ މުވައްޒަފުންގެ ބައިކުޅަ ބައި މުސާރަ ދެމުން އައީ ޑޮލަރުންނެވެ. ނަމަވެސް، ކޮވިޑުގެ ހާލަތާ އެކު، ޑޮލަރު ލިބޭ މިންވަރު މަދުވުމުން، ޑޮލަރުން ދެމުންދިޔަ ބައި ދެމުން ގޮސްފައިވަނީ ދިވެހި ރުފިޔާ އިންނެވެ.

ތަފްސީލް - ރާއްޖޭގެ އެންމެ ބޮޑު އެއް ކުންފުނި އަދި ޑޮލަރުން ބޮޑު އާމްދަނީއެއް ލިބޭ ކުންފުނީގެ މުވައްޒަފުންނަށް މިއަދު ފޮނުވި އިންޓާނަލް މެމޯއެއްގައި ބުނީ، މި މަހުން ފެށިގެން އަނެއްކާވެސް ޑޮލަރުން މުސާރައިގެ %50 ދޭން ނިންމާފައިވާ ކަމަށެވެ.

"ކޮވިޑް-19ގެެ ހާލަތާ ގުޅިގެން މުސާރައިގެ %50 ޑޮލަރުން ދެމުން ގެންދިޔަ ގެންދިއުން މެދުކަނޑާލުމަށް ފަހު ސެޕްޓެމްބަރު 2023 އިން ފެށިގެން އަލުން އަނބުރާ ދޭ ގޮތަށް ހަމަޖެއްސި ކަމުގައި ދެންނެވީމެވެ،" އެ ކުންފުނީގެ މެނޭޖިން ޑިރެކްޓަރު މަހުޖޫބު ޝުޖާއު ސޮއިކުރައްވައި ހުރިހާ މުވައްޒަފުންނަށް ފޮނުއްވި މެމޯއެއްގައި ބުނެފައިވެ އެވެ.

ފާހަގަކުރެވޭ ކަމެއް - އެމްއޭސީއެލް އަކީ މުވައްޒަފުންނަށް އެންމެ ބޮޑު ބޯނަސްއެއް ދޭ އެއް ކުންފުންޏެވެ. ފާއިތުވި ދެ އަހަރު އަހަރީ ބޯނަސްގެ ގޮތުގައި އެ ކުންފުނީގެ މުވައްޒަފުންނަށް 25،000ރ. ދީފައިވެ އެވެ.