ހުޅުމާލެ ދެ ވަނަ ފޭސް. (ދައުރު ފޮޓޯ/ މުޒައްޔިން ނާޒިމް)
ކޮވިޑުގައި ކުޑަވުމަށް ފަހު ކުލިތައް އަނެއްކާވެސް މައްޗަށް
ރާއްޖޭގައި ތަންތަނުގެ ކުލީގެ އަގު ހުއްޓުމެއް ނެތި ބޮޑުވަމުން އަންނަ ކަމަށް މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
ވީ ކިހިނެއް؟ - އެމްއެމްއޭ އިން ނެރުނު މި އަހަރުގެ ފުރަތަމަ ކުއާޓަރުގެ އިކޮނޮމިކް ބުލެޓިންގައިވާ ގޮތުން، މިދިޔަ މާޗު މަހުގެ ނިޔަލަށް ކުލީގެ އަގުތަކަށް %0.6ގެ އިތުރުވުމެއް ވަނީ އައިސްފަ އެވެ.
ތަފްސީލު - މިއީ، މަރުކަޒީ ބޭންކުން ބުނި ގޮތުގައި، ކުލީގެ އަގު ޖެހިޖެހިގެން ބޮޑުވި ތިން ވަނަ ކުއާޓަރެވެ. ކޮވިޑް-19ގެ ބަލިމަޑުކަމާ ގުޅިގެން ކުލީގެ އަގު ދަށަށް ދިޔަ ނަމަވެސް، އެމްއެމްއޭ އިން ބުނީ އޭގެ ފަހުން ކުލީގެ އަގު ބޮޑުވަމުންދާ ކަމަށެވެ.
އެހެން ބައިތަކުގެ އިންފްލޭޭޝަނަށް ބަލާއިރު:
-
ފުރަތަމަ ކުއާޓަރުގައި އިންފްލޭޝަން ރޭޓު %0.6އަށް އިތުރުވި (މިދިޔަ އަހަރުގެ ފަހު ކުއާޓަރުގައި އިންފްލޭޝަން ރޭޓު ހުރީ %0.1ގައި)
-
މަހުގެ ބާވަތްތަކުގެ އަގަށް %5ގެ އިތުރުވުމެއް އައިސް، ކާބޯތަކެތީގެ ބައިގެ އިންފްލޭޝަނަށް %2.2 އިތުރުވުމެއް އައި
-
ޕެޓްރޯލްގެ އަގަށް %49ގެ އިތުރުވުމެއް
-
ބޭހުގެ އަގުތަކުން %9 އަދި އެސިސްޓިވް ޕްރޮޑަކްޓްތަކުގެ އަގުން %8 ބޮޑުވެ، ސިއްހީ ދާއިރާގެ އިންފްލޭޝަން ރޭޓަށް %4ގެ އިތުރުވުމެއް އައި
-
މުވާސަލާތީ ހިދުމަތްތަކުގެ ބައިގެ އިންފްލޭޝަން ރޭޓު %15 ދަށްވި؛ ސަބަބަކީ ބްރޯޑްބޭންޑް އަދި މޮބައިލް އިންޓަނެޓް ހިދުމަތްތަކުގެ އަގު މިދިޔަ އަހަރު ކުޑަކުރުން
-
ދަތުރުފަތުރުގެ ބައިން އިންފްލޭޝަން ރޭޓު %3.7 ކުޑަވި؛ މިއީ 2020ގެ ހަތަރު ވަނަ ކުއާޓަރަށް ފަހު މި ބައިން އިންފްލޭޝަން ރޭޓު ދަށަށް ދިޔަ ފުރަތަމަ ފަހަރު
އެނގުން މުހިންމު - އެމްއެމްއޭ އިން ލަފާ ކުރަނީ މި އަހަރުގެ ތެރޭގައި ރާއްޖޭގެ އިންފްލޭޝަން ރޭޓު ވަރަށް ބޮޑަށް މައްޗަށް ދާނެ ކަމަށެވެ. އޭގެ މައިގަނޑު ސަބަބަކީ ރަޝިއާ-ޔޫކްރެއިން ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލުމެވެ.
މި އަހަރު ކުރިއަށް އޮތް ތަނުގެ އިންފްލޭޝަން ބިނާވާނީ، އެމްއެމްއޭއިން ބުނި ގޮތުގައި:
-
ދުނިޔޭގެ ބާޒާރުގައި ތެލާއި ކާބޯތަކެތީގެ އަގަށް އަންނަ ބަދަލުތަކަށް
-
ސަރުކާރުން ޓެކުހާއި ސަބްސިޑީ ދޭ ގޮތްތަކަށް