އެޗްޑީސީން ހުޅުމާލޭގެ ތަރައްގީގެ 4 މަޝްރޫއެއްގައި ސޮއި ކުރަން ބޭއްވި ހަފްލާގެ ތެރެއިން (ފޮޓޯ: އެޗްޑީސީ)
ހުޅުމާލޭގައި ޑޭކެއާ ސެންޓަރަކާ އެކު 4 މަޝްރޫއެއްގައި ސޮއިކޮށްފި
ހުޅުމާލެގައި ޑޭކެއާ ސެންޓަރަކާ އެކު ހަތަރު މަޝްރޫއުއެއްގެ އެއްބަސްވުންތަކުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން އެ ކުންފުނިތަކާ އެކު މިއަދު ސޮއިކޮށްފި އެވެ.
ތަފްސީލު - ތަފާތު ހަތަރު ކުންފުންޏަކާ އެކު އެ މަޝްރޫއޫތަކުގެ އެއްބަސްވުންތަކުގައި ސޮއިކޮށްފައިވަނީ މިއަދު އެޗްޑީސީގައި ބޭއްވި ހާއްސަ ރަސްމިއްޔާތުގަ އެވެ. އެޗްޑީސީގެ ފަރާތުން އެ ހަތަރު އެއްބަސްވުމުގައި ސޮއިކުރައްވާފައި ވަނީ އެ ކުންފުނީގެ މެނޭޖިން ޑިރެކްޓަރު އަހްމަދު އާތިފް އެވެ.
ޑޭކެއާ ސެންޓަރު:
އެޗްޑީސީން ބުނި ގޮތުގައި ޑޭކެއާ ސެންޓަރަކީ 3،000 އަކަފޫޓުގެ ޖާގައިގެ ހަ ބުރީގެ އިމާރާތެކެވެ. ދެ އަހަރު ދުވަހުގެ ތެރޭގައި ނިންމަން އަމާޒު ހިފާފައިވާ މި ސެންޓަރުން:
-
ޒަމާނީ ޑޭކެއާގެ ހުރިހާ ހިދުމަތެއް ލިބެން ހުންނާނެ
-
ހާއްސަ އެހީއަށް ބޭނުންވާ ކުދިންނަށް ހާއްސަ ކްލިނިކްތައް ގާއިމްކުރާނެ
-
ދެ އަހަރު ތެރޭ ނިންމުމަށް އެ މަސައްކަތް ހަވާލު ކުރީ، އެސޯސިއޭޓެޑް ބިޒްނަސް އޭޖެންޓްސް (އޭބީއޭ)އާ؛ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަބްދުالله ގާސިމް
ބިދޭސީ މަސައްކަތްތެރިންގެ އިމާރާތް:
އެޗްޑީސީން ބުނި ގޮތުގައި ބިދޭސީ މަސައްކަތްތެރިންނަށް ހާއްސަކޮށްގެން އަޅާ މި އިމާރާތަކީ ރާއްޖޭގެ އެކި ކުންފުނިތަކުން އެކި މަސައްކަތްތައް ކުރުމަށް ގެންނަ ބިދޭސީ މުވައްޒަފުންނަށް ރައްކާތެރި އެކޮމޮޑޭޝަންގެ ހިދުމަތްތައް ފޯރުކޮށްދިނުމަށް ޓަކައި ފަށާ މަޝްރޫއުއެކެވެ.
އެގޮތުން:
-
7000 ލޭބަރުންނާއި 2000 ހޮސްޕިޓަލިޓީ މުވައްޒަފުންނަށް ދިރިއުޅެވޭނެ 18 ބްލޮކް ހިމެނޭ
-
ކޮންމެ ބްލޮކެއްގައި ހަތަރެއް އަދި ހަ މީހުންގެ ޖާގައިގެ ކޮޓަރިތަކާއި ފާހަނާބަރިއަކާއި ނަމާދުގެ އަދި ފިހާރަ ހިމެނޭ
-
ފަސް ފަންގިފިލާއެއްގައި އޮފީސްތައް ހުންނާނެ
-
14 މަސް ތެރޭ ނިންމުމަށް މި މަސައްކަތް ހަވާލު ކުރީ، ހޮންގްކޮންގެ ރޯޓައިމް އިންޖިނައަރިންގް ޓެކްނޮލޮޖީ ޕްރައިވެޓް ލިމިޓެޑާ؛ ކުންފުނީގެ ފަރާތުން ސޮއި ކުރެއްވީ، ކަންޓްރީ މެނޭޖަރު ޗިން ޝެންގްވޫ
އޮޓޯ ސެންޓާ:
އެޗްޑީސީން ބުނި ގޮތުގައި އެކުންފުނިން އިސްނަގައިގެން އޮޓޯ ސެންޓަރެއް ތަރައްގީ ކުރުމަށް ނިންމާފައިވަނި ވެލްޑިން ކުރުމާއި ޓިންކަރިން ފަދަ މަސައްކަތްތަކަކީ އާންމުން ދިރިއުޅޭ ހިސާބުތަކުގައި ކުރުން އެހާ ރައްކާތެރިކަމަށް ނުވާތީ އެވެ. އެގޮތުން:
-
އޮޓޯ ސެންޓަރަކީ ބޭސްމަންޓާ އެކު ފަސް ބުރި ހިމެނޭ 35،400 އަކަފޫޓުގެ ޖާގައިގެ އިމާރާތެއް
-
ދެ އަހަރު ތެރޭ ނިންމުމަށް މި މަސައްކަތް ހަވާލު ކުރީ، ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަންއާ؛ ކުންފުނީގެ ފަރާތުން ސޮއި ކުރެއްވީ، ކުންފުނީގެ ޖެނެރަލް މެނޭޖަރު ޖަންގް ޓާއޯ
ޕާކިން ބިލްޑިން:
މިއީ، މާލެ ސަރަހައްދުގައި އެއްގަމު އުޅަނދުފަހަރު ޕާކު ކުރުމުގައި ދިމާވާ ޖާގައިގެ ދަތިކަން ހައްލުކުރުމުގެ ގޮތުން ދަމާސްގެ އިސްނެގުމުގެ މަތިން ތަރައްގީކުރަން ނިންމާފައިވާ ޕާކިން އިމާރާތެކެވެ.
އެގޮތުން:
-
24،700 އަކަފޫޓުގެ ޖާގައިގެ މި ޕާކިން އިމާރާތުގައި ހަ ބުރި ހުންނާނެ
-
ފުޑްކޯޓެއް ވެސް އެ ސަރަހައްދުގައި ތަރައްގީކުރާނެ
-
ދެ އަހަރު ތެރޭ ނިންމުމަށް މި މަސައްކަތް ހަވާލު ކުރީ ދަމާސްއާ؛ އެ ކުންފުނީގެ ފަރާތުން ސޮއި ކުރެއްވީ، ޑެޕިއުޓީ މެނޭޖިން ޑިރެކްޓަރު އަހްމަދު ސާލިހް
އެ މަސައްކަތްތައް އެ ކުންފުނިތަކާ ހަވާލު ކުރީ ކިހާ އަގަކަށް ކަމެއް އެޗުޑީސީއަކުން ނުބުނެ އެވެ.