ގާޒާގެ މެދުތެރޭ ސަރަހައްދުކަމުގައިވާ ދާރުލް ބަލަހުގައި ހުންނަ އަލްއަގްސާ ޝަހީދުންގެ ހޮސްޕިޓަލު ކުރިމަތީގައި އިސްރާއީލުގެ ހަމަލާތަކުން މަރުވި މީހުން، 14 ނޮވެމްބަރު 2024 (ފޮޓޯ: ވަފާ/ފަލަސްތީން ނިއުސް އޭޖެންސީ)
އިސްރާއީލުގެ ހަނގުރާމަވެރި އަމަލުތަކަކީ ގާޒާގެ ރައްޔިތުން ނައްތާލުމަށް ރޭވުންތެރިކަމާއެކު ހިންގާ އަމަލުތަކެއް ކަމަށް އދ. ގެ ހާއްސަ ރިޕޯޓު ބުނެފި
އދ. ގެ އިންސާނީ ހައްގުތަކާބެހޭ އޮފީހުގެ ހާއްސަ ކޮމިޓީއަކުން އިސްރާއީލުގެ ހަނގުރާމަވެރި އަމަލުތަކާ ގުޅޭ ގޮތުން ތައްޔާރުކުރި ރިޕޯޓެއްގައި އިސްރާއީލުން ގާޒާގައި ހިންގަމުންދާ އަމަލުތަކަކީ ނަސްލު ނައްތާލުމަށް ހިންގާ އަމަލުތަކެއް ކަމަށް ބުނެފި އެވެ.
މި ރިޕޯޓު އަމާޒުކޮށްފައިވަނީ 2023 ވަނަ އަހަރުގެ އޮކްޓޯބަރު މަހުން ފެށިގެން 2024 ވަނަ އަހަރުގެ ޖުލައި މަހާ ހަމައަށް ހިނގާދިޔަ ކަންކަމަށެވެ. އަދި މައިގަނޑު ގޮތެއްގައި ބަލާފައިވަނީ ގާޒާގައި ހިނގަމުންދާ އިސްރާއީލުން ހިންގަމުންދާ އަނިޔާވެރި އަމަލުތަކަށެވެ.
-
"އިސްރާއީލުން ގާޒާއަށް އަޅާފައިވާ ހިސާރު އަދި އިންސާނީ އެހީ ފޯރުކޮށްދިނުން ހުއްޓުވުމާއި، މަދަނީ ރައްޔިތުންނާއި އެހީ ފޯރުކޮށްދޭ ފަރާތްތަކަށް އަމާޒުކޮށް ދެމުންގެންދާ ހަމަލާތަކަކީ، އިންޓަނޭޝަންލް ކޯޓް އޮފް ޖަސްޓިސް (އައި.ސީ.ޖޭ) ގެ އަމުރުތަކާއި ސަލާމަތީ މަޖިލީހުގެ ފިޔަވަޅުތަކާ ހިލާފަށް އަދި އދ. ގެ އެންގުންތަކާ ހިލާފަށް، ރޭވިގެން ހިންގާ އަމަލުތަކެކެވެ. މިއީ ހަނގުރާމައިގެ ހަތިޔާރެއްގެ ގޮތުގައި ބަނޑަށްޖެއްސުން ބޭނުންކޮށް، ފަލަސްތީނު ރައްޔިތުންނަށް އަދަބު ދިނުމަށް ހިންގާ އަމަލުތަކެކެވެ،" މި ރިޕޯޓުގައި ބުނެފައިވެއެވެ.
އިތުރަށް މި ރިޕޯޓުގައި ބުނެފައިވާ ގޮތުގައި އިސްރާއީލުން ގާޒާގައި ހިންގާ އަމަލުތަކުގެ ސަބަބުން ފެނާއި ނަރުދަމާ ފަދަ އަސާސީ ހިދުމަތްތައް ހަލާކުވެ، "ތިމާވެއްޓަށް ބޮޑު ގެއްލުންތަކެއް" ލިބިފައިވެ އެވެ. އަދި މީގެ އަސަރުތައް ހަނގުރާމަ ނިމުމަށްފަހުގައިވެސް އޮންނާނެ ކަމަށް ބުނެފައިވެ އެވެ.
އިސްރާއީލުން ގައްޒާގެ އާންމުންނަށް ދޭ ހަމަލާތަކަށް އާޓިފިޝަލް އިންޓެލިޖެންސް (އޭ.އައި.) އެހީވެދޭ ޓާގެޓިން ބޭނުންކުރުމާ ގުޅޭ ގޮތުންނާއި، އޭގެ ސަބަބުން އަންހެނުންނާއި ކުޑަކުދިން މަރުވާ އަދަދު އިތުރުވެފައިވާ މިންވަރު މި ރިޕޯޓުގައި ހިމަނާފައިވެ އެވެ.
އިންޓަނޭޝަނަލް ނެޓްވަރކް ފޯރ އެއިޑް، ރިލީފް އެންޑް އެސިސްޓެންސް (އިނާރާ) ގެ ވެރިޔާ އަރްވާ ޑަމޮން ބުނެފައިވާ ގޮތުގައި ގާޒާގައި މިހާރު އޮތީ ބިރުވެރި ހާލަތެއްގަ އެވެ.
