ނެކްޓަން މިޝަންގެ ބޯޓުން ތެލަށް ފައިސާ ނުދައްކައިގެން ރާއްޖޭގައި ހިފަހައްޓައިފި

ރާއްޖޭގެ ކަނޑުތަކުގެ ފުނަށް ގޮސް ދިރާސާކުރުމަށް މި ފަހުން ކުރިއަށް ގެންދިޔަ 'ނެކްޓަން މޯލްޑިވްސް މިޝަން'ގައި ގެންގުޅުނު މައި އުޅަނދު 'އޮޑިސީ'އަށް ދިވެހި ކުންފުންޏަކުން ވިއްކި ޑީސަލަށް ދައްކަން ޖެހޭ ގިނަ އަދަދެއްގެ ފައިސާ ނުދައްކައިގެން އެ އުޅަނދު ފުރުން މަނާކޮށް ސިވިލް ކޯޓުން އިއްޔެ ވަގުތީ އަމުރެއް ނެރެފި އެވެ.

އެނގުން މުހިންމު - ނެކްޓަން މިޝަން ކާމިޔާބުކަމާ އެކު ނިމުނުކަން އިއުލާނު ކުރުމަށް ރައީސް އޮފީހުގައި މިިދިޔަ ހޮނިހިރު ދުވަހު ވަނީ ނޫސްވެރިންގެ ބައްދަލުވުމެއް ބާއްވައި ބައެއް ހޯދުންތަކުގެ މައުލޫމާތު ވެސް އާންމުކޮށްފަ އެވެ.

އޮޑިސީއަކީ ނެކްޓަން މިޝަންއަށް ކުއްޔަށް ހިފާފައިވާ އުޅަނދެކެވެ. އަދި އެބޯޓުގެ ވެރިފަރާތް އޯސީސީއެފް އާއި ނެކްޓަން މިޝަން ހިންގި އިނގިރޭސި ވިލާތުގެ ނެކްޝަން އަކީ ވެސް މުޅިން ވަކި ދެ ބައެކެވެ.

ނެކްޓަންއިން ބުނީ އޮޑިސީގެ ތެޔޮ ބިލަކީ ނެކްޓަން އިން ދައްކަން ޖެހޭ ފައިސާއެއް ނޫން ކަމަށެވެ.

ވީ ކިހިނެއް؟ - ސިވިލް ކޯޓުގެ ގާޒީ ފަރުހާދު ރަޝީދު ސޮއިކުރައްވައި އިއްޔެ ނެރުއްވި އަމުރުގައިވާ ގޮތުން، ރާއްޖެއިން ބޭރުން އައި ސައިންސްވެރިންނާ އެކު އެ މިޝަންގެ މައި ބޯޓު 'އޮޑިސީ' ރާއްޖެއިން ފުރައިގެން ދަނިކޮށް އެ ބޯޓް ހިފެހެއްޓުމުގެ ވަގުތީ އަމުރެއް ނެރެދިނުމަށް ސިވިލް ކޯޓުގައި އެދުނީ އެ ބޯޓަށް ޑީސަލް ފޯރުކޮށްދިން ރާއްޖޭގެ ބޮޑު ކުންފުންޏެއް ކަމަށްވާ ހޯކްސް އިންނެވެ.

ތަފްސީލް - ހޯކްސް އިން އެދުނު ގޮތަށް، މައްސަލަ ނިމެންދެން އެ ބޯޓް ރާއްޖެއިން ފުރައިގެން ދިއުން މަނާކޮށް ސިވިލް ކޯޓުން އިއްޔެ ވަނީ އަމުރެއް ނެރެފަ އެވެ. ސިވިލް ކޯޓުގެ އަމުރުގައިވާ ގޮތުގައި:

އަމުރު - އަމުރު ނެރުނު ސަބަބެއްގެ ގޮތުގައި އެ އަމުރުގައި ބުނެފައިވަނީ، އެ މައްސަލައިގައި ހުކުމް ކުރުމުގެ ކުރިން އޯސީސީއެފްގެ 'އޮޑިސީ' ބޯޓް މިވަގުތު ރާއްޖެއިން ފުރައިގެން ގޮސްފި ނަމަ، އިއާދަ ނުކުރެވޭ ވަރުގެ ގެއްލުމެއް ހޯކްސްއަށް ލިބުމުގެ ފުރުސަތު އޮތް ކަމަށް ޝަރީއަތަށް ބުރަވެވޭ ކަމަށެވެ. އަދި އަމުރެއް ނެރުމަށް ފުރިހަމަވާން ޖެހޭ ސަބަބުތައް ފުރިހަމާ ކަމަށް ވެސް އެ އަމުރުގައިވެ އެވެ.

"... ޝަރީއަތުން ގޮތެއް ކަނޑައަޅަންދެން އޯސީސީއެފްގެ ނަން މަތީގައި ރަޖިސްޓްރީކޮށްފައިވާ ކަނޑު އުޅަނދެއް ކަމުގައިވާ 'އޮޑިސީ' [އައިއެމްއޯ ނަމްބަރު:7347823] ރާއްޖެއިން ފުރައިގެން ދާން އުޅެފި ނަމަ، އެކަން ހުއްޓުވަން ކަމާ ބެހޭ އެންމެހާ އިދާރާތަކުގެ މައްޗަށް ދައުވާ ލިބޭ ފަރާތްތަކުގެ ގައިރު ހާޒިރުގައި އަންގައި އަމުރުކޮށްފީމެވެ،" ޓްރާންސްޕޯޓާއި އިމިގްރޭޝަން ޑިފެންސް އަދި ޕޯޓްސްގެ މައްޗަށް ރައްދުވާ ގޮތަށް ނެރުނު އަމުރުގައިވެ އެވެ.

އެނގުން މުހިންމު - ދިވެހި ސަރުކާރާއި އިނގިރޭސިވިލާތުގެ މެރިން ފައުންޑޭޝަނެއް ކަމަށްވާ ނެކްޝަން ގުޅިގެން ސެޕްޓެމްބަރު 4 އިން މިދިޔަ މަހުގެ 5އާ ހަމައަށް ކުރިއަށް ގެންދިޔަ 'ނެކްޓަން މޯލްޑިވްސް މިޝަން'ގައި، 'އޮޑިސީ' ބޯޓް ވަނީ ރާއްޖޭގެ އެކި ސަރަހައްދުތަކަށް ޒިޔާރަތްކޮށްފަ އެވެ. އަދި ރާއްޖެ ހިމެނޭ ގޮތުން 10 ގައުމެއްގެ ސައިންސްވެރިން ބައިވެރިވި އެވެ.