ދުނިޔޭގައި ފުރަތަމަ ފަހަރަށް 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާ ގާނޫނެއް އޮސްޓްރޭލިއާ ޕާލަމަންޓުން ފާސްކޮށްފި

ދުނިޔޭގައި ފުރަތަމަ ފަހަރަށް، 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާ ގާނޫނެއް އޮސްޓްރޭލިއާ ޕާލިމަންޓުން ހުކުރު ދުވަހު ވަނީ ފާސްކޮށްފައެވެ.

މި ގާނޫނުގެ ދަށުން ޓިކްޓޮކް، ފޭސްބުކް، ސްނެޕްޗެޓް، ރެޑިޓް، އެކްސް އަދި އިންސްޓަގްރާމް ފަދަ ޕްލެޓްފޯމްތަކުގައި 16 އަހަރުން ދަށުގެ ކުދިން އެކައުންޓް ހެދުން ހުއްޓުވަން ޖެހެ އެވެ. އަދި ސޯޝަލް މީޑިއާ ޕްލެޓްފޯމްތަކުން މިކަމާމެދު ފިޔަވަޅުނާޅާނަމަ 50 މިލިއަން އޮސްޓްރޭލިއަން ޑޮލަރު (33 މިލިއަން އެމެރިކާ ޑޮލަރު) އާ ހަމައަށް ޖޫރިމަނާ ކުރެވޭނެ އެވެ.

ސެނެޓުން މި ބިލު ބުރާސްފަތި ދުވަހު ވަނީ 34 މެންބަރުންގެ  ވޯޓުން ފާސްކޮށްފައެވެ. އިދިކޮޅަށް ވޯޓްދިނިީ  19 މެންބަރުންނެވެ. އަދި ހައުސް އޮފް ރެޕްރެޒެންޓެޓިވްސްއިން ބުދަ ދުވަހު ވަނީ 102 މެންބަރުންގެ ވޯޓުން (އިދިކޮޅަށް 13) މި ގާނޫނު ފާސްކޮށްފައެވެ.

ހުކުރު ދުވަހު ހައުސް އޮފް ރެޕްރެޒެންޓެޓިވްސްއިން ވަނީ ސެނެޓުން ހުށަހެޅި އިސްލާހުތަކާއެކު މި ބިލު ގާނޫނަކަށް ހަދާފައެވެ.

ބޮޑުވަޒީރު އެންތަނީ އަލްބަނީޒް ވިދާޅުވި ގޮތުގައި މި ގާނޫނަކީ އިންޓަނެޓްގައި ކުދިންނަށް ކުރިމަތިވާ ނުރައްކާތަކާމެދު ކަންބޮޑުވާ މައިންބަފައިންނަށް އެހީތެރިވެދޭނެ ގާނޫނެކެވެ.

ޖޫރިމަނާ ތަންފީޒުކުރުމުގެ ކުރިން މި މަނާކުރުން ތަންފީޒުކުރާނެ ގޮތް ހޯދުމަށް ޕްލެޓްފޯމްތަކަށް އެއް އަހަރުގެ މުއްދަތެއް ދެވިފައިވެ އެވެ.

ފޭސްބުކް އަދި އިންސްޓަގްރާމް މިލްކުވެރިފަރާތް މެޓާ ޕްލެޓްފޯމްސްއިން ބުނެފައިވަނީ މި ގާނޫނު "އަވަސްއަރުވާލައިގެން" ފާސްކޮށްފައިވާ ކަމަށެވެ.

އޮސްޓްރޭލިއާގައި ޕްލެޓްފޯމްތަކުގެ ވަކާލާތުކުރާ ޑިޖިޓަލް އިންޑަސްޓްރީ ގްރޫޕް (ޑިޖީ) އިން ބުނެފައިވަނީ މި ގާނޫނުގެ ސަބަބުން ކުދިންނަށް ކުރާނެ އަސަރާއި، ޓެކްނިކަލް އަސާސްތަކާއި، ދާއިރާއާ ގުޅޭ ސުވާލުތައް އަދިވެސް އެބަހުރި ކަމަށެވެ.

ހުކުރު ދުވަހު ފާސްކުރި އިސްލާހުތަކުން ޕްރައިވެސީގެ ރައްކާތެރިކަން އިތުރުކޮށްދެ އެވެ. ޕްލެޓްފޯމްތަކަށް ޕާސްޕޯޓް ނުވަތަ ޑްރައިވިންގ ލައިސަންސް ފަދަ ސަރުކާރުން ދޫކުރާ އައިޑެންޓިޓީ ލިޔުންތައް ހޯދުމަށް މަޖުބޫރު ނުކުރެވޭނެ އެވެ. އަދި ސަރުކާރުގެ ނިޒާމެއް މެދުވެރިކޮށް ޑިޖިޓަލް އައިޑެންޓިފިކޭޝަން ހޯދުމަށްވެސް މަޖުބޫރު ނުކުރެވޭނެ އެވެ.