އައްޑޫ ހުޅުދުއަށް އުފަން އިލްޔާސް ލަބީބަކީ، އާ ގާނޫނުއަސާސީގެ ދަށުން 2009ގައި ބޭއްވި ރައްޔިތުންގެ މަޖިލިހުގެ ފުރަތަމަ އިންތިހާބުގައި ހުޅުދޫ ދާއިރާއިން ހޮވިވަޑައިގެން، ސިޔާސީ ގޮތުން އަމަލީ މަސައްކަތަށް ނުކުންނެވި ބޭފުޅެކެވެ. އެންމެ ޒުވާން އެއް މެމްބަރެވެ. އެމްޑީޕީގެ ހަރަކާތްތެރި، އެމްޑީޕީގެ އާ އުއްމީދުތަކުގެ ތެރޭގައި ހިމެނިވަޑައިގެންނެވި ބޭފުޅެއް ވެސް މެ އެވެ.

ރައްޔިތުންގެ މަޖިލިހަށް ވަޑައިގަތުމުގެ ކުރިން އޭނާގެ މަސައްކަތަކީ ވިޔަފާރި އެވެ. ކޮމްޕިއުޓަރާއި އައިޓީއާ ގުޅޭ ވިޔަފާރި އެވެ. މަޝްހޫރު ނަމުން ނަމަ 'މެގަޗިޕް' އެވެ. ވިޔަފާރީގެ ބެކްގްރައުންޑްގެ ބޭފުޅަކަށް ވާތީ ރައްޔިތުންގެ މަޖިލިހުގައި އޭނާ ވަނީ އިގުތިސާދީ އަދި މާލީ ދާއިރާގެ ކަންކަމުގައި ބައިވެރިވެވަޑައިގެންފަ އެވެ.

އެމްޑީޕީގައި އިލްޔާސް ކުރިންސުރެ ބައްލަވަމުން ގެންދެވީ ކުރީގެ ރައީސް މުހައްމަދު ނަޝީދަށެވެ. އެހެންކަމުން ނަޝީދަށް އެމްޑީޕީގެ ބާރު ގެއްލުމާ އެކު އޭނާ ވަޑައިގަތީ ވެސް އެމަނިކުފާނުގެ ފަހަތްޕުޅަށެވެ.

މިއަދު އެމްޑީޕީ ދެ ފަޅިވެގެން އުފެއްދި ދަ ޑިމޮކްރެޓްސްގެ ރިޔާސީ ފުރަތަމަ ކެންޑިޑޭޓްގެ ފުރުސަތު ހޯއްދެވުނީ، އެގޮތަށް ނަޝީދުގެ އަރިހުގައި ހުންނެވުމުން ކަމަށް ފެނެ އެވެ. މިއަދު އިލްޔާސްއަކީ، 2009ގައި ރައްޔިތުންގެ މަޖިލިހަށް ވެންނެވި ފަދައިން، ރިޔާސީ އިންތިހާބުގައި ވާދަކުރައްވާ އެންމެ ހަގު ކެންޑިޑޭޓް ވެސް މެ އެވެ.