ކުޑަގިރި ހުޅުވާ ދުވަހަށް ކަނޑައެޅި 300 ޖާގަ ފުލްވެއްޖެ

އަންނަ ހޮނިހިރު ދުވަހު ހުޅުވާ ކުޑަގިރި ޕިކްނިކް އައިލެންޑަށް ދާން ބުކިންއަށް ހުޅުވާލުމާ އެކު ފުރަތަމަ ދުވަހުގެ ހުރިހާ ޖާގަތައް ފުލްވެއްޖެ އެވެ.

ވީ ކިހިނެއް؟ - މާލެ އާއި ހުޅުމާލެއިން ފުރައިގެން ދެވެން އޮންނަ ކުޑަގިރިއަށް ހާއްސަ މޮބައިލް އެޕްލިކޭޝަނާއި ވެބްސައިޓުން ބުކިންއަށް ހުޅުވާލީ މިއަދު ހަވީރު 4 ޖެހިއިރެވެ. އާންމުކޮށް ދުވާލަކު 500 މީހުންނަށް ދެވޭ ގޮތަށް ހަމަޖައްސާފައިވާ ރަށް ހުޅުވާ ދުވަހު ފުރުސަތު ދެނީ 300 މީހުންނަށެވެ.

ތަފްސީލު - އެޗުޑީސީއިން ބުނި ގޮތުގައި ބުކިންއަށް ހުޅުވާލިތާ ގާތްގަނޑަކަށް ބައިގަޑިއެއް ހާއިރުގެ ތެރޭގައި، މާލެއިން ފުރާ ޖާގަތައް ވަނީ ފުލްވެފަ އެވެ.

ފުރަތަމަ ދުވަހު ވެސް ދަތުރުދާން ގިނަ ބަޔަކު ބޭނުންވާކަން އެނގުނީ، އެޕްލިކޭޝަނާއި ވެބްސައިޓަށް ބާރުބޮޑުވެ، ބުކިން ހައްދަން އުޅެއުޅެ ވެސް ބައެއް މީހުންނަށް އެކަން ނުކުރެވުމުންނެވެ. ހާއްސަކޮށް ވެބްސައިޓަށް ބާރުބޮޑުވެ، ވެބްސައިޓުން އެއްގޮތަކަށް ވެސް ބުކިން ނުހެއްދޭ ކަމަށް ބައެއް މީހުން ސޯޝަލް މީޑިއާގައި ޝަކުވާ ކުރި އެވެ.

ބުނީ ކީކޭ؟ - އެޗުޑީސީގެ ޕަބްލިކް ރިލޭޝަންސް މެނޭޖަރު މިމްރާހު އަހްމަދު 'ދައުރު'އަށް ވިދާޅުވީ ދަތުރުދާނެ ތަނެއް ބޭނުންވެފައިވާ މިންވަރު ބުކިންއަށް ހުޅުވާލުމާ އެކު ލިބުނު ތަރުހީބުން ވެސް ފެނިއްޖެ ކަމަށެވެ.

"ލިބިގެންދިޔަ ތަރުހީބުން ވެސް ފެނިގެންދިޔައީ މާލެ ސަރަހައްދުގެ ރައްޔިތުން ޕިކްނިކް ދާނެ ރަށަކަށް ބޭނުންވެފައިވާ މިންވަރު. މިއީ ހަގީގަތުގައި ވެސް ރައީސް އިބްރާހިމް މުހައްމަދު ސާލިހް ވައުދު ވެވަޑައިގެންނެވި ގޮތަށް މާލެ ސަރަހައްދުގައި ދިރިއުޅޭ ރައްޔިތުންނަށް ދެއްވި ހަދިޔާއެއް،" އޭނާ ވިދާޅުވި އެވެ.

ފަސްމަންޒަރު - ކުޑަގިރިއަކީ، މާލޭގައި ދިރިއުޅޭ މީހުން ދަތުރުދާން ބޭނުންކުރަމުން އައި ކުޑަ ބަނޑޮސް، ކުރީގެ ރައީސް މުހައްމަދު ވަހީދުގެ ސަރުކާރުން ބަޔަކަށް ރިސޯޓު ހަދަން ދިނުމާ ގުޅިގެން ކުރިމަތިވެފައި އޮތް ހުސްކަން ފޫބެއްދުމަށް މި ސަރުކާރުން ވައުދުވެގެން ހެދި ރަށެކެވެ. އެ ވައުދު ފުއްދުމުގެ ގޮތުން ސަރުކާރުން އެންމެ ފުރަތަމަ ޕިކްނިކް ރަށެއްގެ ގޮތުގައި ހަމަޖައްސަން ނިންމީ ކ. އެނބޫދޫފަޅުގައި ކްރޮސްރޯޑްސްގެ ބޭނުމަށް ހިއްކާފައިވާ ރަށްތަކުގެ ތެރެއިން އަދި ބޭނުން ނުކޮށް އޮތް ރަށެއްގަ އެވެ. 

ނަމަވެސް، ކްރޮސްރޯޑްސްގެ އެ ރަށް ހެދުމުގެ މަސައްކަތް އެކި ސަބަބުތަކާ ހުރެ ލަސްވަމުން ދިއުމާ ގުޅިގެން، ކުޑަގިރި ފަޅުން ބިން ހިއްކަން އެމްޓީސީސީއާ ހަވާލުކުރި އެވެ. ކުޑަގިރީގައި ޕިކްނިކް އައިލެންޑް ހެދި ނަމަވެސް، އެނބޫދޫފަޅުގައި ވެސް އެފަދަ ރަށެއް ތަރައްގީ ކުރާނެ ކަމަށް ސަރުކާރުން ބުނެފައިވެ އެވެ.