އިއްޔެ ފާހަގަ ކުރި ބައިނަލްއަގްވާމީ ޝެފުންގެ ދުވަހުގެ ހަރަކާތްތައް، ކެންގަރޫ ކިޑްސްގެ 900 ދަރިވަރުންނަށް އަމާޒުކޮށްގެން ކުރިއަށް ގެންގޮސްފި އެވެ.
ވީ ކިހިނެއް؟ - މި އަހަރުގެ ޝެފުންގެ ދުވަހުގެ ހަރަކާތްތައް ބޭއްވީ، ރާއްޖޭގެ ޝެފުންގެ ޖަމިއްޔާ އާއި 'ޝެފްސް ގިލްޑް އޮފް މޯލްޑިވްސް' އާއި ގައުމީ ޔުނިވަސިޓީގެ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒް (އެފްއެޗްޓީއެސް) ގުޅިގެންނެވެ.
ޝެފުންގެ ދުވަހުގެ މި އަހަރުގެ ޝިއާރަކީ، 'ގްރޯ އިން އަ ހެލްތީ ފިއުޗާ' ނުވަތަ ދުޅަހެޔޮ މުސްތަގްބަލެއްގައި ހެދިބޮޑުވުމެވެ. ދަރިވަރުންނަށް ހާއްސަކޮށްގެން، ހަރަކާތްތައް ބޭއްވީ ވެސް އެ ޝިއާރުގެ ދަށުންނެވެ.
ތިން ސެޝަނަކަށް ބަހާލައިގެން ކެންގަރޫ ކިޑްސްގެ 900 ދަރިވަރުންނަށް ކުރިއަށް ގެންދިޔައީ:
-
ސިއްހަތަށް ފައިދާ ހުރި ގޮތަށް ކެއުން ބެހެއްޓުމާ ގުޅޭ މައުލޫމާތު ދިނުން
-
އާޓްސް އެންޑް ކްރާފްޓްސް ކިޔައިދިނުން
-
ތަރުކާރީ އަޅައިގެން ބިސްގަނޑު އަޅަން ދަސްކޮށްދިނުން
އެ ޖަމިއްޔާތަކުގެ މަގްސަދަކީ، އަންނަން އޮތް ޖީލުތަކަށް، ދުޅަހެޔޮ އަދި ދެމެހެއްޓެނިވި ދުނިޔެއެއް ކަށަވަރުކޮށްދިނުމަށް، ކާނާއާއި ތިމާވެއްޓާ އޮންނަ ގުޅުން ކުޑަކުދިންނަށް ކިޔައިދިނުމެވެ.
ކޮންމެ އަހަރެއްގެ އޮކްޓޫބަރު 20، ދުނިޔޭގެ ޝެފުންގެ ދުވަހުގެ ގޮތުގައި ފާހަގަ ކުރުމުގެ މަގްސަދަކީ ކެއްކުމުގެ ފަންނުގެ ހިދުމަތްތެރިންގެ އަގުވަޒަންކޮށް، އެ ފަންނު ކުރިއަރުވައި، އަންނަން އޮތް ޖީލުތަކަށް ފޯރުކޮށްދިނުމެވެ.
ގައުމީ ޔުނިވާސިޓީ
