ރައީސްގެ މަސްއޫލިއްޔަތާ ނާއިބު ރައީސް ހަވާލުވެވަޑައިގެންފި

ރައީސް އިބްރާހިމް މުހައްމަދު ސޯލިހު މިއަދު އޮޕަރޭޝަން ކުރައްވާތީ އެމަނިކުފާނުގެ މަސްއޫލިއްޔަތުތަކާ ހަވާލުވެވަޑައިގަތުމަށް ނައިބު ރައީސް ފައިސަލް ނަސީމް ދާދި ދެންމެއަކު ރައީސްކަމުގެ ހުވާކުރައްވައިފި އެވެ.

އެނގުން މުހިއްމު - މިއީ ނައިބު ރައީސަކު ރާއްޖޭގެ ރައީސްކަމުގެ މަސްއޫލިއްޔަތާ ވަގުތީ ގޮތުން ހަވާލުވެވަޑައިގެންނެވި ފުރަތަމަ ފަހަރެވެ.

ތަފްސީލް - ނާއިބު ރައީސް ފައިސަލް ރައީސްކަމުގެ މަސްއޫލިއްޔަތު އަދާކުރެއްވުމަށް ހުވާކުރެއްވީ މިއަދު ހެނދުނު 5:50ގައި ރައްޔިތުންގެ މަޖިލީހުގައި ބޭއްވި ރަސްމިއްޔާތެއްގަ އެވެ. މަޖިލީހުގެ ރައީސް މުހައްމަދު ނަޝީދު ބައިވެރިވެވަޑައިގެންނެވި ރަސްމިއްޔާތުގައި ހުވާ ލައިދެއްވީ އުއްތަމަ ފަނޑިޔާރު އަހުމަދު މުއުތަސިމް އަދުނާނެވެ.

ވީ ކިހިނެއް؟ - ޑޮކްޓަރުންގެ ލަފާގެ މަތިން މިއަދު ހެނދުނުގެ ވަގުތެއްގައި ތަައިރޮއިޑް އޮޕަރޭޝަނެއް ކުރައްވަން ނިންމަވާފައިވާކަން ރައީސް ސޯލިހު ރޭ ވަނީ ޓްވީޓަކުން ހާމަކުރައްވައިފަ އެވެ. އަދި ވަގުތީ ގޮތުން ރައީސްކަމުގެ މަސްއޫލިއްޔަތު ނައިބު ރައީސް ފައިސަލްއާ ހަވާލުކުރައްވާނެ ކަމަށް ވެސް ރައީސް ވަނީ ވިދާޅުވެފަ އެވެ.

ރައީސް ސޯލިހު އޮޕަރޭޝަން ކުރައްވަނީ ސިންގަޕޫރުގަ އެވެ.

ރައީސް އޮފީހުގެ ބަސް - ރައީސް އޮފީހުން މިއަދު ބުނިގޮތުގައި އޮޕަރޭޝަން ކުރައްވަން ޖެހިވަޑައިގެން، ރައީސްގެ މަސްއޫލިއްޔަތުތައް އަދާކުރެއްވުމަށް ވަގުތީގޮތުން އުޒުރުވެރިވެވަޑައިގަންނަވާ ފަދަ ހާލަތެއް މެދުވެރިވެފައިވާތީ ގާނޫނު އަސާސީގެ 123 ވަނަ މާއްދާގެ (ހ)ގައި ވާ ގޮތުގެ މަތިން ރައީސް ސޯލިހު ވަނީ ސަބަބު ބަޔާންކުރައްވައި ރައްޔިތުންގެ މަޖިލީހުގެ ރައީސަށް ލިޔުމުން އެކަން އަންގަވައިފަ އެވެ. އަދި އެއަށް ފަހު ރައީސްގެ މަސްއޫލިއްޔަތުތައް މިއަދު 6 އިން ފެށިގެން ނާއިބު ރައީސްއާ ހަވާލުކުރެއްވީ އޮޕަރޭޝަނަށް ފަހު އަލުން ރައީސްކަމުގެ މަސްއޫލިއްޔަތުތަކާއި ވާޖިބުތަކާ ރައީސް ހަވާލުވެވަޑައިގަންނަވަންދެނެވެ.