ޖަޕާންގެ ފުރަތަމަ ލަނޑު މަތަކުރެވޭތޯ ޖަރުމަންގެ ކީޕަރު މެނުއަލް ނޯޔާ ބަލަނީ. ނަމަވެސް އަތުގައި ބޯޅަ ޖެހޭ ވަރެއް ނުވި (ފޮޓޯ/އޭއެފްޕީ)
ފޮޓޯ ސްޓޯރީ: ޖަޕާނުގެ ޖާދުލެއް ކަހަލަ މޮޅު
ވޯލްޑް ކަޕް ކާމިޔާބުކުރި ގައުމެއްގެ އަތުން މޮޅުވުމަކީ އޭޝިއާގެ ޓީމުތަކަށް ވަރަށް މަދުން ނޫނީ ނުވާ ކަމެކެވެ. ނޯތު ކޮރެޔާ އިން 1966ގައި އިޓަލީ ބަލިކުރުމާއި ސައުތު ކޮރެޔާ އިން 2002 ގައި އިޓަލީ ބަލިކުރުން ފަދަ ނަތީޖާ، ވޯލްޑް ކަޕްގައި ތަކުރާރުކުރެވޭ ވަރަށް އޭޝިއާގެ ފުޓްބޯޅަ އޭރު ތަރައްގީއެއް ނޫނެވެ.
އެކަމަކު ގަތަރު ވޯލްޑް ކަޕްގައި މިދިއަ ބުދަދުވަހު ޖަޕާނުން ޖަރުމަން ބަލިކުރި ގޮތާއި އޭގެ ކުރިން ސައުދީ އަރަބިއްޔާ އިން އާޖެންޓީނާގެ މައްޗަށް ހޯދި ކާމިޔާބީތަކުން، އޭޝިއާގެ ފުޓްބޯޅައިގެ މަގު އަލިކަން ދުނިޔެއަށް ވަނީ ދައްކައިދީފަ އެވެ،
އޭޝިއާގެ ފުޓްބޯޅައިގެ ބޮޑު ބާރެއް ކަމަށްވާ އަދި އެންމެ އިންތިޒާމީ ގޮތެއްގައި ފުޓްބޯޅަ މުބާރާތްތައް ވެސް ބާއްވަމުން އަންނަ ޖަޕާނުގެ ގޯލަށް ޖަރުމަނުން 33 ވަނަ މިނިޓްގައި ލަނޑު ޖަހައި، ލީޑު ނެގި އެވެ. މިއީ ވޯލްޑް ކަޕްގެ އެންމެ ތަޖުރިބާ ބޮޑު އެއް ގައުމަށް ވުމުން މެޗުގައި ޖަރުމަނަށް މޮޅުވާން އެޅުނު ފިޔަވަޅެއް ކަމަށް ބެލެވުނެވެ.
ނަމަވެސް ދެ ވަނަ ހާފުގައި ޖަޕާންގެ ހިތްވަރު ވަރަށް ތަފާތުވި އެވެ. ކުޅުން ވެސް އެހާމެ ތަފާތުވި އެވެ. ހަލުއި ގިނަ ކުޅުންތެރިންތަކެއް ހިމެނޭ ޓީމަކަށް ވުމުން، ޖަރުމަނަށް ބޮޑެތި އުނދަގޫތައް ވެސް ކުރިމަތިވި އެވެ.
މެޗުގެ މަންޒަރު ބަދަލުވާން ފެށީ 75 ވަނަ މިނިޓްގައި ޖަޕާނުން ވަރަށް ރީތި ގޯލަކާ އެކު އެއްވަރުކުރުމުންނެވެ. ޖަރުމަނަށް އެއީ ޝޮކެކެެވެ. ވޯލްޑް ކަޕްގައި އޭގެ ކުރިން އޭޝިއާގެ ގައުމެއްގެ އަތުން އެކަހަލަ ޕްރެޝަރަކަށް ޖަރުމަން ވެއްޓިފައެއް ނުވެ އެވެ. ޖަޕާން ކުޅުންތެރިން ގެންދިޔައީ އެ ޕްރަޝަރު ބޮޑުކުރަމުން، ޖަރުމަން ހާސްކުރަމުންނެވެ.
މެޗުގެ 83 ވަނަ މިނިޓްގައި ޖަޕާންގެ ޓަކޫމާ އަސާނޯ، ޖަރުމަންގެ ޕެނެލްޓީ އޭރިޔާ ތެރެއަށް އަރިމަތިން ވަދެގަނެ، ގޯލުގެ ހަނި އެންގަލް ނަގައިގެން ނޯޔާ އޮއްވާ އެ ޖެހި ބާރު ބޯޅައިން މުޅި މެޗުގެ ނަތީޖާ އެނބުރުނީ އެވެ. މިއީ ކިތައްމެ މޮޅު ކީޕަރެއް ނަމަވެސް ލޯ މެރިގެން ދާނެ ފަދަ ބާރު ހަމަލާއެކެވެ.
ވޯލްޑް ކަޕަކީ އަބަދުވެސް ހައިރާންކުރުވަނިވި ނަތީޖާ ނުކުންނަ މުބާރާތެކެވެ. އެކަމަކު ޖަރުމަނަށް އެފަދަ މެޗުތަކާ ކުރިމަތިލާން ޖެހިފައި އޮތީ ވަރަށް މަދުންނެވެ. މުބާރާތުގެ ފުރަތަމަ މެޗު ކަމަށް ވުމުން، އެހާ ނުބައި ފެށުމަކުން ލިބޭ މާޔޫސްކަން ވެސް ބޮޑެވެ.
މެޗު ނިމެން ދަނީ ރަނގަޅަށް ނޫންކަން ޖަރުމަންގެ ބެންޗާއި ކޯޗުގެ ހަރަކާތްތަކުން އިހުސާސްކުރެވެ އެވެ. ދުވަހަކީ ޖަރުމަނުގެ ދުވަހެއް ނޫންކަން ޔަގީންވާ ހިސާބަށް ޖަޕާނުން މެޗުގެ ކޮންޓްރޯލް އަތުލި އެވެ.
އަދި މި އުޅެނީ ވޯލްޑް ކަޕްގެ އެންމެ ކުރީ ކޮޅުގަ އެވެ. ނަމަވެސް ޖަރުމަން ބަލިކުރުމަކީ ޖަޕާނަށް ވަރަށް ބޮޑު ކާމިޔާބީއެކެވެ. އެހެންކަމުން އެ އުފާ ކުޅުންތެރިން އައީ މެޗުގެ ފަހު ކަށިގަނޑާ އެކު ފާޅުކުރަމުންނެވެ.
ގްރޫޕް އީގައި ޖަރުމަންގެ އިތުރުން ދުނިޔޭގެ ފުޓްބޯޅައިގެ ބޮޑު ބާރެއް ކަމަށްވާ ސްޕެއިން ވެސް އޮތުމުން، ފުރަތަމަ މެޗުގެ ތިން ޕޮއިންޓަކީ ޖަޕާނަށް ހަމަ ވަރަށް ބޮޑު އުފަލަކާއި، ބޮލުން އެހާމެ ބޮޑު ޕްރެޝަރެއް ވެސް ނައްތާލުމެވެ.