މުއްދަތު ހަމަވެފައިވާ ވެކްސިން ޖެހި މައްސަލަ ބަލައި ފިޔަވަޅު އަޅާނަން: އައިޖީއެމްއެޗް

ވިލިމާލޭ ހޮސްޕިޓަލުން ކުޑަކުދިންތަކަކަށް ދުވަސް ހަމަވެފައިވާ ވެކްސިނެއް ދިން މައްސަލަ ސީރިއަސް މައްސަލައެއްގެ ގޮތުގައި ބަލަން ފަށާފައިވާ ކަމަށާއި އިހުމާލުވާ ފަރާތްތަކާ މެދު ފިޔަވަޅު އަޅާނެ ކަމަށް އައިޖީއެމްއެޗް އިން ބުނެފި އެވެ.

ވީ ކިހިނެއް؟ - މުއްދަތު ހަމަވެފައިވާ ވެކްސިނެއް ވިލިމާލޭ ހޮސްޕިޓަލްގައި ދީފައިވާ ކަމުގެ ޝަކުވާ ލިބެމުންދާ ކަމަށް ބުނެ، އެކަން ސަމާލުކަމަށް ގެނައީ ވިލިމާލެ ދާއިރާގެ މެމްބަރު އަހްމަދު އުޝާމް ކުރެއްވި ޓުވީޓެއްގަ އެވެ.

އުޝާމް ވަނީ ކުދިންނަށް ދިން ވެކްސިންގެ ފޮޓޯ ހިއްސާކުރައްވައިފަ އެވެ. ވެކްސިންގައިވާ ގޮތުން، ފެބުރުއަރީ 2020 ގައި އުފައްދާފައިވާ އެ ވެކްސިންގެ މުއްދަތު މި އަހަރުގެ ޖެނުއަރީ މަހަށް ވަނީ ހަމަވެފަ އެވެ.

ތަފްސީލް - އެކަމާ ގުޅިގެން އައިޖީއެމްއެޗުން މިރޭ ނެރުނު ނޫސްބަޔާނެއްގައި ބުނީ، އެކަން އެ ހޮސްޕިޓަލުގެ ސަމާލުކަމަށް އައިސްފައިވާ ކަމަށެވެ.

އަދި އެ ހޮސްޕިޓަލުންނާއި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެކަން ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނަ ކަމަށް ވެސް ބަޔާނުގައި ބުނެފައިވެ އެވެ.

ބުނީ ކީކޭ؟ - "މި މައްސަލައިގައި އިހުމާލުވާ ފަރާތްތަކާ މެދު އަޅަންޖެހޭ ފިޔަވަޅު އަޅައި، މިފަދަ ކަމެއް ކުރިމަގުގައި ތަކުރާރެ ނުވާނެކަން ކަށަވަރު ކުރުމަށްޓަކައި އަޅަންޖެހޭ އެންމެހައި ފިޔަވަޅެއް އަޅާނެކަމުގެ ޔަގީންކަން އަރުވަމެވެ،" ބަޔާނުގައި ބުންޏެވެ.

މުއްދަތު ހަމަވެފައިވާ ވެކްސިން ދިނީ ކިތައް ކުދިންނަށް ކަމެއް ސާފެއް ނުވެ އެވެ.

އައިޖީއެމްއެޗް އިން ބުނީ ވިލިމާލޭ ހޮސްޕިޓަލުގައި ވެކްސިން ޖެހުން ވަގުތީ ގޮތުން ހުއްޓާލާފައިވާ ކަމަށެވެ.