ރާއްޖޭގައި ސިޔާސީ ޕާޓީ އުފެއްދުމުގެ ފުރުސަތު ލިބުމާ އެކު އުމަރު ނަސީރު އެކަމަށް ނުކުންނެވި އެވެ. އޭނާ އިސްކޮށް ހުންނަވައި، 12 ޑިސެމްބަރު 2005ގައި އިސްލާމިކް ޑިމޮކްރެޓިކް ޕާޓީ (އައިޑީޕީ) އުފެއްދެވި އެވެ. އެކަމަކު އެ ޕާޓީ ވަނީ 2013ގައި އުވާލައިފަ އެވެ.

މިޒާޖުގައި ވެސް އުމަރަކީ ގޮތްދޫކުރައްވަން އެހާ ފަސޭހަ ބޭފުޅެއް ނޫނެވެ. އޭނާގެ އަނެއް ސިފަޔަކީ ކެރުމެވެ. ފޮރުވުމެއް ނެތި އޭނާގެ އިހުސާސްތައް ބަންޑުންކޮށްލެއްވުމެވެ.

އީޕީއެސްއިން އޯ ލެވެލް އަދި ސްރީ ލަންކާގައި އޭ ލެވެލް ހެއްދެވި އުމަރު ސިފައިންގެއަށް ވަންނަވައި، ތަހުގީގުކުރާ ބައިގައި ގިނަ ދުވަސްތަކެއް ވަންދެން ހިދުމަތްކުރެއްވި އެވެ.

އާ ގާނޫނުއަސާސީގެ ދަށުން 2008ގައި ބޭއްވި ފުރަތަމަ ރިޔާސީ އިންތިހާބުގައި ވާދަކުރެއްވި އެވެ. ދެ ވަނަ ބުރުގައި އެހެން ހުރިހާ ކެންޑިޑޭޓުން، އެމްޑީޕީގެ ކެންޑިޑޭޓް މުހައްމަދު ނަޝީދުގެ ފަހަތްޕުޅަށް އަރާވަޑައިގެންނެވި އިރު ވެސް އުމަރު ހުންނެވީ އެވެ.

އޭގެ ފަހުން 2013ގައި އޮތް އިންތިހާބަށް ޕީޕީއެމްގެ ކެންޑިޑޭޓަކު ނެރެން ބޭއްވި ޕްރައިމަރީގައި އަބްދުﷲ ޔާމީނާ ވާދަކުރެއްވި އެވެ. އުމަރު އަދިވެސް ގަބޫލުކުރައްވަނީ އެ ޕްރައިމަރީގައި އޮޅުވާލާފައިވާ ކަމަށެވެ. ނަމަވެސް އެ އިންތިހާބު ކާމިޔާބުކުރައްވައި ޔާމީން ރައީސްކަމަށް ވަޑައިގަތުމުން، އުމަރު ހޯމް މިނިސްޓަރަކަށް ހެއްދެވި އެވެ.

އުމަރު އަބަދުވެސް ވިދާޅުވަނީ އޭނާ ގަބޫލުކުރައްވާ އުސޫލުތައް މުގުރާލައްވާފައި، ސިޔާސީ ބޭފުޅުންގެ ފަހަތަށް ނާރުއްވާނެ ކަމަށެވެ.

މިއީ ރިޔާސީ އިންތިހާބަށް އުމަރު ނުކުންނަވާ ދެ ވަނަ ފަހަރެވެ.