ގާޒާގެ މެދު ސަރަހައްދު ދޭރުލް ބަލަހުގައި ތިބި އުތުރު ގާޒާގެ ނަގުލުމީހުންނަށް އެހީވަމުންދާ އިނާރާގެ ފަރާތުން އަލްޖަޒީރާއަށް ދިން އިންޓަވިއުއެއްގައި އޭނާ ބުނެފައިވަނީ، އިސްރާއީލުގެ ހަމަލާތައް މެދުކެނޑުމެއް ނެތި ކުރިޔަށްދާ ކަމަށާއި، އިންސާނީ އެހީއާއި ސިއްހީ އެހީ ބޭނުންވާ މިންވަރަށް ނުލިބޭ ކަމަށެވެ.
-
"މީހުން ވަރަށް ބޮޑަށް ޓްރޯމާއަށް ހުށަހެޅިފައި ވަނީ. އަދި އުތުރު ސަރަހައްދުން ފިލައިގެން ދާން މީހުން ފަސްޖެހެނީ އެ މަގުމަތީގައި އެމީހުންނަށް ހަމަލާދޭނެ ކަމުގެ ބިރުން. މީހުން ފިލާއިރު އާއިލާ ވަކިވަނީ - އަންހެނުންނާއި ކުދިން ޓީނޭޖް ފިރިހެން ކުދިންނާ ވަކިވެގެން ދަނީ،" މި ރިޕޯޓުގެ އިތުރު ތަފުސީލުގައި އޭނާ ބުނެފައިވެ އެވެ.
އޭނާ އިތުރަށް ބުނެފައިވާ ގޮތުގައި އިސްރާއީލުން އުތުރު ސަރަހައްދަށް އިންސާނީ އެހީ ފޯރުކޮށްދިނުމަށް ހުއްދަ ނުދޭ ކަމަށާއި، މުޅި މައްސަލައަކީ "ފެށުނީއްސުރެވެސް އުނދަގޫ މައްސަލައެއް" ކަމަށެވެ.
ޑޮކްޓަރސް ވިތައުޓް ބޯޑަރސް (އެމްއެސްއެފް) އިން އިސްރާއީލްގެ ސަރުކާރުން އާދީއްތަ ދުވަހު ގާޒާއިން ޖޯޑަނަށް އަށް ކުދިންނާއި އެމީހުންގެ ބަލަދުވެރިން ގެންދިއުމަށް ހުއްދަ ނުދިނުން ކުށްވެރިކޮށްފައިވެ އެވެ.
އެ ޖަމިއްޔާއިން ބުނާ ގޮތުގައި ފާއިތުވި މަސްތަކުގައި ކުދިންނާއި އެމީހުންގެ ބަލަދުވެރިން 32 މީހުން ގާޒާއިން ޖޯޑަނަށް ގެންދިއުމަށް އެދުނު ނަމަވެސް، އެ ފުރުސަތު ލިބިފައިވަނީ ހަ މީހުންނަށެވެ.
On 10 November, Israeli authorities blocked, without explanation, the medical evacuation of eight children and their caretakers from Gaza who are in need of medical care, including a two-year-old with leg amputations, to the MSF hospital in Jordan. We strongly denounce this… pic.twitter.com/x8LBQ4khBE
— MSF International (@MSF) November 14, 2024
-
"ފަރުވާ ބޭނުންވާ ކުދިން ގާޒާއިން ބޭރަށް ދިއުމަށް އިސްރާއީލުން ހުރަސްއަޅާތީ އަހަރެމެން ހައިރާންވޭ. ގާޒާއިން އަވަސް ފަރުވާއަށް ބޭނުންވާ މީހުން ބޭރަށް ދޫކޮށްނުލުމަކީ އެއްވެސް ހުއްޖަތެއް ނެތް އަމަލެއް،" އެމްއެސްއެފްގެ ޖޯޑަންގެ ކަންޓްރީ ޑިރެކްޓަރު މުއީން މަހުމޫދު ސޯޝަލް މީޑިޔާގައި ބުނެފައިވެ އެވެ.
ވޯރލްޑް ހެލްތު އޯގަނައިޒޭޝަނުން ބުނާ ގޮތުގައި މަދުވެގެން 14،000 މީހުން ސިއްހީ ފަރުވާއަށް އެހެން ގައުމުތަކަށް ގެންދަން ބޭނުންވެ އެވެ.
އިސްރާއީލު ސިފައިންނާއި ހިޒްބުﷲ ގެ ހަނގުރާމަވެރިން ލެބަނަންގެ އައިޓަރޫން ރަށުގެ ބޭރު ސަރަހައްދާއި އެއިނާޓާ އަވަށުގެ ކައރީގައި މިއަދު ހަނގުރާމަކޮށްފައިވާ ކަމަށް ރިޕޯޓްތައް ބުނެ އެވެ. މި ތަޅާފޮޅުމުގައި އިސްރާއީލުގެ ސިފައިންނަށް ގެއްލުން ލިބިފައިވެ އެވެ.
ކޮމެންޓް